ນັບແຕ່ກະຊວງສຶກສາທິການ ແລະ ກີລາ ໄດ້ມີແນວທາງນະໂຍບາຍເປີດໂອກາດໃຫ້ພາກເອກະຊົນເຂົ້າມາມີສ່ວນຮ່ວມໃນການພັດທະນາການສຶກສາເປັນ
ຕົ້ນມາ ມີໂຮງຮຽນເອກະຊົນເກີດຂຶ້ນຫຼາຍແຫ່ງ, ຜູ້ລົງທຶນມີທັງຈາກພາຍໃນ ແລະ
ຕ່າງປະເທດ, ເຮັດໃຫ້ຄູຫຼາຍຄົນອອກໄປສິດ ສອນຢູ່ໂຮງຮຽນເອກະຊົນ ເພາະມີລາຍຮັບທີ່ດີກວ່າ
ສົ່ງຜົນໃຫ້ໂຮງຮຽນປະຖົມສົມບູນບາງແຫ່ງໃນນະຄອນຫຼວງວຽງຈັນ ມີຈຳນວນນັກຮຽນບໍ່ເຖິງ
10 ຄົນ ຍ້ອນຂາດຄວາມສົນໃຈຈາກສັງຄົມ.
ທ່ານ ຄຳຈັນ ແກ້ວວົງສາ ຜູ້ອຳນວຍການໂຮງຮຽນປະຖົມສົມບູນ
ສີສັງວອນ ເມືອງ ໄຊເຊດ ຖາ ນະຄອນຫຼວງວຽງຈັນ ກ່າວ ວ່າ: ປັດຈຸບັນມີຈຳນວນນັກ ຮຽນທີ່ກຳລັງນັ່ງຮຽນຢູ່ໂຮງ
ຮຽນຂອງຕົນ ພຽງ 6 ຄົນ ແລະ ມີຄູສອນ 2 ຄົນ ໃນນັ້ນ ຫ້ອງ ປ.4 ມີຈຳນວນນັກຮຽນທັງໝົດພຽງ
4 ຄົນ, ຫ້ອງ ປ.2 ແລະ ປ.3 ຫ້ອງລະ 1 ຄົນ. ຫຼຸດລົງ 4 ຄົນເມື່ອທຽບໃສ່ຕົ້ນປີ ແລະ
6 ຄົນ ເມື່ອທຽບໃສ່ສົກປີຜ່ານມາ ດັ່ງນັ້ນ ທາງໂຮງຮຽນຈຶ່ງໄດ້ລວມເອົາຫ້ອງ ປ.2
ແລະ ປ.3 ເຂົ້າຮຽນນຳກັນ ໂດຍຄູ, ອາ ຈານ ແລະ ນັກຮຽນທັງໝົດໃນໂຮງຮຽນຈະຢູ່ຮ່ວມກັນແບບຄອບຄົວ
ເຊິ່ງ ບັນຍາ ກາດການຮຽນ, ການສອນໃນໂຮງຮຽນນີ້ ອາດບໍ່ຄືໃຜ ແລະ ບໍ່ມີໃຜຄື.
ໂຮງຮຽນດັ່ງກ່າວ ຖືວ່າເປັນໂຮງຮຽນທີ່ສ້າງຂຶ້ນມາເປັນເວລາດົນນານ,
ໃນເມື່ອກ່ອນເຄີຍມີນັກຮຽນຫຼັ່ງໄຫຼກັນເຂົ້າມາຮຽນຢ່າງເປັນຂະບວນ, ແຕ່
4 - 5 ປີມານີ້ ຈຳນວນຄູ, ອາຈານ ແລະ ນັກຮຽນໄດ້ຫຼຸດໜ້ອຍຖອຍລົງ ສົ່ງຜົນໃຫ້ໂຮງຮຽນປະ
ຖົມສົມບູນແຫ່ງນີ້ ມີຫ້ອງຮຽນບໍ່ເຖິງ 5 ຫ້ອງ, ຈຳນວນນັກຮຽນບໍ່ເຖິງ 10 ຄົນ ແລະ
ບາງຫ້ອງມີນັກຮຽນພຽງແຕ່ 1 ຄົນ ໃນປັດ ຈຸບັນ.
ຜູ້ອຳນວຍການຍັງກ່າວອີກວ່າ: ເຫດຜົນທີ່ເຮັດໃຫ້ຈຳນວນນັກຮຽນນັບມື້ນັບຫຼຸດໜ້ອຍຖອຍລົງນັ້ນ
ຍ້ອນຂາດຄວາມສົນໃຈ ຈາກສັງຄົມ, ນັກຮຽນຫຼາຍຄົນຫັນໄປຮຽນຢູ່ໂຮງຮຽນເອກະຊົນ
ປະກອບກັບໂຮງຮຽນດັ່ງກ່າວບໍ່ໄດ້ຮັບການສ້ອມແປງມາເປັນເວລາຫຼາຍປີ ຍ້ອນຂາດເຂີນງົບ
ປະມານ, ແຕ່ກໍບໍ່ມີພາກ ສ່ວນໃດຍື່ນມືເຂົ້າມາຊ່ວຍ ເຊິ່ງໃນໄລຍະຜ່ານມາ ໂຮງ
ຮຽນກໍເຄີຍສະເໜີໃຫ້ພາກສ່ວນທີ່ກ່ຽວຂ້ອງ ແລະ ເມືອງກໍເຄີຍລົງມາກວດກາເບິ່ງສະພາບການຮຽນ,
ການສອນຢູ່ໂຮງຮຽນດັ່ງກ່າວແລ້ວຫຼາຍຄັ້ງ ແຕ່ກໍບໍ່ໄດ້ໃຫ້ການຊ່ວຍເຫຼືອງົບ
ປະມານໃນການປັບປຸງແຕ່ຢ່າງໃດ ເພາະມີຈຳນວນນັກຮຽນໜ້ອຍ ແລະ ເທົ່າທີ່ໄດ້ໃຫ້ການຊ່ວຍເຫຼືອນັ້ນກໍມີແຕ່ອຸປະກອນນການຮຽນບາງຢ່າງເທົ່ານັ້ນ.
ນອກນັ້ນ, ການລະດົມທຶນສົມ ທົບຈາກຊາວບ້ານກໍຄືພໍ່ແມ່ຜູ້ປົກ ຄອງກໍເຫັນວ່າມີຄວາມຫຍຸ້ງ
ຍາກ ຫາກອຳນາດການປົກຄອງບ້ານບໍ່ໃຫ້ຄວາມຮ່ວມມືກໍເປັນໄປໄດ້ຍາກ ຫຼື ແມ່ນແຕ່ການລະດົມແຮງງານອະນາໄມເດີ່ນໂຮງຮຽນກໍບໍ່ມີໃຜສົນໃຈ.
ປັດຈຸບັນໂຮງຮຽນດັ່ງກ່າວຖືກເປ່ເພ ແລະ ຊຸດໂຊມລົງ
ເພາະສ້າງຂຶ້ນມາເປັນເວລາຫຼາຍປີແລ້ວ, ແຕ່ບໍ່ໄດ້ຮັບການສ້ອມແປງ ຊ້ຳບໍ່ຫນຳໄລຍະຜ່ານມາ
ກໍມີເຈົ້າໜ້າທີ່ຈຳນວນໜຶ່ງມາພັກຢູ່ໃນໂຮງຮຽນດັ່ງກ່າວ ເຊິ່ງບາງຄັ້ງພະນັກງານບາງຄົນກໍຕາກເຄື່ອງຊະຊາຍ
ຈົນເຮັດໃຫ້ສະພາບໂຮງຮຽນທີ່ບໍ່ຈົບງາມຢູ່ແລ້ວ ຍິ່ງເຮັດໃຫ້ເສື່ອມສະພາບລົງ.
ເພື່ອເຮັດໃຫ້ສະພາບໂຮງຮຽນຄືນສູ່ປົກກະຕິ
ແລະ ດຶງດູດເອົາຄວາມສົນໃຈຈາກສັງຄົມ, ຜູ້ອຳນວຍການຮຽກ ຮ້ອງມາຍັງສັງຄົມ ແລະ
ການ ຈັດຕັ້ງທີ່ກ່ຽວຂ້ອງຈົ່ງໃຫ້ການຊ່ວຍເຫຼືອ ແລະ ສະໜັບສະໜູນຕໍ່ການປັບປຸງໂຮງຮຽນດັ່ງ
ກ່າວ ທັງຮຽກຮ້ອງມາຍັງການ ຈັດຕັ້ງທີ່ກ່ຽວຂ້ອງຈົ່ງເຫັນຄວາມຈຳເປັນ ແລະ ຄວາມສຳ
ຄັນຂອງການພັດທະນາການສຶກສາ.
No comments:
Post a Comment