ຄວນເບິ່ງຄືນການເກັບເງິນຢູ່ສະຖານີຂົນສົ່ງໂດຍສານສາຍໃຕ້

     ຜູ້ໃຊ້ບໍລິການທີ່ເຂົ້າໄປຮັບສົ່ງຍາດພີ່ນ້ອງຫລືເຄື່ອງຂອງຕ່າງໆທີ່ຝາກມານຳລົດໂດຍສານສາຍໃຕ້ຕ້ອງການໃຫ້ໜ່ວຍງານ ລັດກ່ຽວຂ້ອງລົງໄປກວດກາການເກັບເງິນຄ່າຜ່ານເຂົ້າໄປໃນສະຖານີດັ່ງກ່າວວ່າເໝາະສົມຫລື ບໍ່ ? ພາຍຫລັງເຫັນວ່າການກະ ທຳດັ່ງກ່າວມີລັກສະນະເປັນການສວຍໂອກາດຫາຜົນປະໂຫຍດຂອງຜູ້ປະກອບການຫລາຍກວ່າ.

    ຈາກເຫດຜົນທີ່ວ່າ ເພື່ອຄວາມເປັນລະບຽບຂອງການສັນຈອນ ພາຍໃນສະຖານີໂດຍສານ ແລະ ຮັບປະກັນຕໍ່ຄວາມປອດ ໄພຂອງພາຫະນະ ແລະ ຊັບສີນເຄື່ອງຂອງຕ່າງໆຂອງຜູ້ໂດຍສານຈຶ່ງກາຍເປັນຂໍ້ອ້າງຂອງຜູ້ປະກອບການເພື່ອເກັບເງິນຈຳນວນ 5 ພັນ ກີບ ສຳລັບລົດໃຫຍ່ ແລະ 3 ພັນ ກີບສຳລັບລົດຈັກ ນຳຜູ້ທີ່ໃຊ້ບໍ ລິການທີ່ຕ້ອງການເອົາພາຫະນະ ຂອງຕົນເຂົ້າໄປຮັບ- ສົ່ງຍາດພີ່ນ້ອງ ຫລື ເຄື່ອງຂອງຕ່າງໆທີ່ຝາກມານຳລົດໂດຍສານພາຍໃນດ້ານຫລັງສະຖານີ, ແຕ່ຜູ້ໃຊ້ບໍລິການຈຳນວນບໍ່ ໜ້ອຍ ເຫັນວ່າການເກັບເງິນຄືດັ່ງກ່າວແມ່ນການສວຍໂອກາດສະແຫວງຫາຜົນປະໂຫຍດຂອງຜູ້ປະກອບການຫລາຍກວ່າການອ້າງ ເຫດຜົນອື່ນເພາະວ່າປີ້ທີ່ໄດ້ຮັບຈາກການເສຍເງິນນັ້ນກໍພິມ​ໃສ່​ເຈັ້ຍແບບທຳມະດາດ້ານໜ້າຂອງປີ້ກໍຂຽນວ່າປີ້ເຂົ້າສົ່ງເຄື່ອງ, ມີ ການລະບຸເລກປີ້, ວັນທີ ແລະ ຄຳໝາຍເຫດຂຽນວ່າ: ເຂົ້າສະເພາະສົ່ງຊົ່ວຄາວ, ຫ້າມຈອດຊະຊາຍ ແລະ ຈອດຄ້າງຄືນພາຍ ໃນສະຖານີເທົ່ານັ້ນ, ແຕ່ພະນັກງານຈິກປີ້ບໍ່ໄດ້ຂຽນຮອດເລກທະບຽນລົດຂອງຜູ້ມາໃຊ້ບໍລິການໃສ່ເລີຍ ແລະ ບໍ່ມີຄຳອະທິ

ບາຍຕື່ມໃດໆເມື່ອຜູ້ເຂົ້າໄປ​ໃຊ້​ບໍລິການຫາກເກີດກໍລະນີລົດເສຍຫາຍ ແລະ ການປົກປ້ອງດ້ານອື່ນໆເລີຍ. ດັ່ງນັ້ນກໍໝາຍວ່າ ການເສຍເງິນດັ່ງກ່າວນັ້ນ ແມ່ນເສຍໄປລ້າໆເພາະສັງເກດເຫັນເມື່ອຂີ່ລົດເຂົ້າໄປດ້ານໃນແລ້ວກໍບໍ່ເຫັນຈະມີພະນັກງານຄອຍໃຫ້ ບໍລິການຈັດສັນຄວາມເປັນເປັນລະບຽບຂອງລົດແຕ່ຢ່າງ (ເອົາແຕ່ໃຜຊິຈອດ) ເຊິ່ງມາດຕະການເກັບເງິນແບບນີ້ ແມ່ນການບີບ ຮັດຜູ້ໃຊ້ບໍລິການໂດຍທາງອ້ອມເຫັນແກ່ປະໂຫຍດສ່ວນໂຕ. ສະນັ້ນພາກລັດກ່ຽວຂ້ອງຕ້ອງລົງກວດກາແກ້ໄຂໂດຍໄວເພື່ອບໍ່ ໃຫ້ຜູ້ປະກອບການບີບຮັດເອົາປຽບສັງຄົມຫລາຍກວ່ານີ້.