ກອງປະຊຸມເຈົ້າໜ້າທີ່ອາວຸໂສກຳປູເຈຍ,ລາວ,ມຽນມາ ແລະ ຫວຽດນາມ ໄດ້ທົບທວນຄືນບາງບັນຫາສຳຄັນພ້ອມຫາລືທິດ ທາງແຜນການຮ່ວມມືໃນຕໍ່ໜ້າ

         ກອງປະຊຸມລະດັບເຈົ້າໜ້າ ທີອາວຸໂສ ກຳປູເຈຍ - ລາວ - ມຽນມາ - ຫວຽດ ນາມ ທີ່ ສປປ ລາວ ໄດ້ຮັບກຽດເປັນ ເຈົ້າພາບໄຂຂຶ້ນໃນຕອນເຊົ້າຂອງວັນທີ 11 ມີນາ 2013 ນີ້ຢູ່ໂຮງແຮມດອນ ຈັນພາເລດ ນະຄອນຫຼວງວຽງຈັນ ພາຍໃຕ້ການ ເປັນປະທານ ຂອງທ່ານ ບຸນເກີດ ສັງສົມສັກ ລັດຖະມົນຕີຊ່ວຍວ່າການກະຊວງການຕ່າງ ປະເທດ, ຫົວໜ້າເຈົ້າໜ້າທີ່ອາວຸໂຊ ຂອງ ສປປ ລາວ ໂດຍມີບັນດາຫົວໜ້າເຈົ້າໜ້າທີ່ອາວຸໂສ ແລະ ຄະນະຜູ້ແທ່ນ ຈາກຣາຊະອານາຈັກກຳປູເຈຍ, ສາທາລະນະລັດສະຫະພາບມຽນ ມາ, ສາທາລະນະລັດສັງຄົມນິ ຍົມຫວຽດນາມ,ກອງເລຂາອາ ຊຽນ ແລະ ຜູ້ຕາງໜ້າ ຈາກຂະແໜງການ ທີ່ກ່ຽວຂ້ອງຂອງ ສປປ ລາວ ເຂົ້າຮ່ວມ. ກອງປະຊຸມໄດ້ຕີລາຄາສູງຕໍ່ໝາກຜົນຂອງການຈັດຕັ້ງປະຕິບັດຂອບການຮ່ວມມື ຂອງສີ່ປະເທດໃນໄລຍະຜ່ານພ້ອມຫາລືທິດທາງແຜນການຮ່ວມມືໃນຕໍ່ໜ້າ.

         ກອງປະຊຸມໄດ້ທົບທວນຄືນການຈັດຕັ້ງປະຕິບັດການຮ່ວມມືໃນ 9 ຂະແໜງການຮ່ວມມືບູລິມະສິດພາຍໃຕ້ຂອບ ການຮ່ວມມືກຳປູເຈຍ - ລາວ - ມຽນມາ - ຫວຽດນາມ. ພ້ອມນີ້ຍັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄວາມຄືບ ໜ້າຂອງການຈັດຕັ້ງປະຕິບັດການຮ່ວມມືໃນໄລຍະຜ່ານມາ ໂດຍສະເພາະແມ່ນການຮ່ວມມືໃນຂະແໜງການພັດ ທະນາຊັບ

ພະຍາກອນມະນຸດ, ການເຊື່ອມຈອດເສັ້ນທາງຄົມມະນາຄົມ - ການຂົນສົ່ງລະຫວ່າງສີ່ປະເທດ, ການກໍ່ສ້າງ ແລະ ປັບ ປຸງຖະໜົນຫົນທາງ, ທາງລົດໄຟ, ການທ່ອງທ່ຽວ,ການປັບປຸງ ແລະ ເປີດດ່ານຊາຍແດນຕ່າງໆ ເພື່ອເຊື່ອມໂຍງກັບພາກພື້ນໃຫ້ ຫຼາຍຂຶ້ນລວມທັງການຈັດຕັ້ງປະຕິບັດບັນດາໂຄງການທີ່ໄດ້ຮັບການຊ່ວຍເຫຼືອຈາກບັນດາປະເທດຄູ່ຮ່ວມພັດທະນາລວມທັງ ຍີ່ປຸ່ນ.

         ກອງປະຊຸມຍັງໄດ້ປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າໂດຍສະເພາະແມ່ນການຜັນຂະຫຍາຍວິໄສທັດ ໃຫ້ເປັນໂຄງການ ແລະ ແຜນງານລະອຽດສຳລັບການຮ່ວມມືໃນໄລຍະສັ້ນ, ກາງ ແລະ ໄລຍະຍາວ, ເອົາໃຈໃສ່ຂົນຂວາຍຍາດ ແຍ່ງທຶນຮອນຈາກພາຍໃນ, ຄູ່ຮ່ວມພັດທະນາ ແລະ ພາກທຸລະກິດ ເພື່ອມາຈັດຕັ້ງປະຕິບັດບັນດາໂຄງການບູລິມະສິດຂອງ ສີ່ປະເທດ ແລະ ສືບຕໍ່ປັບປຸງບັນດາລະບຽບການ ເພື່ອອຳນວຍຄວາມສະດວກໃຫ້ແກ່ການສົ່ງເສີ່ມການຄ້າ, ການລົງທຶນ ແລະ ການທ່ອງທ່ຽວໂດຍການຂະຫຍາຍລະບົບກວດກາຢູ່ຈຸດດຽວ ຕາມດ່ານຊາຍແດນລະຫວ່າງສີ່ປະເທດ ເພື່ອເລັ່ງລັດການພັດ ທະນາເສດຖະກິດ - ສັງຄົມ ແລະ ຫຼຸດຜ່ອນຄວາມແຕກໂຕນດ້ານ ການພັດທະນາລະຫວ່າງບັນດາປະເທດສະມາຊິກອາ ຊຽນເກົ່າ ແລະ ໃໝ່ ເພື່ອກຽມພ້ອມເຂົ້າສູ່ປະຊາຄົມເສດຖະກິດອາຊຽນໃນ ປີ 2015 ຢ່າງມີປະສິດທິຜົນ. ນອກນີ້ ກອງປະ ຊຸມຍັງໄດ້ປຶກສາຫາລືການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດ ແລະ ກອງປະຊຸມສຸດຍອດກຳປູເຈຍ - ລາວ - ມຽນມາ - ຫວຽດນາມ ຄັ້ງທີ 6 ທີ່ຈະຈັດຂຶ້ນໃນວັນ ທີ 12 ​ 13 ມີນາ 2013 ນີ້ ຢູ່ນະຄອນຫຼວງວຽງຈັນ ສປປ ລາວ.