laophatthananewspaper: ສັບປະດາຮູບເງົາຫວຽດນາມຢູ່ລາວຫວນຄືນໄຊຊະນະບັ້ນຮົບດຽນບຽນຟູ

ກະແສຂ່າວສົດໆຮ້ອນໆທີ່ສຸດໄດ້ຮັບການສື່ສານຜ່ານບັນດາພາຫະນະສື່ມວນຊົນຢ່າງວ່ອງໄວໄປທົ່ວໂລກໃນຕົ້ນເດືອນພຶດ ສະພາກ່ອນໜ້ານີ້ 60 ປີ ແມ່ນຂ່າວກ່ຽວກັບການປະລາໄຊຂອງກອງທັບຝຣັ່ງຢູ່ດຽນບຽນຟູ ເວລາ 17:30 ໂມງ ຂອງວັນທີ 7 ພຶດສະພາ 1954 ທຸງໄຊຂອງກອງທັບປະຊາຊົນຫວຽດນາມໄດ້ຖືກໂບກສະບັດ ໂດຍນັກຮົບຫວຽດນາມ 5 ຄົນ ຄືທ້າວ ຕະ ກວກລວດ, ທ້າວ ຮວ່າງ ດັງ ວິງ, ທ້າວ ບຸ່ຍ ວັນຫຍໍ, ທ້າວ ຫງວຽນ ວັນລາມ ແລະ ທ້າວ ດ່າວ ວັນທຽວ ຢູ່ເທິງຖ້ຳຂອງນາຍພົນຝຣັ່ງ Christian de Castries, ພາຍຫລັງການສູ້ຮົບຢ່າງພິລະອາດຫານມາເປັນເວລາ 56 ວັນ, ບັ້ນຮົບດຽນບຽນຟູໄດ້ຮັບໄຊຊະນະຢ່າງສົມບູນ ອັນໄດ້ສິ້ນສຸດສະພາບການສົງ ຄາມໄລຍະ 1953-1954 ຢ່າງມີໄຊ ດ້ວຍບັນດາບັ້ນຮົບຢູ່ໃນທົ່ວທຸກສະພາບຮົບອິນດູຈີນ, ໃນນັ້ນ ມີບັ້ນຮົບພາກເໜືອລາວ ປີ 1953 ບັງຄັບໃຫ້ພວກລ່າເມືອງຂຶ້ນ ຝຣັ່ງຕ້ອງເຂົ້າສູ່ການເຈລະຈາເຊັນສັນຍາເຊີແນວ ໃນປີ 1954 ເຊິ່ງໄດ້ລຶບລ້າງແຄວ້ນອິນດູຈີນຫົວເມືອງຂຶ້ນ ແລະ ຮັບຮູ້ຄວາມເປັນ

ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ 3 ປະເທດຫວຽດນາມ, ລາວ ແລະ ກຳປູເຈຍ. ນີ້ແມ່ນຄຳເວົ້າບາງສ່ວນຂອງທ່ານ ຫງວຽນ ແມ໋ງ ຮຸ່ງ ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມປະຈຳລາວ ໃນການຖະແຫລງຂ່າວຕໍ່ສື່ມວນຊົນກ່ຽວກັບສັບປະດາຮູບເງົາຫວຽດນາມຢູ່ລາວ ເຊິ່ງຈະເລີ່ມສາຍແຕ່ວັນທີ 5-11 ພຶດສະພາ 2014 ຢູ່ນະຄອນຫລວງວຽງຈັນ ແລະ ແຂວງສະຫວັນນະເຂດ ເນື່ອງໃນໂອກາດສະເຫລີມສະ ຫລອງໄຊຊະນະດຽນບຽນຟູ ຄົບຮອບ 60 ປີ.

ຮູບເງົາທີ່ຈະນຳມາສາຍປະກອບມີ 5 ເລື່ອງ ຄືເລື່ອງຜົວເມຍອາຟູ, ທຸງສັນຍານ, ແມ່ສອງຄົນ, ດຽນບຽນຟູ ແລະ ດອກບານແດງ ແລະ ຟີມເອກະສານ 3 ຊຸດ ຄືດຽນບຽນຟູ, ໄຊຊະນະດຽນບຽນຟູ ແລະ ຫລັກໝາຍຄຳດຽນບຽນຟູ.

ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະ ຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ ກ່າວວ່າ:ເຖິງວ່າໄຊຊະນະດຽນບຽນຟູ ວັນທີ 7 ພຶດສະພາ 1954 ໄດ້ລ່ວງເລີຍມາເປັນເວລາ 60 ປີແລ້ວກໍຕາມ, ແຕ່ຫາກເວົ້າເຖິງດຽນ ບຽນຟູເມື່ອໃດແລ້ວປະຊາ ຊົນຊາວຫວຽດນາມ-ຊາວລາວ ແລະ ປະຊາຊົນຜູ້ຮັກຫອມສັນຕິ ພາບໃນທົ່ວໂລກ ຕ່າງກໍມີຄວາມຊື່ນຊົມຍິນດີ ແລະ ເອກອ້າງທະນົງໃຈເປັນຢ່າງຍິ່ງ ເພາະໄຊຊະ ນະດຽນບຽນຟູບໍ່ພຽງແຕ່ເປັນໄຊຊະນະຂອງປະຊາຊົນ 3 ຊາດອິນດູຈີນເທົ່ານັ້ນ, ແຕ່ມັນຍັງແມ່ນໄຊຊະນະຂອງປະຊາຊາດທີ່ຖືກກົດຂີ່ຂູດຮີດໃນທົ່ວໂລກ ຜູ້ເຊິ່ງເຄີຍໄດ້ຕົກເປັນຂ້ອຍຂ້າມ້າໃຊ້ ແລະ ເປັນທາດຂອງພວກຈັກ ກະພັດລ່າເມືອງຂຶ້ນແບບເກົ່າ ເຊິ່ງມີພວກລ່າເມືອງຂຶ້ນຝຣັ່ງເປັນຫົວໂປ່.

ໄຊຊະນະດຽນບຽນຟູແມ່ນໝາກຜົນຂອງການຕໍ່ສູ້ອັນພິລະອາດຫານ ເຊິ່ງເຕັມໄປດ້ວຍຄວາມເສຍສະລະເລືອດເນື້ອ ຂອງກອງທັບ ແລະ ປະຊາຊົນຫວຽດນາມອ້າຍນ້ອງ ພາຍໃຕ້ການນຳພາຂອງພັກກອມມູນິດຫວຽດນາມ ນຳໂດຍປະທານ ໂຮ່ຈີມິງ ຜູ້ຍິ່ງໃຫຍ່, ໃນນັ້ນປະ ຊາຊົນຊາວໂລກຕ່າງກໍຈົດຈຳຊື່ສຽງຂອງທ່ານນາຍພົນຜູ້ທີ່ເກັ່ງກ້າສາມາດ ເຊິ່ງເພິ່ນຜູ້ນັ້ນທັງ “ບຸ໋ນ ແລະ ບູ້” (van - vo) ນັ້ນກໍຄືທ່ານນາຍພົນ ຫວໍງວຽນຢາບ ເຊິ່ງປະຊາຊົນຊາວໂລກຍັງຄົງຈົດຈຳບຸນຄຸນ ແລະ ຊື່ສຽງຂອງທ່ານໄປຕະຫລອດການ.

ໄຊຊະນະດຽນບຽນຟູແມ່ນພະຍານຮັກທີ່ມີຊີວິດຊີວາຂອງຄວາມສາມັກຄີ ມິດຕະພາບແບບພິເສດ ແລະ ການຮ່ວມສຳ ພັນສູ້ຮົບທີ່ຍິ່ງໃຫຍ່ລະຫວ່າງສອງກອງທັບ ແລະ ປະຊາຊົນສອງຊາດລາວ-ຫວຽດນາມ ຂອງພວກເຮົາ, ຈາກໄຊຊະນະດັ່ງ ກ່າວບວກກັບການຕໍ່ສູ້ກູ້ຊາດອັນລຳບາກຍາວນານຂອງປະຊາ ຊົນລາວບັນດາເຜົ່າ ໄດ້ເຮັດໃຫ້ແອກຄອບຄອງຂອງພວກຈັກ ກະພັດລ່າເມືອງຂຶ້ນຝຣັ່ງຢູ່ລາວເປັນເວລາ 60 ປີນັ້ນ ໄດ້ຖືກພັງທະລາຍລົງ ແລະ ໄດ້ເຮັດໃຫ້ປະເທດເຮົາໄດ້ຮັບຄວາມເປັນເອກະ ລາດ ແລະ ອິດສະລະພາບຈາກພວກລ່າເມືອງຂຶ້ນຢ່າງສົມບູນ.

ການເວລາ ແລະ ສະພາບການຢູ່ໃນໂລກຈະໝູນວຽນປ່ຽນແປງຢ່າງສັບສົນແນວໃດກໍຕາມ, ແຕ່ສັດຈະທຳແຫ່ງຄວາມສາມັກ ຄີມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາ ຊົນສອງຊາດ ລາວ-ຫວຽດນາມ ຈະບໍ່ມີອິດທິກຳລັງປໍລະປັກໃດໆມາມ້າງເພທຳລາຍລົງໄດ້. ປະ ຊາຊົນລາວບັນດາເຜົ່າແຕ່ຮຸ້ນຄົນນີ້ຫາຮຸ້ນຄົນຕໍ່ໆໄປຍາມໃດກໍສະແດງຄວາມຂອບໃຈ ແລະ ຈົດຈຳບຸນຄຸນ ກໍຄືການຊ່ວຍເຫລືອອັນລ້ຳຄ່າຂອງພັກ-ລັດ ແລະ ປະ ຊາຊົນຫວຽດນາມອ້າຍນ້ອງທີ່ໄດ້ອູ້ມຊູສະໜັບສະໜູນການຕໍ່ສູ້ກູ້ຊາດຂອງປະຊາຊົນລາວໃນເມື່ອກ່ອນ ກໍຄືຕໍ່ພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາໃນປັດຈຸບັນ.

ເພື່ອເປັນການລຳລຶກເຫດ ການອັນເປັນປະຫວັດສາດທີ່ມະ ຫັດສະຈັນຂອງໄຊຊະນະດຽນ ບຽນຟູ ຄົບຮອບ 60 ປີ ທັງເປັນການສືບຕໍ່ປະກອບສ່ວນເຂົ້າໃນການເພີ່ມພູນຄູນສ້າງຄວາມສາ ມັກຄີມິດຕະພາບແບບພິເສດ ແລະ ການຮ່ວມມືຮອບ ດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ- ຫວຽດນາມ ຂອງພວກເຮົາ. ດັ່ງນັ້ນ ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ກົມຮູບເງົາລາວ-ສະຖານີໂທລະພາບແຫ່ງຊາດລາວ ຮ່ວມກັບສະຖານເອກອັກຄະລັດ ຖະທູດແຫ່ງ ສສ ຫວຽດນາມ-ສູນວັດທະນະທຳຫວຽດນາມ, ກົມຮູບເງົາຫວຽດ ນາມ ຈະໄດ້ຈັດຕັ້ງສັບປະດາຮູບເງົາຫວຽດ ນາມຂຶ້ນ ແຕ່ວັນທີ 5-11 ພຶດສະພາ 2014 ຢູ່ນະຄອນ ຫລວງວຽງຈັນ ແລະ ແຂວງສະ ຫວັນນະເຂດ ກໍຄືສຳນັກງານອົງ ການ ແລະ ກົມກອງ ປກສ-ປກຊ ຈຳນວນໜຶ່ງ. ພວກເຮົາຫວັງວ່າຜ່ານການຈັດສັບປະດາຮູບເງົາຫວຽດນາມຢູ່ລາວໃນຄັ້ງນີ້ ຈະນຳເອົາສາລະ ແລະ ຄວາມບັນເທີງມາສູ່ທ່ານຜູ້ຊົມລາວໄດ້ເປັນຢ່າງດີຈະເຮັດໃຫ້ຄົນລາວ ໂດຍສະເພາະຄົນຮຸ້ນໜຸ່ມມີຄວາມເຂົ້າໃຈເລິກເຊິ່ງຕື່ມອີກຕໍ່ຊາດ ແລະ ປະຊາຊົນຫວຽດນາມ, ເຂົ້າໃຈມູນເຊື້ອຮ່ວມສຳພັນສູ້ຮົບລະ ຫວ່າງສອງຊາດລາວ-ຫວຽດ ນາມ, ເຂົ້າໃຈຄວາມໝາຍຂອງໄຊຊະນະດຽນບຽນຟູຂຶ້ນຕື່ມອີກກ້າວໜຶ່ງ.

ທ່ານເອກອັກຄະລັດຖະທູດຫວຽດນາມປະຈຳລາວ ກ່າວຕື່ມວ່າ: ການຮ່ວມກັນຈັດຕັ້ງບັນດາເຫດການດ້ານວັດທະນະທຳຂອງຫວຽດນາມຢູ່ລາວ ແລະ ບັນດາເຫດການດ້ານວັດທະນະ ທຳຂອງລາວຢູ່ຫວຽດນາມໃນແຕ່ລະປີນັ້ນ ໄດ້ກາຍເປັນສີສັນວັດທະນະທຳທີ່ດີງາມໃນການພົວພັນຮ່ວມມືລະຫວ່າງສອງປະເທດຫວຽດນາມ-ລາວ ພວກເຮົາ, ສະແດງໃຫ້ເຫັນຢ່າງມີຊີ ວິດຊີວາເຖິງສາຍພົວພັນມິດຕະ ພາບທີ່ເປັນມູນເຊື້ອ, ຄວາມສາ ມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດຫວຽດນາມ ແລະ ລາວ. ບັນດາເຫດການແລກປ່ຽນດ້ານວັດທະນະທຳນັ້ນໄດ້ຊ່ວຍໃຫ້ປະ ຊາຊົນສອງປະເທດພວກເຮົາມີຄວາມສະໜິດຕິດພັນ, ຮ່ວມແຮງ, ຮ່ວມໃຈ ພ້ອມກັນສ້າງສາປະເທດຫວຽດນາມ ແລະ ປະເທດລາວໃຫ້ພັດທະນາຢ່າງວັດທະນາຖາວອນ, ປະກອບສ່ວນຢ່າງຕັ້ງໜ້າເຂົ້າໃນພາລະກິດສັນ ຕິພາບ, ການຮ່ວມມື ແລະ ການພັດທະນາຢູ່ໃນພາກພື້ນ ແລະ ໃນໂລກ.

ສຳລັບສັບປະດາຮູບເງົາຫວຽດນາມຢູ່ລາວຈະດຳເນີນການສາຍຄືດັ່ງນີ້: ອອກອາກາດຜ່ານໂທລະພາບແຫ່ງຊາດ: ເລື່ອງຮູບເງົາ “ດອກບ່ານແດງ” ໃນຕອນຄ່ຳຂອງວັນທີ 4 ແລະ ວັນທີ 5 ພຶດສະພາ 2014 ຢູ່ໃນຊ່ອງ 1 ແລະ ຊ່ອງ 3. ເວລາ 19:30 ໂມງ ຂອງວັນທີ 5 ພຶດສະ ພາ 2014 ຈັດພິທີເປີດ “ສັບປະດາຮູບເງົາຫວຽດນາມຢູ່ລາວ” ທີ່ເດີ່ນຫໍວັດທະນະທຳແຫ່ງຊາດ ແລະ ສາຍຮູບເງົາເອກະສານ 1 ເລື່ອງ ແລະ ຮູບເງົາ 1 ເລື່ອງ; ເວລາ 19:30 ໂມງ ວັນທີ 6 ພຶດ ສະພາ 2014 ສາຍຮູບເງົາຢູ່ວິທະ ຍາຄານປ້ອງກັນຊາດ ໄກສອນ ພົມວິຫານ; ເວລາ 19:30 ໂມງ ວັນທີ 7 ພຶດສະພາ 2014 ສາຍຮູບເງົາຢູ່ວິທະຍາຄານປ້ອງກັນຄວາມສະຫງົບແຫ່ງຊາດ; ວັນທີ 8 ພຶດສະພາ 2014 ໄປແຂວງສະ ຫວັນນະເຂດ ເພື່ອສາຍຮູບເງົາໃນຕອນຄ່ຳຂອງວັນທີ 9 ແລະ ວັນທີ 10 ພຶດສະພາ 2014.