ສະຖາບັນການເງິນຂະໜາດນ້ອຍກຽມຮັບມື AEC

      ຍັງອີກບໍ່ເທົ່າໃດປີ,ການກ້າວ ເຂົ້າ ສູ່ປະຊາຄົມເສດຖະກິດອາ ຊຽນ (AEC) 2015 ກໍຈະເປີດຂຶ້ນ ແລະ ເວລານັ້ນເສດ ຖະກິດ ຂອງ ບັນດາປະເທດອາຊຽນຈະ ເປັນຕະຫລາດອັນໝຶ່ງອັນດຽວ ແລະ ສະຖາບັນການເງິນຂະໜາດນ້ອຍກໍແມ່ນຫົວ ໜ່ວຍທຸລະກິດ ໜຶ່ງທີ່ຈະມີການແຂ່ງຂັນສູງຂຶ້ນ.

          ທ່ານ ສົມພອນ ສີແສງລັດ ອຳນວຍການສະຖາບັນການເງິນ ຈຸລະພາກ ອີເອັມໄອ (EMI) ໃຫ້ສຳພາດຕໍ່ນັກຂ່າວ ໜັງສືພິມລາວ ພັດທະນາ ເມື່ອບໍ່ດົນມານີ້ວ່າ: ສະ ຖາບັນການເງິນຈຸລະພາກແມ່ນ ຫົວໜ່ວຍທຸລະກິດໜຶ່ງທີ່ຈະມີ ການແກ່ງ ແຍ້ງແຂ່ງຂັນກັນສູງພໍສົມຄວນ ເມື່ອກ້າວສູ່ການເປັນ ປະຊາຄົມເສດຖະກິດອາຊຽນໃນ ປີ 2015 ເນື່ອງຈາກວ່າ ຄວາມຕ້ອງ ການແຫລ່ງທຶນເພື່ອນຳໃຊ້ເຂົ້າໃນການປະກອບ ທຸລະກິດ, ການຜະລິດຕ່າງໆ ຂອງປະຊາຊົນ ເພື່ອພັດທະນາຊີວິດການ ເປັນ ຢູ່ຈະມີສູງຂຶ້ນ, ດັ່ງນັ້ນ ຈະເຮັດໃຫ້ສະຖາບັນການ ເງິນຈຸລະພາກຈາກຕ່າງປະເທດທີ່ມີຄວາມເຂັ້ມແຂງດ້ານຖານະການເງິນ ແລະ ມີປະສົບການຫລາຍເຂົ້າ ມາມີບົດບາດຫລາຍ ໃນການດຳເນີນທຸລະກິດຢູ່ປະເທດເຮົາຢ່າງແນ່ນອນ.

      ທ່ານ ສົມພອນ ກ່າວວ່າ:ເພື່ອກຽມພ້ອມຮັບມືກັບການແຂ່ງຂັນດັ່ງກ່າວ ສະຖາບັນການເງິນພວກເຮົາ ຈຶ່ງເລັ່ງໃສ່ການ ຕອບສະໜອງແຫລ່ງເງິນໃຫ້ລູກຄ້າຢ່າງເໝາະສົມ, ຍົກສູງຄຸນນະພາບຂອງການບໍລິການ ແລະ ຍົກລະດັບຄວາມຮູ້ຄວາມ ສາມາດຂອງພະນັກງານທັງຢູ່່ພາຍໃນ ແລະ ຕ່າງປະເທດຢ່າງເປັນປະຈຳເພື່ອໃຫ້ສາມາດເຊື່ອມໂຍງກັບອົງການດ້ານການ ເງິນຈຸລະພາກທັງພາຍໃນ ແລະ ສາກົນ.

      ປັດຈຸບັນ ສະຖາບັນການ ເງິນ ຈຸລະພາກ ອີເອັມໄອ ມີ 7 ໜ່ວຍ ບໍລິການ ແລະ 2 ໜ່ວຍ ບໍລິການ ຍ່ອຍ ຢູ່ນະຄອນ ຫລວງວຽງຈັນ ແລະ ແຂວງວຽງຈັນ,ມີພະນັກ ງານ 70 ກວ່າຄົນ,ມີລູກຄ້າປະ ມານ 12 ພັນກວ່າຄົນ,ໃນນັ້ນມີລູກຄ້າເງິນ ກູ້ຫລາຍກວ່າ 4 ພັນ ກວ່າຄົນ ແລະ ມີວົງເງິນກູ້ປະ ມານ 4 ລ້ານກີບຕໍ່ບັນຊີ ແລະ ຄາດວ່າຮອດປີ 2015ສະຖາບັນດັ່ງກ່າວ ຕັ້ງເປົ້າຈະໃຫ້ມີລູກຄ້າເພີ່ມຂຶ້ນຫລາຍກວ່າ 40 ພັນຄົນ.

      ຕາມການລາຍງານຂອງ ທະນາຄານແຫ່ງ ສປປ ລາວ ໃຫ້ຮູ້ວ່າ:ປັດຈຸບັນ ຢູ່ລາວມີ ສະ ຖາບັນການເງິນຈຸລະພາກ 13 ຫົວໜ່ວຍ ແລະ ປະເພດກອງທຶນ ຕ່າງໆອີກປະມານ 40 ກວ່າແຫ່ງ.