laophatthananewspaper: ນາຍົກອອກຄຳສັ່ງໃຫ້ເອົາໃຈໃສ່ປ້ອງກັນ ແລະ ສະກັດກັ້ນການ ລະບາດຂອງພະຍາດອີໂບລາ

ທ່ານນາຍົກລັດຖະມົນຕີແຫ່ງ ສປປ ລາວ, ໄດ້ອອກຄຳສັ່ງໃຫ້ພາກສ່ວນກ່ຽວຂ້ອງ ໂດຍສະເພາະແມ່ນກະຊວງສາທາລະ ນະສຸກ, ກະຊວງການຕ່າງປະເທດ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊ ວງໂຍທາທິການ ແລະ ຂົນສົ່ງ, ກະຊວງປ້ອງກັນຄວາມສະຫງົບ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງໃນທົ່ວປະເທດ, ພ້ອມກັນເອົາໃຈໃສ່ປ້ອງກັນ ແລະ ສະກັດກັ້ນ ການລະບາດຂອງພະຍາດ ອີໂບ ລາ ທີ່ອາດຈະເກີດຂຶ້ນຢູ່ ສປປ ລາວ.ເນື່ອງຈາກ, ປັດ ຈຸບັນໄດ້ມີການລະບາດໃຫຍ່ຂອງພະຍາດອີໂບລາໃນປະເທດເຊຣາລີອອນ, ໄລບີເຣຍ, ກິນີ ແລະ ໄນຈີເຣຍ ໃນທະວີບອາຟຣິກກາ, ເຊິ່ງລາວ ຍັງມີຄວາມສ່ຽງຈາກການເຂົ້າ- ອອກຂອງຜູ້ໂດຍສານທີ່ເດີນ ທາງມາຈາກປະເທດທີ່ມີການລະ ບາດ, ສະນັ້ນ, ເພື່ອເປັນການປ້ອງກັນ ແລະ ສະກັດກັ້ນການ ລະບາດຂອງພະຍາດດັ່ງກ່າວທີ່ອາດຈະເກີດຂຶ້ນຢູ່ປະເທດເຮົາ, ທ່ານນາຍົກລັດຖະມົນຕີ ໄດ້ອອກຄຳສັ່ງດັ່ງນີ້: ໃຫ້ກະຊວງສາທາ ລະນະສຸກເປັນຈຸດປະສານງານໃນວຽກງານສະກັດກັ້ນພະຍາດ ອີໂບລາ ໂດຍເອົາໃຈໃສ່ຕິດຕາມສະພາບການລະບາດຂອງພະ ຍາດດັ່ງກ່າວໃນທົ່ວໂລກຢ່າງໃກ້ຊິດ, ປະສານສົມທົບການອົງ ການຈັດຕັ້ງສາກົນ ແລະ ບັນດາປະເທດອາຊຽນໃນການແລກ ປ່ຽນຂໍ້ມູນຂ່າວສານ ແລະ ມາດຕະການກັນພະຍາດຕາມລະ ບຽບສາທາລະນະສຸກສາກົນ, ເຜີຍແຜ່ຄວາມຮູ້ ແລະ ວິທີປ້ອງກັນຕົນເອງໃຫ້ປະຊາຊົນ, ເພີ່ມທະວີການເຝົ້າລະວັງໃນທົ່ວປະ

ເທດ, ຮັບປະກັນໃຫ້ມີແພດປະຈຳຢູ່ດ່ານສາກົນຕ່າງໆ ໂດຍສະເພາະຢູ່ໃນສະໜາມບິນສາກົນວັດໄຕ ແຂວງຫລວງພະບາງສະຫວັນນະເຂດ ຈຳປາສັກ ແລະ ຂົວມິດຕະພາບ 1, 2, 3 ແລະ 4 ເພື່ອກວດກາ, ຕິດຕາມຜູ້ໂດຍ ສານທີ່ເດີນທາງມາຈາກປະເທດທີ່ມີການລະບາດ ແລະ ໃຫ້ກັກກັນຜູ້ໂດຍສານດັ່ງກ່າວ ຖ້າຫາກມີອຸນະພູມຫລາຍກວ່າ 38 ອົງ ສາ, ເລັ່ງສ້າງຄວາມເຂັ້ມແຂງໃນຫ້ອງວິເຄາະໃນການບົ່ງມະຕິພະຍາດອີໂບລາ, ກະກຽມຫ້ອງແຍກປ່ຽວ, ພາຫະນະ, ອຸປະກອນ, ຢາ ແລະ ສານເຄມີ, ສືບຕໍ່ຝຶກອົບຮົມໃຫ້ພະນັກງານແພດ, ໝໍ ແລະ ພະນັກງານປະຈຳດ່ານ ກ່ຽວກັບການຄຸ້ມຄອງກໍລະນີພະຍາດລະບາດ, ສືບຕໍ່ປັບປຸງທີມງານຕອບໂຕ້ດ່ວນພ້ອມທັງເລັ່ງ ສ້າງແຜນງົບປະມານເພື່ອປ້ອງກັນ ແລະ ສະກັດກັ້ນການລະບາດຂອງພະຍາດອີໂບລາ ແລ້ວນຳສະເໜີລັດຖະບານເພື່ອພິຈາ ລະນາດ່ວນ, ໃຫ້ທ່ານເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງໃນທົ່ວປະເທດ ເອົາໃຈໃສ່ຊີ້ນຳ-ນຳພາພະແນກ ການຕ່າງໆອ້ອມຂ້າງຂອງຕົນກໍຄືອຳນາດການປົກຄອງຂັ້ນເມືອງ ແລະ ຂັ້ນ ບ້ານ, ລະດົມປະຊາຊົນທຸກຄົນໃຫ້ມີສ່ວນຮ່ວມໃນການປ້ອງກັນພະຍາດອີໂບລາຢ່າງເປັນເຈົ້າການ, ໃຫ້ກະຊວງປ້ອງກັນຄວາມສະຫງົບໂດຍສະເພາະພາກສ່ວນຮັບຜິດຊອບດ່ານກວດກາຄົນເຂົ້າ-ອອກເມືອງ ຢູ່ບັນດາດ່ານສາກົນໃນທົ່ວປະເທດເອົາໃຈໃສ່ຢ່າງເຂັ້ມງວດຕໍ່ການເຂົ້າຂອງຜູ້ໂດຍສານທີ່ເດີນ ທາງມາຈາກປະເທດທີ່ມີການ ລະບາດ ເຊິ່ງຕ້ອງໄດ້ຜ່ານການກວດກາ ໂດຍເຈົ້າໜ້າທີ່ແພດປະ ຈຳດ່ານກ່ອນທຸກຄັ້ງ, ໃຫ້ກະ ຊວງການຕ່າງປະເທດຕິດຕາມ ແລະ ເກັບກຳຂໍ້ມູນການຂໍອະນຸ ມັດວີຊາເຂົ້າປະເທດຂອງຜູ້ທີ່ເດີນທາງມາຈາກປະເທດທີ່ມີການລະບາດໃນໄລຍະ 21 ວັນຜ່ານມາ, ແລ້ວແຈ້ງໃຫ້ກະຊວງສາທາລະນະສຸກຊາບ ແລະ ແນະ ນຳໃຫ້ພົນລະເມືອງລາວຫລີກ ເວັ້ນການເດີນທາງທີ່ບໍ່ຈຳເປັນໄປປະເທດດັ່ງກ່າວ, ໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໂຄສະນາເຜີຍແຜ່ທາງໂທລະພາບ, ວິທະຍຸ ແລະ ອື່ນໆ ເພື່ອໃຫ້ຄວາມຮູ້ທົ່ວໄປທີ່ຖືກຕ້ອງແກ່ປະຊາຊົນໃນການປ້ອງກັນພະຍາດ ແລະ ແນະ ນຳໃຫ້ປະຊາຊົນແຈ້ງ ແລະ ສອບຖາມຂໍ້ມູນເພີ່ມເຕີມທາງສາຍດ່ວນກະຊວງສາທາລະນະສຸກ 166 ຕະຫລອດ 24 ຊົ່ວໂມງ,ໃຫ້ກະຊວງໂຍທາທິການ ແລະ ຂົນສົ່ງອຳນວຍຄວາມສະດວກ ແລະ ສະຖານທີ່ໃນການກວດກາກັ່ນຕອງເບື້ອງຕົ້ນຢູ່ດ່ານສາກົນຕ່າງໆ ໂດຍສະເພາະຢູ່ໃນສະ ໜາມບິນສາກົນວັດໄຕ ຫລວງພະບາງ ສະຫວັນນະເຂດ ຈຳປາສັກ ແລະ ຂົວມິດຕະພາບ 1,2,3 ແລະ 4. ພ້ອມກັນນີ້, ໃຫ້ເຈົ້າຄອງນະຄອນຫລວງວຽງຈັນ, ບັນດາເຈົ້າແຂວງ, ບັນດາກະຊວງ ແລະ ອົງການທຽບເທົ່າ ຈົ່ງພ້ອມກັນຜັນຂະຫຍາຍ ແລະ ຈັດຕັ້ງປະຕິ ບັດລົງສູ່ພາກປະຕິ ບັດຕົວຈິງຢ່າງເຂັ້ມງວດ ແລະ ທັນການ.