ປ່າໄມ້
ແມ່ນຊັບພະຍາກອນທຳະຊາດອັນລ້ຳຄ່າທີ່ມີລະບົບນິເວດສະເພາະ ແລະ ຕິດພັນກັບການດຳລົງຊີວິດຂອງປະຊາຊົນລາວບັນດາເຜົ່າ
ເຊິ່ງຍາມໃດ ພັກ-ລັດຖະບານ ແລະ ອົງການປົກຄອງທ້ອງຖິ່ນ ກໍຖືເປັນແຫລ່ງເສດຖະ ກິດສຳຄັນຂອງປະເທດ
ໂດຍໄດ້ເອົາໃຈໃສ່ຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ຢ່າງມີແຜນການ
ຕິດພັນກັບການສຶກສາອົບຮົມເຜີຍແຜ່ນິຕິກຳກ່ຽວຂ້ອງໃຫ້ປະຊາຊົນໄດ້ຮັບຊາບ
ແລະ ເຂົ້າຮ່ວມຢ່າງເປັນຂະບວນ. ແຕ່ຄຽງຄູ່ກັນນັ້ນ, ກໍຍັງສັງເກດເຫັນວ່າ:
ການກຳນົດເຂດຟື້ນຟູປ່າ, ການປ້ອງກັນໄຟລາມປ່າ, ການຕັດໄມ້ທຳລາຍປ່າແລະ ການສົ່ງເສີມເຕັກນິກ-ວິຊາການດ້ານແກ່ນພັນໄມ້
ບໍ່ທັນເອົາໃຈໃສ່ຈັດຕັ້ງປະຕິບັດໄດ້ດີເທົ່າທີ່ຄວນດັ່ງນັ້ນລັດຖະມົນຕີວ່າການກະຊວງກະສິກຳ
ແລະ ປ່າໄມ້ຈຶ່ງໄດ້ ອອກຄຳສັ່ງເລກທີ 0334 , ລົງວັນທີ 14 ກຸມພາ 2015 ,ເຖິງບັນດາຫົວໜ້າ
ຫ້ອງການ, ກົມ, ພະແນກກະ ສິກຳແລະປ່າໄມ້ແຂວງ, ນະຄອນຫຼວງ ແລະ ບັນດາສະຖາບັນອ້ອມຂ້າງກະຊວງກະສິກຳ
ແລະປ່າໄມ້, ຈົ່ງເພີ່ມທະວີການ ປ້ອງກັນ ແລະ ສະກັດກັ້ນໄຟໄໝ້ລາມປ່າ, ຕິດພັນກັບການກະກຽມຜະລິດເບ້ຍໄມ້,
ປູກ ໄມ້ ແລະ ພື້ນຟູປ່າໃນສົກປີ 2014-2015ໃຫ້ໄດ້ຮັບຜົນຄື:
1. ກ່ຽວກັບການປ້ອງກັນ ແລະ ສະກັດກັ້ນໄຟໄໝ້ລາມປ່າໃນເຂດປ່າຜະລິດ,
ປ່າປູກ ແລະ ປ່ານອກ ສາມປະເພດ: ໃຫ້ພະແນກກະສິກຳ ແລະ ປ່າໄມ້ປະຈຳແຂວງ ແລະ
ນະຄອນຫລວງ ຄົ້ນຄວ້າ ແລະ ນຳສະເໜີອົງການປົກຄອງແຂວງ, ນະຄອນຫລວງ ແຕ່ງຕັ້ງຄະນະຮັບຜິດຊອບຊີ້ນຳລວມ
ເຊິ່ງປະກອບດ້ວຍທ່ານຮອງເຈົ້າແຂວງ, ຮອງເຈົ້າຄອງນະຄອນ ເປັນປະທານ, ມີບັນດາພະແນກການກ່ຽວຂ້ອງຂັ້ນແຂວງ
ປະກອບເປັນຄະນະ ເພື່ອເຮັດໜ້າທີ່ເຜີຍແຜ່ແນະນຳກ່ຽວກັບການປ້ອງກັນ ແລະ ສະກັດກັ້ນໄຟໄໝ້ລາມປ່າ;
ວິທີປ້ອງກັນ ແລະ ສະກັດກັ້ນໄຟໄໝ້ລາມປ່າໃຫ້ຈັດຕັ້ງປະ ຕິບັດດັ່ງນີ້: ເຂດປ່າຜະລິດ,
ປ່າປູກ ແລະ ປ່ານອກສາມປະເພດ ທີ່ມີປະຊາຊົນອາໄສຢູ່ໃນ ແລະ ຢູ່ນອກ ເຊິ່ງຕິດພັນກັບການທຳມາຫາກິນ,
ທ່ອງທ່ຽວ ແລະ ອື່ນໆ ຕ້ອງປະຕິບັດຢ່າງເຂັ້ມງວດເຊັ່ນ: ການກໍ່ກອງໄຟ ຫລື ດັງໄຟ
ຕ້ອງດັງໃນບໍລິເວນທີ່ບໍ່ມີປ່າໄມ້ (ບ່ອນແປນ ຫລື ດານຫີນ), ຖ້າບໍ່ມີຕ້ອງຖາງອ້ອມຮອບບໍລິເວນກອງໄຟ
ແລະ ກ່ອນຈະຍ້າຍໜີຕ້ອງມອດໄຟໃຫ້ດັບເສຍກ່ອນ, ການຖິ້ມກິດກອກຢາຕ້ອງໄດ້ມອດເສຍກ່ອນ
ແລະ ຫ້າມຈູດປ່າຫຍ້າ ຫລື ອູດຕົ້ນໄມ້ເພື່ອລ່າສັດ ຫລື ຈຸດປະສົງອື່ນຢ່າງເດັດຂາດ;
ສວນປູກໄມ້ຂອງບຸກຄົນ, ນິຕິບຸກຄົນ ແລະ ການ ຈັດຕັ້ງລັດ ກໍຕ້ອງໄດ້ເອົາໃຈໃສ່ເປັນເຈົ້າການໃນການສ້າງແລວປ້ອງກັນໄຟລາມມາໄດ້ງ່າຍ
ແລະ ສະ ດວກໃນການມອດໄຟໃນເວລາເກີດໄຟໄໝ້; ເຂດເນື້ອທີ່ດິນທີ່ໄດ້ຈັດສັນໃຫ້ປະຊາຊົນທຳການຜະລິດ
ໃຫ້ແນະນຳປະຊາຊົນຮັບຮູ້ກ່ຽວກັບວິທີການປ້ອງກັນ ແລະ ຄວບຄຸມໄຟເຊັ່ນ: ກ່ອນຈະຈູດຕ້ອງໄດ້ຖາງແລ້ວປ້ອງກັນໄຟອ້ອມຮອບເນື້ອທີ່ດັ່ງກ່າວເສຍກ່ອນ ເພື່ອຮັບປະກັນບໍ່ໃຫ້ໄຟລາມໄປເຂດອື່ນ, ການຈູດຕ້ອງຕອນແລງ
ເວລາອາກາດບໍ່ຮ້ອນ ແລະ ບໍ່ມີລົມແຮງ; ໃນກໍລະນີມີໄຟໄໝ້ລາມປ່າຢູ່ເຂດຄວາມຮັບ
ຜິດຊອບຂອງບ້ານ ຫລື ເມືອງໃດ ແມ່ນມອບໃຫ້ບ້ານ ຫລື ເມືອງນັ້ນເປັນເຈົ້າການປຸກລະດົມຊ່ວຍກັນດັບມອດ,
ກໍລະນີໄຟໄໝ້ລາມປ່າຢ່າງຮຸນແຮງບໍ່ສາມາດດັບມອດໄດ້ຕ້ອງຂໍຄວາມຊ່ວຍເຫລືອຈາກປະ
ຊາຊົນ, ກຳລັງທະຫານ ແລະ ຕຳຫລວດທີ່ຢູ່ໃກ້ຄຽງ ເພື່ອຊ່ວຍກັນດັບມອດ. ຫ້ອງການກະສິກຳ
ແລະ ປ່າໄມ້ປະຈຳເມືອງ ຕ້ອງເປັນເຈົ້າການແກ້ໄຂ ພ້ອມທັງລາຍງານເຈົ້າເມືອງ,
ພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງ ແລະ ອົງ ການປົກຄອງເພື່ອຮັບຊາບ
ແລະ ມີວິທີການແກ້ໄຂຢ່າງທັນການ.
2. ສຳລັບການກະກຽມຜະລິດເບ້ຍໄມ້, ປູກໄມ້
ແລະ ຟື້ນຟູປ່າ ແມ່ນ:ໃຫ້ພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງ ຊີ້ນຳຂະແໜງປ່າໄມ້
ແລະ ຫ້ອງການກະສິກຳ ແລະ ປ່າໄມ້ປະຈຳເມືອງເອົາໃຈໃສ່ດັ່ງນີ້: ເພີ່ມທະວີຄວາມຮັບຜິດຊອບຕໍ່ການປະຕິບັດໃຫ້ບັນລຸຄາດໝາຍໂຕເລກແຜນການ
2014-2015 ທີ່ກະຊວງກະສິກຳ ແລະ ປ່າໄມ້ມອບໝາຍໃຫ້ ໂດຍມີການກວດກາ ແລະ ເກັບກຳຂໍ້ມູນເນື້ອທີ່ປ່າໄມ້ທີ່ໄດ້ຮັບການຟື້ນຟູ
ໄປພ້ອມໆກັບການກຳນົດຂອບເຂດ, ປັກຫລັກໝາຍ ແລະ ຕິດປ້າຍເຂດຟື້ນຟູປ່າໃຫ້ຈະແຈ້ງ
ແລະ ຊັດເຈນ; ເກັບກຳຄືນແຫລ່ງແກ່ນພັນໄມ້ທີ່ມີແລ້ວ ແລະ ແຫລ່ງແກ່ນພັນໄມ້ທີ່ພົບໃໝ່
ພາຍໃນແຂວງຂອງຕົນ ເພື່ອກຳນົດເປັນແຜນການໃນການຕອບສະ ໜອງແກ່ນພັນໄມ້ໃນແຕ່ລະປີ;
ກ່ຽວກັບການຜະລິດເບ້ຍໄມ້ ແມ່ນໃຫ້ເລັ່ງໃສ່ພັນໄມ້ພື້ນເມືອງທີ່ເໝາະກັບສະພາບພື້ນທີ່ຂອງແຕ່ລະທ້ອງຖິ່ນ
ເພື່ອເປົ້າໝາຍຟື້ນຟູປ່າ, ປົກປັກຮັກສາສິ່ງແວດລ້ອມ ແລະ ໃຫ້ມີເບ້ຍໄມ້ໄວ້ຕອບສະໜອງໃຫ້ແກ່ການປູກໄມ້ທັນກັບລະດູການ.
ສຳລັບໄມ້ອຸດສາຫະກຳ ແລະ ໄມ້ທີ່ເປັນເສດຖະກິດ ແມ່ນໃຫ້ຊຸກຍູ້ຜູ້ປະກອບການປູກໃສ່ໃນເນື້ອທີ່ດິນປ່າປອກໂຫລ້ນ
ແລະ ທີ່ດິນເປົ່າຫວ່າງທີ່ລັດຈັດສັນໃຫ້; ເກັບກຳຄືນການປູກໄມ້ໃນໄລຍະຜ່ານມາເຖິງປັດຈຸບັນ
ໂດຍໃຫ້ແຍກລະອຽດລະຫວ່າງສວນປູກໄມ້ຂອງພາກລັດ, ປະຊາຊົນ ແລະ ບໍລິສັດທີ່ມາລົງທຶນ
ທັງພາຍໃນ ແລະ ຕ່າງປະເທດ ເປັນຕົ້ນຈຳນວນເນື້ອທີ່ປູກ, ສະຖານທີ່ປູກ, ຊະນິດໄມ້ທີ່ປູກ,
ເນື້ອທີ່ທີ່ສາມາດເກັບຜົນຜະລິດໄດ້. ພ້ອມນັ້ນ ກໍດຳເນີນການຂຶ້ນທະບຽນສວນປູກໄມ້ທີ່ໄດ້ຕາມເງື່ອນໄຂ
ແລະ ລະບຽບການຂຶ້ນທະບຽນສວນປູກ ຕາມທີ່ໄດ້ກຳນົດໄວ້ໃນຄຳສັ່ງແນະນຳຂອງລັດຖະມົນຕີ
ເລກທີ 1849/ກປ.99, ລົງວັນທີ 7 ຕຸລາ 1999 ແລ້ວສະຫລຸບລາຍງານກົມປ່າໄມ້ຮັບຊາບເປັນແຕ່ລະໄລຍະ.
3. ໃຫ້ກົມປ່າໄມ້, ພະແນກກະສິກຳ ແລະ ປ່າໄມ້ປະຈຳແຂວງ,
ນະຄອນຫລວງ ແລະ ຫ້ອງການກະ ສິກຳ ແລະ ປ່າໄມ້ປະຈຳເມືອງ ສືບຕໍ່ເປັນເຈົ້າການໂຄສະນາເຜີຍແຜ່ເນື້ອໃນຕົ້ນຕໍຂອງກົດໝາຍວ່າດ້ວຍປ່າໄມ້
ແລະ ນິຕິກຳໃຕ້ກົດໝາຍກ່ຽວຂ້ອງໃຫ້ແກ່ພະນັກງານ, ທະຫານ, ຕຳຫລວດ, ພໍ່ຄ້າຊາວຂາຍ,
ຫົວໜ່ວຍບໍລິການ ຕະຫລອດຮອດປະຊາຊົນບັນດາເຜົ່າໃຫ້ຮັບຮູ້ ແລະ ເຂົ້າໃຈ, ຍົກໃຫ້ເຫັນຄວາມສຳຄັນຂອງປ່າໄມ້ຕໍ່ສິ່ງແວດລ້ອມທຳມະຊາດ,
ຕໍ່ຊີວິດການເປັນຢູ່ຂອງຄົນເຮົາ ແລະ ເຫັນໄດ້ເຖິງສະພາບການຫລຸດໜ້ອຍລົງຂອງປ່າໄມ້
ໂດຍຜ່ານສື່ຕ່າງໆຂອງລັດເຊັ່ນ: ໜັງ ສືພິມ, ໂທລະພາບ, ວິທະຍຸກະຈາຍສຽງ ແລະ ສື່ອື່ນໆຕາມຄວາມເໝາະສົມ.
4. ໃຫ້ກົມປ່າໄມ້, ພະແນກກະສິກຳ ແລະ ປ່າໄມ້ປະຈຳແຂວງ,
ນະຄອນຫລວງ, ຫ້ອງການກະສິກຳ ແລະ ປ່າໄມ້ປະຈຳເມືອງ ຕິດຕາມ ກ່ຽວກັບຜົນງານຂອງບຸກຄົນ,
ຄອບຄົວ, ລວມໝູ່, ກົມກອງ ແລະ ການຈັດຕັ້ງທີ່ມີຜົນງານດີເດັ່ນໃນການປະກອບສ່ວນເຫື່ອແຮງເຂົ້າໃນການຄຸ້ມຄອງ,
ບົວລະບັດຮັກສາ ແລະ ຟື້ນຟູປ່າ ລວມທັງການປ້ອງກັນການທຳ ລາຍປ່າໄມ້, ຕ້ານ ແລະ
ສະກັດກັ້ນໄຟໄໝ້ລາມປ່າ ເພື່ອສະເໜີຂັ້ນເທິງຍ້ອງຍໍ ແລະ ປະຕິບັດນະໂຍບາຍຕາມລະບຽບກົດໝາຍ.
5. ພາຍຫລັງໄດ້ຮັບຄຳສັ່ງສະບັບນີ້ແລ້ວ
ໃຫ້ຮີບຮ້ອນຈັດຕັ້ງເຜີຍແຜ່ ແລະ ແຕ່ງຕັ້ງຄະນະຮັບຜິດຊອບສະເພາະ, ກຳນົດພາລະບົດບາດຄວາມຮັບຜິດຊອບໃຫ້ເປັນອັນລະອຽດ
ເພື່ອຈັດຕັ້ງປະຕິບັດ, ພ້ອມທັງມີການສະຫລຸບລາຍງານຜົນການຈັດຕັ້ງປະຕິບັດໃຫ້ຂັ້ນເທິງຂອງຕົນໄດ້ຮັບຊາບຢ່າງເປັນປົກກະຕິ.
No comments:
Post a Comment