ໃນເວລາປະມານ 7:15
ໂມງຂອງວັນທີ 26 ພຶດສະພານີ້, ຢູ່ທ່າບັກບ້ານນາບົງ ເມືອງປາກງື່ມ ນະຄອນຫລວງວຽງຈັນ
ໄດ້ເກີດເຫດເຮືອລໍາໜຶ່ງລົ່ມລົງກາງແມ່ນ້ຳງື່ມເຮັດໃຫ້ຜູ້ທີ່ຂຶ້ນເຮືອເພື່ອຂ້າມໄປອີກຝາກໜຶ່ງນັ້ນຈົມນ້ຳໄປພ້ອມໆກັບເຮືອບັກລຳດັ່ງກ່າວ.
ຮອງຫົວໜ້າພະແນກສືບສວນ-ສອບສວນ ນະຄອນຫລວງວຽງຈັນ
ໃຫ້ຮູ້ວ່າ:
ກ່ອນເກີດເຫດໄດ້ມີຜູ້ໂດຍສານຂຶ້ນເຮືອລຳດັ່ງກ່າວປະມານ 40 ຄົນ,
ໃນນັ້ນ ມີນັກຮຽນກຳລັງຈະໄປສອບເສັງຊັ້ນປະຖົມປີທີ 5 ມີ 35 ຄົນ, ຄູຕິດຕາມ 4 ຄົນ ແລະ ຄົນຂັບເຮືອ 1 ຄົນ, ພ້ອມດ້ວຍລົດຈັກອີກ 1 ຄັນ, ເຮືອລຳດັ່ງກ່າວເປັນເຮືອໂດຍສານຂະໜາດນ້ອຍ ແລະ ມື້ເກີດເຫດມີຜູ້ໂດຍສານຂຶ້ນເຮືອຫລາຍກວ່າປົກກະຕິ, ພໍເຮືອອອກຈາກທ່າໄປຮອດກາງແມ່ນ້ຳງື່ມໄດ້ເກີດພິກຂວໍ້າ ແລ້ວຈົ່ມລົງຕໍ່ໜ້າຕໍ່ຕາ
ຂອງປະຊາຊົນຢູ່ເຂດດັ່ງກ່າວຢ່າງບໍ່ຄາດຄິດມາກ່ອນ ແລະ ໃນຂະນະນັ້ນຜູ້ໂດຍສານຈຳນວນ
30 ຄົນສາມາດຊ່ວຍໂຕເອງໄດ້ ໂດຍການລອຍໄປຕາມນ້ຳ ຫລັງຈາກນັ້ນ ໄດ້ມີເຮືອຊາວບ້ານຢູ່ເຂດນັ້ນ ອອກໄປຊ່ວຍເຫລືອ ແລະ ມີອີກ 10 ຄົນທີ່ຈົມລົງໄປໃນແມ່ນ້ຳດັ່ງກ່າວຄື: ນາງ ກຸ້ງ ອໍາພອນ, ນາງ ກົມ ອຳ ພອນ,
ນາງ ແພ ຕາເຫີ, ນາງ ຄັດຕີ ຈານສີ, ນາງ ປູນາ ຈານສີ, ທ້າວ ແສງຈັນ ແປະ, ນາງ ສີລຽນ, ທ້າວ ວາດສະໜາ ສັງວານ, ນາງໝີ ເສົາທອງ ແລະ
ນາງ ປະທຸມມາ ສົມຄິດ ຊຶ່ງປັດຈຸບັນ ເຈົ້າໜ້າທີ່ກຳລັງເລັ່ງຊ່ວຍເຫລືອເພື່ອກູ້ເອົາສົບຂອງຜູ້ສູນຫາຍຂຶ້ນມາ. ສ່ວນຄົນຂັບເຮືອລຳດັ່ງກ່າວ ເຈົ້າໜ້າທີ່ໄດ້ກັກຕົວໄວ້ເພື່ອດຳເນີນຄະດີຕາມລະບຽບກົດໝາຍ. ອຸປະຕິເຫດດັ່ງກ່າວໃຫ້ເປັນອຸທາຫອນ ເຕືອນໃຫ້ເຮືອໂດຍສານທຸກໆລຳບໍ່ຄວນຖືເບົາໃນການຮັກສາຄວາມປອດໄພ ແລະ ເຮືອທຸກໆລໍາຕ້ອງມີເສື້ອຊູຊີບ ຫລື
ກົງເບັງ ທີ່ພຽງພໍກັບຜູ້ໂດຍສານໄວ້ຮອງຮັບເຫດຮ້າຍຕ່າງໆໃຫ້ດີກວ່າເກົ່າ.
No comments:
Post a Comment