ສະພາບອຸປະຕິເຫດຕາມທ້ອງຖະຫນົນຍັງບໍ່ມີທ່າຈະຫລຸດລົງ

         ຕາມການລາຍງານຂອງເຈົ້າໜ້າທີ່ພະແນກແກ້ໄຂອຸປະຕິເຫດກົມຕຳຫຼວດຈະລາຈອນໄດ້ໃຫ້ຮູ້ວ່າ: ແຕ່ວັນທີ 4-10 ມີນານີ້ ທົ່ວປະເທດມີອຸປະຕິເຫດເກີດຂຶ້ນທັງໝົດ 127 ກໍລະນີ ສົ່ງຜົນເຮັດໃຫ້ມີຜູ້ເສຍຊີວິດ 17 ຄົນ ທຽບໃສ່ອາທິດຜ່ານ ມາເພີ່ມຂື້ນ 5% ຊຶ່ງອຸປະຕິເຫດທີ່ຮ້າຍແຮງແມ່ນ ລົດປີ້ນເອງໃນວັນທີ 7 ມີນາ  ຢູ່ເຂດ ບ້ານ ທົ່ງມັ່ງເມືອງ ໄຊທານີ ນະຄອນ ຫຼວງວຽງຈັນມີຜູ້ເສຍຊີວິດ 2 ຄົນ, ລົດຈັກຕຳລົດຈັກ ໃນວັນທີ 9 ມີນາ ຢູ່ເຂດບ້ານໂນນສະອາດ ເມືອງໄຊເສດຖານະ ຄອນຫຼວງວຽງຈັນມີຜູ້ເສຍຊີວິດຄາທີ່ 1 ຄົນ, ລົດຈັກຕຳລົດຈັກໃນວັນທີ 6 ມີນາ ເຂດບ້ານກະຊົມເມືອງສາມັກຄີໄຊ ແຂວງ ອັດຕະປືມີຜູ້ເສຍຊີວິດຄາທີ່ 2 ຄົນ ແລະ ອຸປະຕິເຫດທີ່ເກີດຂຶ້ນອື່ນໆໂດຍສາເຫດທີ່ພາໃຫ້ເກີດອຸປະຕິເຫດແມ່ນຍ້ອນ ຜູ້ຂັບຂີ່ຂັບລົດໄວ, ດື່ມສິ່ງມຶນເມົາ ແລະ ສະພາບເຕັກນິກລົດບໍ່ຮັບປະກັນ.

            ເຈົ້າໜ້າທີ່ກົມຕຳຫຼວດຈະລາຈອນ ກ່າວວ່າ: ຈາກສະພາບ ອຸປະຕິເຫດທີ່ເກີດຂຶ້ນຍັງເປັນປາກົດການຫຍໍ້ທໍ້ ແລະ ຕ້ອງເລັ່ງແກ້ໄຂເນື່ອງຈາກເຫັນວ່າສະພາບດັ່ງກ່າວມີທ່າອ່ຽງເພີ່ມຂຶ້ນ. ສະນັ້ນ ຢາກແກ້ໄຂບັນຫາດັ່ງກ່າວເມື່ອບໍ່ດົນມານີ້, ກະ ຊວງປ້ອງກັນຄວາມສະຫງົບໄດ້ເປີດກອງປະຊຸມຄົ້ນຄວ້າຫາທິດທາງເພື່ອແກ້ໄຂຫຼຸດຜ່ອນບັນຫາອຸປະຕິເຫດໂດຍໄດ້ຊີ້ວ່າ:ຕ້ອງເພີ່ມທະວີສຶກສາອົບຮົມສະຕິເຄົາລົບ ແລະ ປະຕິບັດລະບຽບກົດໝາຍໃນສັງຄົມໃຫ້ໜັກແໜ້ນກວ່າເກົ່າໂດຍສະເພາະການ ປະຕິບັດລະບຽບຈະລາຈອນ, ຕ້ອງເພີ່ມຈຳນວນເຈົ້າໜ້າທີ່ຮັກສາຄວາມສະຫງົບກໍຄືເຈົ້າໜ້າທີ່ຈະລາຈອນໃຫ້ພຽງພໍ ແລະ ມີຄຸນນະພາບ ແລະ ຕ້ອງເພີ່ມທະວີກົນໄກປະສານງານລະຫວ່າງພາກສ່ວນກ່ຽວຂ້ອງຕ່າງໆໃຫ້ກົມກຽວ ແລະ ດີຂຶ້ນ.