laophatthananewspaper: ເຮັດແນວໃດໃຫ້ເດັກນ້ອຍລາວຮຽນຮູ້ໄວຂຶ້ນ

ການຮຽນຮູ້ຂອງເດັກຕ້ອງມີການສົ່ງເສີມ ແລະ ມີຮູບແບບສື່ການສອນທີ່ມີຄຸນນະພາບເພື່ອສ້າງຄວາມສາອາດມາດຂອງເດັກໄດ້ພັດທະນາໄວຂື້ນ ໂດຍສະເພາະການອ່ານ, ຂີດຂຽນ ແລະ ການຄົ້ນຄິດ. ຊຶ່ງຢູ່ລາວ ຍັງຖືວ່າ ການຮຽນຮູ້ຂອງເດັກຍັງຊ້າກ່ວາບັນດາປະເທດສະມາຊິກອາຊຽນ ແລະ ເປັນສິ່ງທ້າທາຍທີ່ ສປປ ລາວ ຈະເຂົ້າເປັນປະຊາຄົມເສດຖະກິດອາຊຽນໃນປີ 2015.

ທ່ານ ນາງ ດາຣາວັນ ສູລິສັກ ຜູ້ອຳນວຍການໂຮງຮຽນອາ ນຸບານ ດາລາ ໄດ້ໃຫ້ສຳພາດຕໍ່ ນັກຂ່າວລາວພັດທະນາ ເນື່ອງໃນໂອກາດສັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ ທີ່ຈະມາຮອດນີ້ວ່າ: ການພັດທະນາເດັກຖືແມ່ນວຽກງານທີ່ມີຄວາມສຳຄັນ ເພື່ອພັດທະນາປະເທດຊາດ. ຖ້າເດັກໄດ້ຮັບການພັດ ທະນາ ແລະ ຊຸກຍູ້ສົ່ງເສີມທີ່ດີຈະເຮັດໃຫ້ເດັກນ້ອຍລາວພັດທະນາໄປໄດ້ໄກ ຊຶ່ງຕ້ອງໄດ້ໃຫ້ໂອກາດ ແລະ ຄວາມເອົາໃຈໃສ່ຕໍ່ເດັກໂດຍ ການສ້າງພື້ນຖານການຮຽນຮູ້ຂອງເດັກແຕ່ໃນຊັ້ນອານຸບານ ຕ້ອງໃຫ້ໄດ້ຮູ້ຄິດໂດຍການສຶກສາຕ້ອງໄດ້ຕິດພັນກັບສະພາບແວດລ້ອມ ຊຶ່ງຈະເປັນພື້ນຖານໃຫ້ເດັກ ນ້ອຍມີຄວາມສາມາດໄດ້ສະແດງອອກ ແລະ ທັງດ້ານການອ່ານ ແລະ ການຂີດຂຽນ ກ່ອນທີ່ຈະໄດ້ເຂົ້າຮຽນໃນຊັ້ນປະຖົມ.

ແນວໃດກໍຕາມ ໃນຜ່ານມາຍັງເຫັນວ່າ ການສອນໃນຊັ້ນອານຸບານຂອງເຮົາ ຍັງບໍ່ທັນທຽບຄຽງກັບປະເທດສະມາຊິກອາຊຽນ ໂດຍສະເພາະແມ່ນຮູບແບບຕຳລາການສິດສອນຍັງບໍ່ທັນມີ ຊຶ່ງຈຳເປັນຕ້ອງໄດ້ນຳເອົາຄວາມຮູ້ຈາກສາ ກົນ ແລະ ປະເທດໃກ້ຄຽງມາດັດປັບເພື່ອເຮັດໃຫ້ເດັກໄດ້ຮຽນຮູ້ໄວຂື້ນ.

ທ່ານ ນາງ ດາຣາວັນ ກ່າວວ່າ: ໂຮງຮຽນອານຸບານ ດາຣາ ໄດ້ເລີ່ມດຳເນີນການເຄື່ອນໄຫວແຕ່ ສົກປີ 2003-2004 ເປັນໂຮງ ຮຽນທີ່ມີແຕ່ຊັ້ນອະນຸບານຄື: ອບ 1, ອບ 2 ແລະ ອບ 3 ທີ່ຮັບລ້ຽງເດັກແຕ່ ອາຍຸ 3 ປີ ເຖີງ 5 ປີ, ປັດຈຸບັນມີຫ້ອງຮຽນທັງໝົດ 7 ຫ້ອງ, ມີຄູສອນ 14 ຄົນ ແລະ ມີນັກຮຽນ 200 ກ່ວາຄົນ ທີ່ພວມຮຽນຢູ່ຊຶ່ງເປັນອີກສະຖານທີ່ແຫ່ງໜຶ່ງໃນການສົ່ງເສີມພັດທະນາເດັກ ໂດຍໂຮງຮຽນໄດ້ມີເປົ້າ ໝາຍໃຫ້ເດັກພັດ ທະນາດ້ານສະຕິປັນຍາໄວຂື້ນ ຄື: ໄດ້ມີໂຄງການເວທີຂອງຫຼານ, ໂຄງການເຝີກນ້ອງໃຫ້ໄວຂື້ນ, ໂຄງການຮັກການອ່ານ, ນອກນັ້ນ ຍັງມີໂຄງການເຂົ້າຮ່ວມແຂ່ງຂັນກິລາ-ສິລະປະນັກຮຽນ,ໂຄງການ ທັດສະນະສຶກສາຂອງຄູ ແລະ ນັກ ຮຽນ ແລະ ອື່ນໆເພື່ອສົ່ງເສີມເດັກ ໃຫ້ ໄດ້ຮຽນຮູ້ກັບຕົວຈິງ ຊຶ່ງຈະ ຊ່ວຍເຮັດໃຫ້ເດັກພັດທະນາໄວ ແລະ ສິ່ງສຳຄັນອີກຢ່າງໜຶ່ງແມ່ນ ໂຮງຮຽນໄດ້ເອົາໃຈໃສ່ທີ່ສຸດກໍຄືການສຶກສາອົບຮົມນັກຮຽນໃຫ້ມີຄຸນສົມບັດ, ຮັກສາຮີດ ຄອງປະເພນີອັນດີງາມຂອງຊາດເຊັ່ນ: ການເວົ້າຈາ ແລະ ສະແດງຄວາມກ້າຫານຄວາມສາມາດໃຫ້ເດັກໄດ້ຄິດໄດ້ສະແດງອອກ.

ທ່ານ ນາງ ດາຣາວັນ ໃຫ້ທັດສະນະວ່າ: ການພັດທະນາເດັກນ້ອຍລາວ ແມ່ນມີຄວາມສາມາດ ແລະ ຮຽນ ຮູ້ໄວ, ແນວໃດກໍດີທຽບໃສ່ປະເທດໃກ້ຄຽງ ແລະ ປະເທດສະມາຊິກອາຊຽນ ແມ່ນຍັງຕ່ຳກ່ວາບັນດາປະເທດດັ່ງ ກ່າວຊຶ່ງຍ້ອນຮູບແບບຕຳລາການສອນໃນຊັ້ນອານຸບານຍັງບໍ່ທັນມີເປັນລະບົບ ແລະ ອີກບັນ ຫາໜຶ່ງກໍຍ້ອນຜູ້ປົກ ຄອງຈຳນວນ ໜຶ່ງຍັງບໍ່ໃຫ້ຄວາມສຳຄັນຕໍ່ການສຶກສາ ແລະ ແນະນຳໃຫ້ເດັກໄດ້ຮຽນຮູ້ ແລະ ບໍ່ໃຫ້ມີການຄົ້ນຄິດ, ຊຶ່ງອາໃສແຕ່ໂຮງຮຽນເປັນຜູ້ແນະນຳສິດສອນເທົ່ານັ້ນ ຊຶ່ງສິ່ງນີ້ຈະເຮັດໃຫ້ເດັກຂາດການພັດ ທະນາຢ່າງຕໍ່ເນື່ອງທາງດ້ານການຄົ້ນຄິດ, ການຂີດຂຽນ ແລະ ການອ່ານ ເປັນສາເຫດເຮັດໃຫ້ເດັກມີການພັດທະນາຊ້າກ່ວາເກນອາຍຸ.