ເຈົ້າໜ້າທີ່ຄວບຄຸມ ແລະ ປາບປາມຢາເສບຕິດແຂວງຄຳມ່ວນໃຫ້ຮູ້ວ່າ:
ໃນອາທິດທີ່ຜ່ານມາ ປກສ ເມືອງທ່າແຂກ
ໄດ້ນຳກຳລັງເຂົ້າປິດລ້ອມເພື່ອຈັບກຸ່ມຜູ້ຄ້າຂາຍ ແລະ ມົ້ວສຸມຢາເສບຕິດ
ຢູ່ໜ່ວຍ 9 ບ້ານສົມສະໜຸກ ເມືອງທ່າແຂກ ແຂວງຄຳມ່ວນ, ຜ່ານການກວດຄົ້ນເຮືອນເປົ້າໝາຍພົບເຫັນຢາບ້າ
ຈຳນວນ 14 ເມັດ ຈຶ່ງໄດ້ກັກໂຕເຈົ້າຂອງເຮືອນ ຊື່ ທ້າວ ຕາມົນ ອາຍຸ 60 ປີ ພ້ອມໄວຫນຸ່ມມົ້ວສຸມສິ່ງເສບຕິດ
102 ຄົນ, ຍິງ 3 ຄົນມາດຳເນີນຄະດີຕາມລະບຽບກົດ ໝາຍ.
ເຈົ້າໜ້າທີ່ ປກສ ເມືອງທ່າແຂກ ເປີດເຜີຍວ່າ:
ພາຍຫຼັງທີ່ໄດ້ຮັບລາຍງານຈາກປະຊາຊົນພົນລະເມືອງດີ: ມີໄວໜຸ່ມຈຳນວນໜຶ່ງຂີ່ລົດເຂົ້າ-
ອອກ ເຮືອນດັ່ງກ່າວເປັນປະຈຳ ພ້ອມທັງສົ່ງສຽງເນື່ອງນັນລົບກວນຊາວບ້ານທີ່ຢູ່ອ້ອມຂ້າງ
ເຊິ່ງສົງໄສວ່າມີການມົ້ວສຸມຢາເສບຕິດ ຈຶ່ງລົງໄປກວດກາ ແລະ ພົບເຫັນວ່າມີມູນຄວາມຈິງແທ້.
ມາຮອດວັນທີ 25 ກຸມພາ 2015 ຈຶ່ງນຳກຳລັງເຂົ້າປິດລ້ອມເຮືອນດັ່ງກ່າວ ແລະ ຜ່ານການກວດຄົ້ນພົບຢາບ້າ
ຈຳນວນ 14 ເມັດ ຈາກນັ້ນກໍໄດ້ເຂົ້າກັກ
ຕົວຜູ້ເຂົ້າມາມົ້ວສຸມສິ່ງເສບຕິດດັ່ງກ່າວ
ແລະ ໄດ້ລົດຈັກ 75 ຄັນ ແລະ ອຸປະກອນເສບຢາອີກຈຳັນວນໜຶ່ງ ເພື່ອມາດຳເນີນຄະດີ.
ທ້າວ ຕາມົນ ຜູ້ຖືກຫາຄະດີຄ້າຂາຍຢາເສບຕິດຮັບສາລະພາບວ່າ: ຢາບ້າຈຳນວນ 14 ເມັດ
ເປັນຂອງຜູ້ກ່ຽວແທ້ ເຊິ່ງໄດ້ຊື້ມາເພື່ອຂາຍໃຫ້ໄວລຸ້ນໃນຂອບເຂດເທດສະບານເມືອງ
ທ່າແຂກ ໃນລາຄາເມັດລະ 20 -25 ພັນກີບ ໂດຍໃຊ້ເຮືອນຂອງຕົນເປັນບ່ອນຂາຍ
ແລະ ມົ້ວສຸມຢາບ້າ.
ປັດຈຸບັນຄະດີດັ່ງກ່າວພວມຢູ່ໃນຂັ້ນຕອນເລັ່ງສອບສວນສືບສວນ
ຂອງເຈົ້າໜ້າທີ່ເພື່ອຊັກທອດຜູ້ຕ້ອງຫາມາດຳເນີນຄະດີຕາມລະບຽບກົດໝາຍໃຫ້ໄດ້ໂດຍໄວນີ້.
No comments:
Post a Comment