ໜຶ່ງໃນວຽກສຳຄັນຂອງກະຊວງຍຸຕິທຳ
ທີ່ຈະສືບຕໍ່ປະຕິບັດໃຫ້ມີປະສິດທິພາບໃນຕໍ່ໜ້າແມ່ນການກວດກາປະຕິ ບັດໜ້າທີ່ຂອງພະນັກງານ
ເພາະຖ້າພະນັກງານມີຈັນຍາບັນ ແລະ ປະຕິບັດໜ້າທີ່ດ້ວຍຄວາມສັດຊື່ດີ ກໍຈະເຮັດໃຫ້ສັງຄົມເຊື່ອໝັ້ນຕໍ່ລະບົບຄວາມຍຸຕິທຳຂອງເຮົາ
ຫລາຍຂຶ້ນ ແລະ ໃນໄລຍະຜ່ານມາ,ກະຊວງຍຸຕິທຳກໍໄດ້ມີການຍົກຍ້າຍ ແລະ ໃສ່ວິໄນພະນັກງານຫລາຍຄົນທີ່ມີພຶດຕິກຳການປະພຶດຕົນບໍ່ເໝາະສົມ
ແລະ ສ້າງຄວາມເສື່ອມເສຍຕໍ່ບົດບາດຂອງພະນັກງານລັດ.
ທ່ານ ດຣ ຈະເລີນ ເຢຍ ປາວເຮີ ລັດຖະມົນຕີວ່າການກະຊວງຍຸຕິທຳ
ໃຫ້ຮູ້ເມື່ອບໍ່ດົນນີ້ວ່າ:ໃນຕໍ່ໜ້ານີ້ຈະສືບຕໍ່ເນັ້ນໃສ່ການສຶກສາອົບຮົມແນວຄິດຂອງພະນັກງານ
ໂດຍສະພາະແມ່ນຜູ້ເຮັດໜ້າທີ່ປະຕິບັດຄຳຕັດສີນຂອງສານ ໃຫ້ມີຄວາມໜັກແໜ້ນ,
ເຂັ້ມແຂງ, ມີທັດສະນະຄຸນທາດການເມືອງໜັກແໜ້ນ ແນໃສ່ຮັບ ປະກັນການປະຕິບັດໜ້າທີ່ໃຫ້ມີຈັນຍາບັນ,
ວ່ອງໄວ, ຖືກຕ້ອງ, ເຂັ້ມງວດ ແລະ ສັກສິດ ໂດຍຈະສຸມໃສ່ກວດກາການປະຕິບັດໜ້າ
ທີ່ຂອງພະນັກງານ ແລະ ເດັດຂາດປະຕິ ບັດວິໄນຕໍ່ຜູ້ມີຄວາມຜິດ ເຊັ່ນ:ປະຕິບັດວຽກງານຊັກຊ້າໂດຍບໍ່ມີເຫດຜົນ,
ລະເມີດຄຳສັ່ງຂອງຂັ້ນເທິງ, ສວຍໃຊ້ອຳນາດ, ໜ້າທີ່, ຕຳແໜ່ງເພື່ອຜົນປະໂຫຍດສ່ວນໂຕ,
ໃຊ້ອຳນາດເກີນຂອບເຂດ ລວມໄປເຖິງການປະລະໜ້າທີ່ຕ່າງໆໂດຍຈະເລີ່ມຈາກການກ່າວເຕືອນຕາມຄວາມເໝາະສົມ
ແລະ ຖ້າຫາກພົບວ່າການກະທຳທີ່ບໍ່ດີຄືດັ່ງກ່າວໄດ້ສົ່ງຜົນກະທົບສ້າງຄວາມເສຍຫາຍຕໍ່ວັດຖຸ,
ຊັບສີນຂອງບຸກຄົນ ຫລື ອົງການຈັດຕັ້ງກໍຈະປະຕິບັດວິໄນຕາມລະບຽບກົດໝາຍຢ່າງເຂັ້ມງວດ.
ລັດຖະມົນຕີວ່າການກະຊວງຍຸຕິທຳ ໃຫ້ຮູ້ວ່າ:ພະນັກງານຈັດຕັ້ງປະຕິບັດຄຳຕັດສີນຂອງສານໃນທົ່ວປະເທດປັດຈຸ
ບັນ ມີ 400 ກວ່າຄົນ, ໃນນັ້ນຢູ່ຂັ້ນແຂວງມີ180 ກວ່າຄົນ, ຂັ້ນເມືອງ 200 ກວ່າຄົນ,
ແຂວງທີ່ມີພະນັກງານຫລາຍກວ່າໝູ່ແມ່ນນະຄອນຫລວງວຽງຈັນ ແລະ ໜ້ອຍກວ່າໝູ່ຢູ່ແຂວງບໍ່ແກ້ວ
ແລະ ອຸດົມໄຊ ມີພຽງ 6 ຄົນ ເຊິ່ງເຫັນວ່າບໍ່ພຽງພໍກັບ ຄວາມຮຽກຮ້ອງຕ້ອງການຕົວຈິງຂອງວຽກງານ.
ປັດຈຸບັນ, ຈຳນວນຄຳຕັດສີນຂອງສານທີ່ໃຊ້ໄດ້ເດັດຂາດພວມຈັດຕັ້ງປະຕິບັດ
ແລະ ບໍ່ສາມາດປະຕິບັດໄດ້ມີທັງໝົດ 11 ພັນກວ່າເລື່ອງ,ໃນນີ້ຄະດີແພ່ງມີ 4
ພັນກວ່າເລື່ອງ ແລະ ຄະດີອາຍາເກືອບ 7 ພັນເລື່ອງ. ໃນນັ້ນພວມຈັດຕັ້ງປະຕິບັດ 8
ພັນກວ່າເລື່ອງ,ເທົ່າກັບ 73% ແລະ ຄະດີທີ່ບໍ່ສາມາດຈັດຕັ້ງປະຕິບັດມີເກືອບ
3 ພັນເລື່ອງ ເທົ່າກັບ 23% ຂອງຈຳ ນວນຄຳຕັດສີນຂອງສານທີ່ໃຊ້ໄດ້ຢ່າງເດັດຂາດ
ໂດຍຄະດີສ່ວນຫລາຍແມ່ນຕັດສີນຖືກຕາມຂັ້ນຕອນ ແລະ ມີຈຳນວນໜຶ່ງກໍບໍ່ປະ ຕິບັດຕາມຂັ້ນຕອນຂອງກົດໝາຍ
ແລະ ຕ້ອງໄດ້ແກ້ໄຂຄືນໃໝ່.
ລັດຖະມົນຕີກະຊວງຍຸຕິທຳ ກ່າວວ່າ: ຜ່ານມາ,ເຖິງວ່າໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານໃນຂົງເຂດຕົນຢ່າງເປັນປົກກະຕິ,ແຕ່ຍັງເຫັນວ່າບໍ່ເລິກເຊິ່ງ
ແລະ ບໍ່ຕໍ່ເນື່ອງເທົ່າທີ່ຄວນ ຈຶ່ງເຮັດໃຫ້ຄວາມໜັກແໜ້ນທາງການເມືອງ, ທັດສະນະ,ທ່າທີ,ຈັນຍາບັນຂອງພະນັກງານຈຳນວນໜຶ່ງຂາດຄວາມຮັບຜິດຊອບປະຕິບັດໜ້າທີ່ບໍ່ຖືດຕ້ອງ,
ໂປ່ງໃສ, ຂາດນ້ຳໃຈຮັບໃຊ້ປະຊາຊົນດ້ວຍຄວາມບໍລິສຸດ ຈົນເກີດມີຫາງສຽງຈົ່ມວ່າຂອງສັງຄົມຕໍ່ການປະຕິບັດໜ້າທີ່ຂອງພະນັກງານໃນຫລາຍແງ່ເປັນຕົ້ນ:ຮັບສີນບົນ,
ເລືອກປະຕິບັດ, ປະຕິບັດເກີນຂອບເຂດ ແລະ ອື່ນໆເຊິ່ງໃນໄລຍະຜ່ານມາ, ກໍໄດ້ມີການກວດ
ກາ ແລະ ໃສ່ວິໄນພະນັກງານຜູ້ທີ່ພົບວ່າມີການປະຕິບັດໜ້າທີ່ບໍ່ເໝາະສົມໂດຍການສຳຫລວດ,
ສຶກສາອົບຮົມ ແລະ ສັບຊ້ອນໄປຮັບໜ້າທີ່ໃໝ່ຫລາຍຄົນ, ແຕ່ໂດຍລວມແລ້ວເຫັນວ່າຍັງມີລັກສະນະເບົາບາງຢູ່.
No comments:
Post a Comment