ກວດ​ພົບ​ລາຍ​ຈ່າຍ​ນອກ​ແຜນ​ສະພາ​ຮັບ​ຮອງ​ຫລາຍ​ພັນຕື້ກີບ​ໃນ​ສົກ​ປີ 2011-2012

           ທ່ານ​ນາງ ວຽງ​ທອງ ສີ​ພັນ​ດອນ ຫົວໜ້າ​ອົງການ​ກວດ​ສອບ​ແຫ່ງ​ລັດ ລາຍ​ງານ​ຕໍ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ​ຊຸດ​ທີ VII ​ໃນ​ວັນ​ທີ 9 ທັນວາ​ນີ້ວ່າ: ອົງການ​ກວດ​ສອບ​ແຫ່ງ​ລັດ​ໄດ້​ກວດ​ເຫັນ​ລາຍ​ຈ່າຍ​ທີ່​ບໍ່​ນອນ​ໃນ​ແຜນ​ສະພາ​ແຫ່ງ​ຊາດ​ຮັບຮອງ​ຈຳນວນ 4.242,72 ຕື້ກີບ, ຂະນະ​ດຽວ​ກັນ ​ມີການເອົາ​ລາຍ​ຮັບ​ທີ່​ກວດ​ເຫັນ​ໄປ​ຈ່າຍ​ໃນ​ວຽກ​ບໍລິຫານ, ຊຳລະ​ໂຄງການ​ລົງທຶນ, ຊຳລະ​ເງິນ​ກູ້​ຢືມ​ທະນາຄານ ​ແລະ ​ຊື້ພາຫະ ນະ​ຈຳນວນ 437,42 ຕື້ກີບ ຄື​ມີ 22 ຫົວໜ່ວຍ ​ເອົາ​ເງິນ​ລາຍ​ຮັບ​ວິຊາ​ການ​ໄປ​ຈ່າຍ 115,49 ຕື້ກີບ, 8 ຫົວໜ່ວຍ ​ເອົາ​ເງິນ​ລາຍ​ຮັບ​ຈາກ​ການ​ຂາຍ​ໄມ້​ໄປ​ຈ່າຍ 59,66 ຕື້ກີບ, 3 ຫົວໜ່ວຍ ​ເອົາ​ເງິນ​ກອງ​ທຶນ​ໄປ​ຈ່າຍ 79,40 ຕື້ກີບ, 1 ຫົວ ໜ່ວຍ ​ເອົາ​ລາຍ​ຮັບ​ຈາກ​ເງິນ​ລະ ດົມ​ໄປ​ຈ່າຍ 12,84 ຕື້ກີບ, 2 ຫົວ ໜ່ວຍ ​ເອົາ​ຄັງ​ພັດທະນາ​ແຂວງ​ໄປ​ຈ່າຍ 124,72 ຕື້ກີບ, ມີ 1 ຫົວ ໜ່ວຍ ​ເອົາ​ລາຍ​ຮັບ​ຈາກ​ການ​ຂຸດ​ແຮ່​ທາດ​ໄປ​ຈ່າຍ 8,32 ຕື້ກີບ, 1 ຫົວໜ່ວຍ ​ເອົາ​ລາຍ​ຮັບ​ຈາກການ​ຂາຍ​ຊັບ​ສິນ​ຂອງ​ລັດ​ໄປ​ຈ່າຍ 2,36 ຕື້ກີບ, 2 ຫົວໜ່ວຍ ​ເອົາ​ລາຍ​ຮັບ​ຈາກ​ເງິນ​ຊ່ວຍ​ເຫລືອ​ລ້າ​ໄປ​ຈ່າຍ 34,63 ຕື້ກີບ.

          ​ຫົວໜ້າ​ອົງການ​ກວດ​ສອບ​ແຫ່ງ​ລັດ ​ໃຫ້​ຮູ້​ຕື່ມ​ວ່າ: ລາຍ​ຈ່າຍ​ໂຄງການ​ກໍ່ສ້າງ​ພື້ນຖານ​ໂຄງ​ລ່າງ​ທີ່​ບໍ່​ນອນ​ໃນ​ແຜນ​ສະພາ​ແຫ່ງ​ຊາດ​ຮັບຮອງ​ມີ 124 ​ໂຄງການ ມູນ​ຄ່າ 1.551,16 ຕື້ກີບ, ​ໃນ​ນັ້ນ ​ໄດ້​ຊຳລະ​ແລ້ວ 49,85 ຕື້ກີບ ​ແລະ ຄ້າງ​ຊຳລະ 1.501,31 ຕື້ກີບ, ສ່ວນ​ລາຍ​ຈ່າຍ​ຊຳລະ​ໜີ້ສິນ​ທີ່​ມີ​ສ່ວນ​ຫລຸດ​ໃຫ້​ບໍລິສັດ​ຕ່າງໆ​ຈຳ ນວນ 2.254,14 ຕື້ກີບ ​ເຊິ່ງ​ໄດ້​ນຳ​ໃຊ້​ທຶນ​

ຈາກ 3 ຮ່ວງ ຄື​ການ​ອອກ​ພັນທະບັດ​ທີ່​ມີ​ເວລາ​ຊຳລະ​ໜີ້ ອອກ​ໄປ 2-3 ປີ ​ແລະ ສາມາດ​ປ່ຽນ​ມື​ໄດ້, ​ເງິນ​ລວມສູນ​ບໍ່​ແບ່ງ ປັນ ​ແລະ ກູ້​ຢືມ​ນຳ​ຄັງ​ເງິນ​ແຫ່ງ​ຊາດ, ດ້ານ​ຊັບ​ສິນ​ແມ່ນ​ມີ 7 ຫົວ ໜ່ວຍ​ມີ​ບັນຊີ​ເງິນ​ຝາກ​ສະ​ເພາະ​ທີ່​ບໍ່​ນອນ​ໃນ​ລະບົບ​ຄັງ​ເງິນ​ແຫ່ງ​ຊາດ ຍອດ​ເຫລືອ 107,54 ຕື້ກີບ, ກວດ​ເຫັນ​ຍອດ​ເຫລືອ​ໜີ້ຕ້ອງ​ຮັບ ຮ່ວງ​ຊຳລະ​ໜີ້ສິນ​ລາຍ​ຈ່າຍ​ລົງ ທຶນ ​ແລະ ຮ່ວງ​ບໍລິຫານ​ຈຳນວນ 2.992,91 ຕື້ກີບ ​ໃນ​ລະບົບ​ຄັງ​ເງິນ​ແຫ່ງ​ຊາດ, ​ໃນ​ນັ້ນ ຈ່າຍ​ລ່ວງ​ໜ້າ​ຢູ່​ຄັງ​ເງິນ​ແຫ່ງ​ຊາດ​ປະຈຳ​ສູນ​ກາງ ຈຳນວນ 2.708,30 ຕື້ກີບ ​ແລະ ທ້ອງ​ຖິ່ນ ຈຳ ນວນ 284,61 ຕື້ກີບ, ຍັງ​ມີໜີ້ຕ້ອງ​ຮັບ​ສ່ວຍ​ສາ​ອາກອນ ​ແລະ ຊັບ​ສິນ​ທີ່​ຫົວໜ່ວຍ​ທຸລະ​ກິດ​ບໍ່​ໄດ້​ມອບ​ເຂົ້າງົບປະ ມານ​ທັນຕາ​ມກຳ ນົດ​ເວລາ ​ແລະ ບໍ່​ໄດ້​ສະຫລຸບ​ເຂົ້າ​ໃນ​ບົດ​ສະຫລຸບ​ການກວດ​ນັບ​ບັນຊີ​ທ້າຍ​ປີ ຈຳ ນວນ 261,31 ຕື້ກີບ ຍ້ອນ​ເປັນ​ໜີ້ ສິນ​ທີ່​ຕິດ​ພັນ​ກັບ​ໂຄງການ​ລົງທຶນ​ກ່ອນ​ຂອງ​ລັດ ບໍລິສັດ​ຮັບ​ເໝົາ​ກໍ່ ສ້າງ​ບໍ່​ທັນ​ໄດ້​ຮັບ​ການ​ສະ​ສາງ​ຈາກ​ງົບປະມານ. ຮອດ​ທ້າຍ​ປີ 2012, ທະນາ ຄານ​ສົ່ງ​ເສີມ​ກະສິ ກຳ ​ແລະ ທະນາຄານ​ນະ​ໂຍບາຍ ມີໜີ້ຕ້ອງ​ຮັບ​ຈາກ​ການ​ປ່ອຍ​ກູ້​ຕາມ​ສັນຍາ ຈຳນວນ 4.705,63 ຕື້ກີບ, ​ໃນ​ນັ້ນ ມີໜີ້ຕ້ອງ​ຮັບ​ກາຍ​ສັນຍາ ລວມຕົ້ນທຶນ ​ແລະ ດອກ​ເບ້ຍ ຈຳນວນ 455,78 ຕື້ກີບ ​ແລະ ທະນາຄານ​ນະ​ໂຍບາຍ​ຍັງ​ສືບຕໍ່​ປ່ອຍ​ເງິນ​ກູ້​ນອກ​ເມືອງ​ເປົ້າໝາຍ​ສະ​ສົມ​ຮອດ​ທ້າຍ​ປີ 2012 ຈຳ ນວນ 482,54 ຕື້ກີບ. ນອກຈາກ​ນີ້ ​ເງິນ​ກູ້​ຢືມ​ພາຍ​ໃນນະຄອນຫລວງ ​ວຽງ​ຈັນ​ໄດ້​ກູ​້ຢືມ​ເງິນ​ຈາກ​ທະນາ ຄານ​ແຫ່ງ ສປປ ລາວ ຈຳນວນ 6,91 ຕື້ກີບ ​ເພື່ອ​ຊຳລະ​ຄ່າ​ສ້ອມ​ແປງ​ເສັ້ນທາງ 5 ​ເສັ້ນ ທີ່​ບໍ່​ນອນ​ໃນ​ແຜນ​ງົບປະມານ​ແຫ່ງ​ລັດ ສົກ​ປີ 2011-2012.

        ​ຫົວໜ້າ​ອົງການ​ກວດ​ສອບ​ແຫ່ງ​ລັດ ກ່າວ​ວ່າ: ສາ​ເຫດ​ຕົ້ນຕໍ​ທີ່​ເຮັດ​ໃຫ້​ມີ​ວົງ​ເງິນ​ຈຳນວນ​ຫລາຍ​ບໍ່​ມອບ​ເຂົ້າງົບປະມານ ​ແລະ ຖືກ​ນຳ​ໃຊ້​ນອກ​ແຜນ​ແມ່ນ​ການ​ບໍລິຫານ​ຂອງ​ຫົວໜ່ວຍ​ທຸລະ​ກິດ​ມີ​ລັກສະນະ​ເກື້ອກູນ,ຟຸມ​ເຟືອຍ​ບໍ່​ສົມ​ເຫດ​ສົມ​ຜົນ​ກັບ​ການ​ດຳ​ເນີ​ນທຸລະ​ກິດ​ຂອງ​ຫົວໜ່ວຍ​ຕົນ, ສະຕິ​ເຄົາລົບ​ກົດໝາຍ​ຂອງ​ຫົວໜ່ວຍ​ງົບປະມານ​ຈຳນວນ​ໜຶ່ງ​ຍັງ​ຖື​ເບົາ​ຕໍ່​ວິ​ໄນ​ແຜນການ- ການ​ເງິນ ​ເຊິ່ງ​ເຮັດ​ໃຫ້​ມີ​ຜົນ​ສະ ທ້ອນ​ຕໍ່​ກັບ​ສະພາບ​ຄ່ອງ​ທາງ​ດ້ານ​ການ​ເງິນ ​ແລະ ​ແຕະຕ້ອງ​ເຖິງ​ການ​ພັດທະນາ​ເສດຖະກິດ- ສັງຄົມ​ຂອງ​ຊາດ.