ສາທາຮຽກຮ້ອງໃຫ້ມີສະຕິຕ້ານ ແລະ ສະກັດກັ້ນການລະບາດຂອງໄຂ້ເລືອດອອກ

       ວັນທີ 18 ມີນານີ້ທ່ານ ດຣ ຈັນທະໄລ ໄຊຍະວົງ, ຫົວໜ້າຂະແໜງລະບາດວິທະຍາ, ພະ ແນກສາທາລະນະສຸກນະ ຄອນຫຼວງວຽງຈັນລາຍງານວ່າ: ປັດຈຸບັນສະພາບອາກາດຮ້ອນແຮງ ຂຶ້ນ, ບວກກັບບາງທ້ອງຖິ່ນໄດ້ມີຝົນຕົກເປັນໄລຍະ, ຊຶ່ງເປັນເງື່ອນໄຂເຮັດໃຫ້ຍຸງຂະຫຍາຍພັນ ໄດ້ຍ່າງໄວວາ, ຕາມປົກກະຕິແລ້ວເມື່ອຂາດນ້ຳໄຂ່ຂອງຍຸງຈະມີອາຍຸຢູ່ໄດ້ເຖິງ 250 ວັນ, ແຕ່ຖ້າ ມີນ້ຳຕົກໃສ່ພຽງ 7-8 ວັນໄຂ່ກໍຈະຟັກອອກເປັນໂຕ, ແຕ່ຖ້າອາກາດຄືດັ່ງປັດຈຸບັນໄຂ່ຍຸງກໍຈະໃຊ້ ເວລາພຽງ  3 ຫາ 4 ວັນໄຂ່ຍຸງກໍສາມາດຟັກອອກມາເປັນຍຸງໄດ້, ດ້ວຍເຫດນີ້ມັນຈະເຮັດໃຫ້ ມີຍຸງເພີ່ມຂຶ້ນເປັນຈຳນວນຫຼາຍ, ສະນັ້ນທຸກຄົນຕ້ອງ ເປັນເຈົ້າການກຳຈັດແຫຼ່ງເພາະພັນຂອງຍຸງ ລາຍເພື່ອບໍ່ໃຫ້ເກີດການລະບາດຂອງພະຍາດໄຂ້ເລືອດອອກດັ່ງປີທີ່ຜ່ານມາ.

       ສູນເຝົ້າລະວັງກະຊວງສາທາລະນະສຸກໃຫ້ຮູ້ວ່າ: ນັບແຕ່ວັນທີ 28  ທັນວາ 2013 ຮອດ ປັດຈຸບັນ, ເປັນອາທິດທີ 12 ຂອງ ການເຝົ້າລະວັງ, ໃນທົ່ວປະເທດມີຄົນຕິດເຊື້ອພະຍາດໄຂ້ເລືອດອອກ  ແລ້ວ 246 ກໍລະນີ, ໃນນີ້ຢູ່ ແຂວງສາລະວັນມີ 92 ກໍລະນີ, ອັດຕະປື 60 ກໍລະນີ, ນະຄອນຫຼວງວຽງຈັນ 29 ກໍລະນີ, ຈຳປາສັກ 21 ກໍລະນີ, ວຽງຈັນ 13 ກໍລະນີ, ເຊກອງ 13 ກໍລະນີ, ອຸດົມໄຊ 2 ກໍລະນີ, ຫຼວງພະບາງ 2 ກໍລິນີ, ໄຊຍະບູລີ 2 ກໍລະນີ ແລະ ບໍລະຄຳໄຊ

3 ກໍລະນີ, ສ່ວນແຂວງອື່ນໆ ແມ່ນຍັງບໍ່ພົບຜູ້ຕິດເຊື້ອຂອງພະຍາດດັ່ງກ່າວ ແລະ ນີ້ແມ່ນມັນເປັນຜົນການຕິດເຊື້ອ ແກ່ຍາວ ມາແຕ່ປີ 2013 ຜ່ານມາ, ເຖິງ ຢ່າງໃດກໍຕາມເພື່ອເປັນການຕ້ານ ແລະ ສະກັດກັ້ນພະຍາດດັ່ງກ່າວບໍ່ໃຫ້ລະບາດຂຶ້ນມາອີກ ສາທາລະນະສຸກຈຶ່ງໄດ້ອອກມາ ເຕືອນໃຫ້ປະຊາຊົນຢູ່ຂອບເຂດທົ່ວປະເທດຈົ່ງສືບຕໍ່ເຝົ້າລະວັງ ແລະ ເປັນເຈົ້າການໃນການ ທຳລາຍແຫຼ່ງເພາະພັນຂອງຍຸງລາຍ, ໂດຍສະເພາະຕ້ອງປະຕິບັດຄຳຂວັນ 5 ປ ຢ່າງເຂັ້ມງວດເພື່ອສະກັດກັ້ນພະຍາດໄຂ້ເລືອດ ອອກຄື: ປ (1): ປິດພາຊະນະ (ໄຫ, ອຸ, ແອ່ງ, ຟຸຍ ແລະ ອື່ນໆ) ເພື່ອປ້ອງກັນບໍ່ໃຫ້ຍຸງລາຍໄຂ່ໃສ່, ປ (2) : ປ່ຽນນ້ຳໃນພາ ຊະນະ (ຕີນຕູ້, ໂຖດອກໄມ້ ແລະ ອື່ນໆ) ຢ່າງຕ່ຳ 2 ຄັ້ງຕໍ່ອາທິດ, ອີກວີທີໜຶ່ງເອົາເກືອໃສ່ຫຼືໃຊ້ຜ້າຈຸ່ມນ້ຳມັນເຄື່ອງພັນຂາຕູ້ ແທນ, ປ(3): ປອຍປາຫາງນົກຍຸງ ໃສ່ພາຊະນະກັກນ້ຳເພື່ອໃຫ້ກິນໜອນນ້ຳຍຸງລາຍ, ປ (4): ປັບປຸອະນາໄມບໍລິເວນທີ່ຢູ່ອາ ໄສທັງພາຍໃນ ແລະ ນອກເຮືອນໃຫ້ ສະອາດ, ທຳລາຍແຫຼ່ງເພາະພັນຍຸງລາຍເຊັ່ນ: ກະໂປະ, ກະປ໋ອງ, ຢ່າງຕີນລົດເກົ່າ.. ແລະ ປ (5): ປະຕິບັດ 5 ປ ໃຫ້ເປັນນິໄສ, ຖ້າເປັນໄຂ້ຄວນໄປພົບແພດ, ພຽງເທົ່ານີ້ທ່ານກໍຈະເປັນສ່ວນໜຶ່ງໃນການສະກັດກັ້ນ ພະຍາດໄຂ້ເລືອດອອກ.