ເກັບກຸ້ງ ເກັບປາຊິວ ຕາມເສັ້ນທາງ ( ຄໍລຳ ບັນຫາຈານແຍ່ )

ໂດຍ : ວິເສດ ສະແຫວງສຶກສາ

         ສຳລັບຜູ້ໄປຕາມທາງມາຕາມທາງໃນນະຄອນຫລວງ ກໍຄືເມືອງໃຫຍ່ໆທົ່ວປະເທດຄົງຮູ້ແກ່ໃຈດີເລື່ອງຄວາມແອອັດ ຍັດບຽດຂອງຖະໜົນຫົນທາງ ຍ້ອນການເພີ່ມຂຶ້ນຂອງຍວດຍານພາຫະນະ. ສະເພາະຜູ້ທີ່ເຮັດໜ້າທີ່ເປັນເຈົ້າຂອງພວງມະໄລ ຫລື ຈັບເຂົາລົດເອງຍິ່ງຈະເຂົ້າໃຈບັນຫາດີ. ຈານແຍ່ເອງ ເມື່ອຫລາຍປີກ່ອນໄດ້ສະຫລອກກອກຊອກແຕ່ງຄຳຂວັນເຕືອນສະ ຕິນັກຂັບຂີ່ຂຶ້ນແຖວໜຶ່ງ ມັນເປັນປະໂຫຍກຄຳເວົ້າອ່າວຮຸນແຮງ. ອາດເປັນຍ້ອນແນວນີ້ບໍ? ຫລາຍຄົນຈຶ່ງໄດ້ແຕ່ຟັງ ແລະ ງຶກ ຫົວຮັບ ແຕ່ບໍ່ກ້າເອົານຳໃຊ້ ເຄີຍຄິດຢູ່ໃນໃຈວ່າຊິເວົ້າໃຫ້ຜູ້ຫລັກຜູ້ໃຫຍ່ທີ່ກ່ຽວຂ້ອງຟັງ, ດີບໍ່ດີ ອາດມີຜູ້ເອົາໄປເວົ້າຕໍ່ຄຳຂວັນ ເຕືອນສະຕິທີ່ແຕ່ງເອງນັ້ນເວົ້າ ວ່າ“ ຂັບດີໄດ້ພວງມາໄລ-ຂັບຈັງໄຮໄດ້ພວງມາລາ” ຄຳຂວັນນີ້ ຈານແຍ່ບໍ່ສະຫງວນລິຂະສິດ, ທຸກຄົນສາມາດຝຶກ ຫລື ປ່ຽນແປງ ຄຳເວົ້າໃຫ້ເໝາະສົມເຊັ່ນ: ອາດເປັນ “ຂັບດີໄດ້ພວງມະໄລ-ຂັບໄວໄດ້ພວງມາລາ” ຄວາມ ໝາຍທ່ອນສຸດທ້າຍໃນຄຳຂວັນນີ້ບໍ່ບອກທ່ານກໍຄົງແປອອກເອງວ່າ: ຖ້າໃຜຂັບຈັງໄຮ ຫລື ຂັບໄວແນ່ນອນ ຈະໄດ້ໄປເມືອງ ໄກ່ບໍ່ຂັນ.

    ຈານແຍ່ດຽວນີ້ ເປັນເຈົ້າພວງມາໄລເອງ ແຕ່ກ່ອນເຄີຍຄຶງເຂົາລົດຈັກ 3 ປີ ເຂົາລົດຖີບ 6 ປີ ນີ້ ເວົ້າສະເພາະແຕ່ໃນຊີວິດ ພະນັກງານເທົ່ານັ້ນ. ຈະເປັນພວງມາໄລ, ເຂົາລົດຈັກ, ເຂົາລົດຖີບ ສິ່ງທີ່ເຫັນຕຳຕາຕາມເສັ້ນທາງນັ້ນກໍບໍ່ມີການປ່ຽນແປງ, ດັ່ງນັ້ນຄວາມຮູ້ສຶກຈຶ່ງຍັງເໝືອນເດີມ. ຄຳຖາມ ແລະ ຄຳຕອບທີ່ຖາມເອງຕອບເອງນັ້ນ ກໍຍັງຄືເກົ່າຈົນຮອດຊູ່ມື້ນີ້ ເຊັ່ນເວລາ ມີງານສຳຄັນພວກເຮົາກໍມັກຈະເຫັນປ້າຍສະແດງຄວາມຊົມເຊີຍປັກເປັນແຖວຢູ່ຫລັກເສົາໄປຕາມຖະໜົນເສັ້ນສຳຄັນພິເສດ ແມ່ນຕາມຖະໜົນລ້ານຊ້າງ. ນອກຈາກຄຳເວົ້າຊົມເຊີຍ ແລ້ວກໍມີແຖວປະໂຫຍກບົ່ງບອກບໍລິສັດ-ຫ້າງຮ້ານທີ່ລົງທຶນເຮັດ ປ້າຍ.

           ເລື່ອງການປັກປ້າຍ ຫລື ແຜ່ນໂຄສະນາຫັ້ນດີແລ້ວ, ແຕ່ຈານແຍ່ສົນໃຈວ່າປ້າຍຊະນິດດຽວ ເນື້ອໃນອັນດຽວເຫດ ໃດວ່າຕິດຖີ່ກັນເອົາແທ້ເອົາວ່າຈົນຄົບທຸກຫລັກດອກໄຟ ຫລື ຍ້ອນວ່າ ແຜ່ນປ້າຍໂຄສະນາເຫລົ່ານັ້ນ ເປັນເຄື່ອງປະດັບໄປໃນ ໂຕຊັ້ນບໍ? ຈານແຍ່ສັງເກດເຫັນວ່າເມື່ອແຜ່ນປ້າຍໂຄສະນາເຫລົ່ານັ້ນຖືກລົມພັດພວກມັນກໍ່ກວັດແກວ່ງບັງຕາຄົນໃຊ້ລົດໃຊ້ ຖະໜົນໄດ້ຄືກັນ.

         ບັນໄດຕໍ່ໄປແມ່ນເລື່ອງ ຄຳຂວັນ ສະເພາະໂຕ ແຕ່ເຂົາເອົາ ໄປຕິດໄວ້ທ້າຍລົດໃຫ້ຄົນອື່ນໄດ້ອ່ານ ຖ້າເປັນຄຳຂວັນເຕືອນ ສະຕິຄືຢູ່ບາງປະເທດນັ້ນ ກໍຄຶຈະເປັນ ປະໂຫຍດ ເຊັ່ນ: ຈານແຍ່ເຫັນປະ ໂຫຍກໜຶ່ງຕິດກົ້ນລົດເວລາທ່ຽວ ເສັ້ນທາງຢູ່ນະ ຄອນຫລວງນິວເດລີ ອິນເດຍ ຄຳຂວັນໜ້າຄິດນັ້ນ ຂຽນວ່າ“ຖ້າທ່ານຢາກບໍລິຈາກ ເລືອດ ຢ່າບໍລິຈາກຢູ່ກາງຖະໜົນ”. ຄຳເວົ້າ ທີ່ອ່ານແລ້ວບາດໃຈໃນທ້າຍລົດທີ່ມັກຈະເຫັນຢູ່ບ້ານເຮົານັ້ນ ສ່ວນໃຫຍ່ມີເນື້ອໃນເລື່ອງ ແສ້ໆ ສາວໆ, ເລື່ອງຖ້າທາຍໃນ ການ ຂັບຂີ່ ເຊັ່ນ: ຫ້າມແຊງຫ້າມ “ຊິ້ງ” ໜັກໄປກວ່ານັ້ນ ກໍແມ່ນຄຳເວົ້າຂອງນັກເລງ. ລົດບາງຄັນຕິດສະຕິກເກີ້ຄຳເວົ້າລາມົກເປັນ ພາສາອັງກິດ ເຊັ່ນຄຳເວົ້າທີ່ມີຕົວອັກ ສອນ 4 ໂຕ ຂຶ້ນຕົ້ນດ້ວຍໂຕ F ແລະ ລົງທ້າຍດ້ວຍໂຕ K ( ຂໍໃຫ້ຜູ້ອ່ານຊອກເອົາເອງ) ມີເນື້ອໃນບາງສະຕິກເກີ້ນັ້ນ ຈຳໃຫ້ຄົນອື່ນຈູບໄສ້ສຸດຂອງຕົນ. ຈານແຍ່ຈຶ່ງຢາກຖາມວ່າ ເລື່ອງນີ້ຄວນຈະແກ້ໄຂຫລືບໍ່ ? ເພື່ອພາບພົດຂອງປະເທດຊາດ.

          ບັນຫາສຸດທ້າຍທີ່ສົນໃຈ ແມ່ນການຕິດສະຕິກເກີ້ທີ່ມີຄຳວ່າ “LAO” ຢູ່ລົດຕາມຊາບສະຕິກເກີ້ນີ້ ຕິດເວລາຂ້າມໄປ ຝັ່ງໄທແມ່ນພາກສ່ວນປະກັນໄພລົດເປັນຜູ້ຕິດ. ການຕິດຊື່ປະເທດແນວນີ້ ປະເທດໃດເຂົາກໍເຮັດ ໂດຍສະເພາະແມ່ນລົດທີ່ ແລ່ນຜ່ານຊາຍແດນແຕ່ທີ່ສົນໃຈແມ່ນບ່ອນຕິດ ຄຳວ່າ “LAO” ນັ້ນ ບໍ່ເປັນເອກະພາບລົດບາງຄັນຕິດຢູ່ກ້ຳຂວ້າດ້ານຫລັງ, ບາງ ຄັນຕິດຢູ່ກ້ຳຊ້າຍ, ບາງຄັນຕິດດ້ານໜ້າ, ມີບາງຄັນເອົາໄປຕິດໄວ້ຕ່ຳໆໃກ້ໆເລກທະບຽນລົດ. ສະຕິກເກີ້ຊື່ “LAO” ໝາຍເຖິງ ປະເທດຊາດ ດັ່ງນັ້ນຄວນກຳນົດບ່ອນຕິດໃຫ້ເໝາະສົມ ແລະ ເປັນເອກກະພາບ ບໍ່ແມ່ນຊິປ່ອຍໃຫ້ຕິດແບບນັກເລງຕາມໃຜ ຕາມລາວ.

       ຈານແຍ່ບໍ່ແນ່ວ່າມື້ໜ້າອາດຈະມີແນວໃໝ່ໃຫ້ຕຳຕາຕື່ມຢູ່ທ້ອງຖະນົນ, ແນວໃໝ່ທີ່ວ່ານີ້ ອາດບາດຕາບາດໃຈກວ່າເກົ່າ ຖ້າບໍ່ກຳຈັດແຕ່ດຽວນີ້.