8 ຂະແໜງການຮ່ວມມືທີ່ເປັນບູລິມະສິດໄດ້ຖືກຍົກຂຶ້ນຫາລືໃນກອງປະຊຸມເຈົ້າໜ້າທີ່ອາວຸໂສແອັກແມັກ

     ກອງປະຊຸມເຈົ້າໜ້າທີ່ອາວຸໂສຍຸດທະສາດການຮ່ວມມືດ້ານເສດ ຖະກິດແມ່ນ້ຳ ອີຣະວະດີ - ແມ່ນ້ຳ ເຈົ້າພະຍາ - ແມ່ນ້ຳຂອງ (ແອັກ ແມັກ) ຄຽງຄູ່ກັບກອງປະ ຊຸມເຈົ້າ ໜ້າທີ່ອາວຸໂສ ກຳປູເຈຍ - ລາວ - ມຽນມາ - ຫວຽດນາມ ໄດ້ໄຂຂຶ້ນ ໃນ ຕອນເຊົ້າຂອງວັນທີ 11 ມີນາ 2013 ນີ້ຢູ່ນະຄອນຫຼວງວຽງຈັນ ພາຍໃຕ້ການເປັນປະ ທານຂອງ ທ່ານ ບຸນເກີດ ສັງສົມສັກ ລັດຖະມົນຕີຊ່ວຍວ່າການກະຊວງ ການຕ່າງ ປະເທດ, ຫົວໜ້າເຈົ້າໜ້າທີ່ ອາວຸໂສຂອງ ສປປ ລາວ, ມີບັນດາຫົວໜ້າເຈົ້າໜ້າທີ່ ອາວຸໂສ ແລະ ຄະນະຜູ້ແທ່ນຈາກຣາຊະອານາຈັກກຳປູເຈຍ, ສາທາລະນະລັດ ສະຫະພາບມຽນມາ, ຣາຊະອານາຈັກໄທ, ສາທາລະນະລັດສັງຄົມນິຍົມຫວຽດ ນາມ, ກອງເລຂາອາຊຽນ ແລະ ຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງ ສປປ ລາວ ເຂົ້າຮ່ວມ.

        ກອງປະຊຸມໄດ້ທົບທວນຄືນຜົນຂອງການຈັດຕັ້ງປະຕິບັດແຜນການຮ່ວມມືໃນ 8 ຂະແໜງການທີ່ເປັນບູລິມະສິດ ພາຍໃຕ້ການຮ່ວມມືແອັກແມັກ ແລະ ໄດ້ຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດໂຄງການ ແລະ ແຜນງານ ຕ່າງໆໂດຍປະເທດປະສານງານຂອງແຕ່ລະຂະແໜງການຮ່ວມມືບູລິມະສິດພ້ອມສະແດງຄວາມຊົມເຊີຍ ແລະ ຕີລາຄາສູງຕໍ່

ຄວາມຄືບໜ້າຂອງການຈັດຕັ້ງປະຕິບັດໃນໄລຍະຜ່ານມາໂດຍສະເພາະການຈັດຕັ້ງປະຕິບັດບັນດາໂຄງການຮ່ວມມືແບບສອງ ຝ່າຍ ແລະ ຫຼາຍຝ່າຍ ໄດ້ຮັບຜົນສຳເລັດເປັນກ້າວໆມາ; ມູນຄ່າການຄ້າ ແລະ ການລົງທຶລະຫວ່າງບັນດາປະເທດສະມາ ຊິກແອັກແມັກດ້ວຍກັນກໍໄດ້ນັບມື້ນັບເພີ່ມຂຶ້ນ, ຄວາມຄືບໜ້າຂອງການຮ່ວມມືໃນຂະແໜງການຄົມມະນາຄົມ - ຂົນສົ່ງ ເຊິ່ງບັນດາ ປະເທດສະມາຊິກແອັກແມັກໄດ້ພ້ອມກັນປັບປຸງ, ກໍ່ສ້າງເສັ້ນທາງຄົມມະນາຄົມ, ຂົວ, ສະໜາມບິນ, ທາງລົດໄຟ ເພື່ອການເຊື່ອມໂຍງໃນລະດັບພາກພື້ນແມ່ນນ້ຳອີຣະວະດີ-ແມ່ນ້ຳເຈົ້າພະຍາ-ແມ່ນ້ຳຂອງ; ການສ້າງເງື່ອນໄຂ ແລະ ສິ່ງອຳນວຍ ຄວາມສະດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວລວມທັງການຈັດຕັ້ງປະຕິບັດການກວດກາຈຸດດຽວຢູ່ດ່ານ ຊາຍແດນແດນສະຫວັນ ສປປ ລາວ ແລະ ລາວ ບາວ ສສ ຫວຽດນາມ ເຊິ່ງໄດ້ຮັບຜົນສຳເລັດເປັນກ້າວໆມາພ້ອມສະເໜີ ໃຫ້ມີການຂະຫຍາຍ ການບໍລິການດັ່ງກ່າວຢູ່ຕາມດ່ານ ສາກົນອື່ນໆໃນບັນດາປະເທດສະ ມາຊິກ.

        ບັນດາເຈົ້າໜ້າທີ່ອາວຸໂສຂອງບັນດາປະເທດສະມາຊິກ ແອັກແມັກ ຍັງໄດ້ປຶກສາຫາລືກ່ຽວກັບທິດທາງການຮ່ວມມືໃນ ຕໍ່ໜ້າ ເພື່ອຊອກຫາຊ່ອງທາງໃນການຈັດຕັ້ງປະຕິບັດໂຄງການ ແລະ ແຜນງານຕ່າງໆຂອງຂອບການຮ່ວມມືແອັກແມັກຕາມ ແຜນ ປະຕິບັດໃໝ່ 2013 - 2015 ພາຍຫຼັງບັນດາຜູ້ນຳແອັກແມັກຮັບຮອງເອົາ. ການລະດົມແຫຼ່ງທຶນຈາກພາຍໃນ, ຈາກ ຄູ່ຮ່ວມພັດທະນາ ແລະ ພາກເອກະຊົນ; ການເສີມຂະຫຍາຍການຮ່ວມມື, ການສ້າງເງື່ອນໄຂ ແລະ ສິ່ງອຳນວຍຄວາມ ສະ ດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວຕາມແລວເສດຖະກິດຕາເວັນອອກ-ຕາເວັນຕົກ, ແລວເສດຖະກິດ ເໜືອ - ໃຕ້ ແລະ ແລວ ເສດຖະກິດໃຕ້ລວມທັງການຊຸກຍູ້ໃຫ້ພາກສ່ວນເອກະຊົນເຂົ້າມາລົງທຶນຢູ່ໃນເຂດເສດຖະກິດພິເສດ ແລະ ເຂດເສດຖະກິດສະເພາະໃຫ້ຫຼາຍຂຶ້ນ.ພ້ອມດຽວກັນນີ້ກອງປະຊຸມຍັງໄດ້ປຶກສາຫາລືກະກຽມໃຫ້ແກ່ກອງປະຊຸມລັດ ຖະມົນຕີຕ່າງປະເທດ ແລະ ກອງປະຊຸມສຸດຍອດແອັກແມັກຄັ້ງທີ 5 ເຊິ່ງຈະຈັດຂຶ້ນໃນວັນທີ 12 - 13 ມີນາ 2013 ຢູ່ນະ ຄອນຫຼວງວຽງຈັນ, ສປປ ລາວ.