ຫ້ອງສະຫມຸມີບົດບາດ ແລະ ຄວາມສຳຄັນແນວໃດ ? ( ຄໍລຳ ແລກປ່ຽນຄຳເຫັນ )

ໂດຍ : ຊາຍຄຳ ຈຳປາອຸທຸມ

     ມື້ນີ້ ຂໍເວົ້າເຖິງບົດບາດ ແລະ ຄວາມສຳຄັນຂອງຫ້ອງສະໝຸດເພື່ອເປັນການແລກປ່ຽນກັນເນື່ອງໃນໂອກາດວັນລຶບລ້າງ ຄວາມບໍ່ຮູ້ໜັງສືສາກົນ (8/9/1965 - 8/9/2013) ແລະ ກ່ອນອື່ນພວກເຮົາຕ້ອງເຂົ້າໃຈ ກ່ອນວ່າ: ຫ້ອງສະໝຸດແມ່ນ ຫຍັງ ?.

    ຫ້ອງສະໝຸດໝາຍເຖິງສະຖານທີ່ລວບລວມຄວາມຮູ້ຕ່າງໆທີ່ບັນທຶກໄວ້ໃນຮູບແບບຂອງໜັງສື, ວາລະສານ, ສິ່ງພິມຕ່າງໆ ເຊິ່ງມີການຈັດໄວ້ຢ່າງເປັນລະບົບເພື່ອອຳນວຍຄວາມສະດວກໃຫ້ແກ່ຜູ້ໃຊ້ບໍລິການໃນການສຶກສາຄົ້ນຄວ້າ ແລະ ການຮຽນຮູ້ ບັນຫາຕ່າງໆຄື 1. ເປັນສະຖານທີ່ຄົ້ນ ຄວ້າຄວາມຮູ້ເພີ່ມຕື່ມ. 2. ເປັນສະຖານທີ່ບໍລິການການອ່ານໄດ້ຕາມຄວາມສົນໃຈ. 3. ຊ່ວຍໃຫ້ຜູ້ໃຊ້ບໍລິການສະດວກໃນການສຶກ ສາຄົ້ນຄວ້າ. 4. ຊ່ວຍໃຫ້ຜູ້ໃຊ້ບໍລິການຮູ້ຈັກນຳໃຊ້ເວລາຫວ່າງເປັນປະໂຫຍດ. 5. ຊ່ວຍໃຫ້ຜູ້ໃຊ້ບໍລິການມີນິໃສຮັກການອ່ານ. 6. ເຝິກໃຫ້ຜູ້ໃຊ້ບໍລິການຮູ້ຈັກຮັບຜິດຊອບໃນສາທາລະນະສົມບັດ.

    ຈາກປະໂຫຍດດັ່ງກ່າວນັ້ນ ຈຶ່ງເຫັນວ່າຫ້ອງສະໝຸດເປັນສະຖານທີ່ທີ່ມີຄວາມສຳຄັນຕໍ່ສັງຄົມໃນດ້ານຕ່າງໆດັ່ງນີ້: ຖ້າອີງ ອາໄສແຕ່ຫ້ອງສະໝຸດຂອງລັດກໍບໍ່ພຽງພໍ. ດັ່ງນັ້ນ ຖ້າຫ້ອງສະໝຸດມີຫລາຍແຫ່ງກໍຄົງຕອບສະໜອງໃຫ້ແກ່ສັງຄົມໄດ້ຫລາຍ,

ຫ້ອງສະໝຸດຍັງເປັນສູນລວມ ແລະ ຮັກສາວັດທະນະທຳຂອງຊາດໃຫ້ຄົງຢູ່ນຳພວກເຮົາຕະຫລອດໄປ ແລະ ຫ້ອງສະໝຸດມີ ຄວາມສຳຄັນຕໍ່ການພັດທະນາເສດຖະກິດທັງໃນຖານະກໍ່ໃຫ້ເກີດກິດຈະກຳທາງເສດຖະກິດໃນດ້ານຕ່າງໆຊ່ວຍສ້າງວຽກງານ ແລະ ຄົນໃຫ້ມີຄວາມຮູ້ຄວາມສາມາດພັດທະນາອາຊີບການງານອື່ນໆ. ພ້ອມນັ້ນ ຫ້ອງສະໝຸດເປັນບ່ອນສົ່ງເສີມໃຫ້ປະຊາຊົນ ມີຄວາມຮູ້ຄວາມເຂົ້າໃຈຕໍ່ລະບອບການປົກຄອງຂອງປະເທດ, ຮູ້ຈັກສ້າງຕົນເອງເປັນພົນລະເມືອງດີມີຄວາມຮັບຜິດຊອບຕໍ່ ສັງຄົມມີຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນ.

    ຜ່ານການນຳສະເໜີ ເຮົາຈະ ເຫັນໄດ້ວ່າ: ຫ້ອງສະໝຸດມີບົດ ບາດສຳຄັນຕໍ່ສັງຄົມຫລາຍທີ່ສຸດ, ຖ້າຊຸມຊົນໃດ, ບ້ານໃດ ແລະ ເມືອງໃດມີຫ້ອງສະໝຸດຫລາຍກໍ ຈະເຮັດໃຫ້ຄົນໃນຊຸມຊົນ, ບ້ານ ແລະ ເມືອງນັ້ນມີຄວາມຮູ້ຄວາມສາມາດຫລາຍຂຶ້ນ ແລະ ຄວາມຮູ້ທີ່ມີຂຶ້ນນັ້ນກໍຈະຖືກນຳມາຮັບໃຊ້ຄົນໃນຊຸມຊົນນັ້ນ ເຊິ່ງຈະສ້າງໃຫ້ຊຸມຊົນນັ້ນໄດ້ຮັບການພັດທະນາໃຫ້ຈະ ເລີນຂຶ້ນ.