ໃນວັນທີ 26 ກຸມພາຜ່ານມາ, ທ່ານ ດຣ. ບຸນປອນ ບຸດຕະນະວົງ
ຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດມະຫາພາກ ແລະ ບໍລິການ ພ້ອມຄະນະ ໄດ້ລົງຊີ້ນໍາໂຄງການພັດທະນາເຂດເສດຖະກິດສະເພາະບໍ່ເຕັນແດນງາມ ຢູ່ແຂວງຫລວງນ້ຳທາ
ໂດຍມີທ່ານ ພິມມະສອນ ເລືອງຄໍາມາ ເຈົ້າແຂວງຫລວງນ້ຳທາ ແລະ
ຄະນະ ໃຫ້ກຽດຕ້ອນຮັບດ້ວຍຄວາມອົບອຸ່ນ.
ທ່ານ ດຣ. ບຸນປອນ
ບຸດຕະນະວົງ ໄດ້ໂອ້ລົມ ແລະ ໃຫ້ທິດຊີ້ນໍາຕໍ່ຄະນະສະພາບໍລິຫານເຂດເສດຖະກິດດັ່ງກ່າວວ່າ: ໃຫ້ເອົາໃຈໃສ່ປະສານສົມທົບກັບເຂດໃກ້ຄຽງຮັກສາຄວາມສະຫງົບປອດໄພ, ຜູ້ພັດທະນາຕ້ອງສ້າງແບບແຜນໂຄງການພັດທະນາທີ່ລະອຽດ, ປະກອບສ່ວນກະຕຸກຊຸກຍູ້ການຮ່ວມມືກັບເຂດບໍ່ຫານ ສປ
ຈີນ-ບໍ່ເຕັນ ສປປ ລາວ ໃຫ້ດີຂຶ້ນ ແລະ ເອົາໃຈໃສ່ສຶກສາອົບຮົມການເມືອງແນວຄິດໃຫ້ຜູ້ຮ່ວມພັດທະນາ,
ຜູ້ລົງທຶນ, ຜູ້ປະ ກອບການເຊື່ອມຊຶມລະບຽບກົດໝາຍ, ແບບແຜນວິທີເຮັດວຽກ ແລະ ວີທີການນໍາພາຂອງພັກ-ລັດຖະບານລາວໃຫ້ເລິກເຊິ່ງ ເຮັດໃຫ້ເຂດເສດຖະກິດສະເພາະບໍ່ເຕັນແດນງາມເປັນໃຈກາງຂອງເຂດບໍລິການ
ແລະ ທ່ອງທ່ຽວດີທີ່ສຸດແຫ່ງໜຶ່ງຂອງ ສປປ ລາວ
ກໍຄືແຂວງຫລວງນ້ຳທາ.
ເຂດເສດຖະກິດສະເພາະບໍ່ເຕ່ນແດນງາມມີ 16 ຫົວໜ່ວຍການລົງທຶນ ແລະ 50 ຫົວໜ່ວຍການບໍລິການຍ່ອຍ ໄດ້ແບ່ງເປັນ 4 ເຂດພັດທະນາຄື: ເຂດປະຕູຫລັກເມືອງເປັນເຂດຮ້ານປອດພາສີ-ສະຖານີຈອດລົດໂດຍສານທ່ອງທ່ຽວ ແລະ ໂຮງແຮມ; ເຂດບ້ານວັດທະນະທໍາ-ຊົນເຜົ່າ ແລະ
ສະໝາມກ໊ອຟ; ເຂດໜອງນ້ຳທໍາມະຊາດເປັນສະຖານທີ່ບັນເທີງ, ພັກຜ່ອນຍ່ອນອາລົມ
ປະກອບມີເຮືອນພັກ, ໂຮງແຮມ, ຫ້ອງສໍາມະນາ ແລະ
ຫ້ອງປະຊຸມອື່ນໆ, ສ່ວນເຂດສາງພັກ-ຄ່ຽນຖ່າຍສິນຄ້າ ແລະ ກັດກັນພືດ ເພື່ອນໍາເຂົ້າ-ສົ່ງອອກ ເຊິ່ງຜູ້ພັດທະນາໄດ້ສືບຕໍ່ລົງທຶນກໍສ້າງພື້ນ ຖານໂຄງລ່າງ ຕໍ່ເນື່ອງດີຂຶ້ນ
ເປັນຕົ້ນ ສ້າງອ່າງເກັບນ້ຳເປັນແຫລ່ງ ທ່ອງທ່ຽວ, ສ້າງຫ້ອງການເຮັດວຽກຂອງເຈົ້າໜ້າທີ່, ເດີ່ນຈອດລົດບັນທຸກໜັກ, ສ້າງທາງເບຕົງ, ຂົວ ແລະ ປ້ຳນ້ຳມັນ,
ສ້າງ ແລະ ຕົບແຕ່ງຮ້ານຄ້າປອດພາສີ, ຕັດແລວທາງ ແລະ ປູເສັ້ນທາງເບຕົງຍາວ 2
ກິໂລແມັດ, ປັບປຸງຕຶກອາຄານຫ້ອງການເຮັດວຽກ, ຫໍວັດທະນະທໍາສະແດງສິລະປະ, ສ້າງປ້ອມສີດຢາຂ້າເຊື້ອລົດເຂົ້າປະເທດ, ຕິດຕັ້ງໄຟຟ້າເຍືອງທາງ, ຮັກສາປ່າໄມ້ທໍາມະຊາດ ເປັນແຫລ່ງທ່ອງທ່ຽວທີ່ມີສາຍທາງຂົວອູ່ໄປຕາມປ່າໄມ້ໃຫຍ່, ສ້າງເດີນສະແດງສິລະປະກາງແຈ້ງ ແລະ ອື່ນໆ ເຊິ່ງ 4
ເຂດພັດທະນາດັ່ງກ່າວມີເນື້ອທີ່ ທັງໝົດ1.640
ເຮັກຕາ, ມີມູນຄ່າການລົງທຶນເບື້ອງຕົ້ນຫລາຍກວ່າ 153 ລ້ານໂດລາສະຫະລັດ.
No comments:
Post a Comment