ກອງປະຊຸຸມໄດ້ທົບທວນຄືນຜົນສຳເລັດຂອງການຮ່ວມມືດ້ານການຄ້າ-ການລົງທຶນຂອງສອງຝ່າຍໃນໄລຍະຜ່ານມາ, ເຊິ່ງເຫັນວ່າມີຕົວເລກເພີ່ມຂຶ້ນໃນແຕ່ລະປີ,ໂດຍສະເພາະການຮ່ວມມືດ້ານການຄ້າໃນປີ 2014 ຜ່ານມາມີການຂະຫຍາຍ ຕົວຢ່າງຕໍ່ເນື່ອງ, ສາມາດບັນລຸມູນຄ່າ 3,61
ຕື້ໂດລາສະຫະລັດ, ເພີ່ມຂຶ້ນ
31%. ໃນນີ້ການສົ່ງອອກສິນຄ້າຂອງລາວໄປຈີນບັນລຸ
1,77 ຕື້ໂດລາສະຫະລັດ, ເພີ່ມຂຶ້ນ 27%
ຖືເປັນຄູ່ຄ້າອັນ
ດັບໜຶ່ງກວມ
46% ຂອງມູນຄ່າສົ່ງອອກທັງໝົດ ແລະ ການນຳເຂົ້າສິນຄ້າຈາກ ສປ
ຈີນບັນລຸ 1,84
ຕື້ໂດລາສະຫະລັດ, ເພີ່ມຂຶ້ນກວ່າ 7% ກວມ 27% ຂອງມູນຄ່ານຳເຂົ້າຂອງລາວຈາກຕ່າງປະເທດ. ສຳລັບການລົງທຶນຂອງ ສປ ຈີນ
ຢູ່ລາວຮອດເດືອນມີນາ 2015 ມີ 758 ໂຄງການ, ລວມມູນຄ່າ 6,6 ຕື້ໂດລາສະຫະລັດ, ໃນນີ້ມີທຶນສົມທົບພາຍໃນ 1,3 ຕື້ໂດລາສະຫະລັດ, ສ່ວນໃຫຍ່ແມ່ນການລົງທຶນໃນຂະແໜງບໍ່ແຮ່-ພະລັງງານໄຟຟ້າ
ແລະ ເປັນອັນດັບໜຶ່ງຂອງການລົງທຶນຕ່າງປະເທດຢູ່ລາວໃນປັດຈຸບັນ.
ໃນສົກປີ 2014-2015 ລັດຖະບານຈີນ,
ໄດ້ໃຫ້ການຊ່ວຍເຫລືອແກ່ລາວມີມູນຄ່າທັງໝົດ 1,51 ຕື້ຢວນ, ໃນນັ້ນຊ່ວຍເຫລືອລ້າ 700 ລ້ານຢວນ, ເງິນກູ້ບໍ່ມີດອກເບ້ຍ 200
ລ້ານຢວນ ແລະ ເງິນກູ້ພິເສດດອກເບ້ຍຕ່ຳປະມານ 600 ລ້ານກວ່າຢວນ, ມາຮອດປັດຈຸບັນໂຄງການຮ່ວມມືຕ່າງໆສ່ວນໃຫຍ່ແມ່ນໄດ້ຮັບການຈັດຕັ້ງປະຕິບັດເປັນຢ່າງດີ ແລະ ມີປະສິດທິຜົນເຊັ່ນ:
ໂຄງການດາວທຽມລາວ, ການກໍ່ສ້າງອາຄານສູນກາງພັກ, ກໍ່ສ້າງຊົນລະກະເສດ ເຊສະລາລອງ, ການພັດທະນາກວມລວມໄຊເສດຖານະຄອນຫລວງວຽງຈັນ, ການປັບປຸງ ແລະ ຂະຫຍາຍນ້ຳປະປາດົງໝາກຄາຍ, ການກໍ່
ສ້າງ ແລະ ຍົກລະດັບທາງຫລວງແຫ່ງຊາດ 1A ບຸນເໜືອ-ລານຕຸຍ, ເສັ້ນທາງ
13 ເໜືອເມືອງໄຊ-ປາກມອງ, ໂຄງການສາຍສົ່ງໄຟຟ້າ ແລະ ອື່ນໆ, ອັນໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງລາວດີຂຶ້ນເປັນກ້າວໆ.
ນອກຈາກນີ້, ກອງປະຊຸມຍັງໄດ້ຍົກໃຫ້ເຫັນບັນຫາທີ່ສອງຝ່າຍມີຄວາມສົນໃຈ ເປັນຕົ້ນ: ຝ່າຍຈີນຍິນດີຊຸກຍູ້ສົ່ງເສີມຂໍ້ລິເລີ່ມກ່ຽວກັບເສັ້ນທາງສາຍໄໝທາງທະເລ ແຫ່ງສັດຕະວັດທີ 21 ໃຫ້ເຊື່ອມໂຍງເຂົ້າກັບແຜນພັດທະນາເສດຖະກິດ-ສັງຄົມຂອງລາວ, ການຮ່ວມມືເຊື່ອມໂຍງ-ເຊື່ອມຈອດໂຄງການເສັ້ນທາງລົດໄຟລາວ-ຈີນ, ໂດຍຈະຊຸກຍູ້ໃຫ້ໄດ້ຮັບການກໍ່ສ້າງໃນໄລຍະດຽວກັບການກໍ່ສ້າງເບື້ອງຂອງຈີນໃນເດືອນຕຸລາ 2015
ນີ້ເພື່ອເປັນຂອງຂວັນແກ່ວັນສະຖາປະນາ ສປປ ລາວຄົບ ຮອບ 40 ປີ, ລວມເຖິງການສ້າງແຜນແມ່ບົດການຮ່ວມມືດ້ານເສດຖະກິດ-ເຕັກນິກລະຫວ່າງລັດຖະບານລາວ ແລະ ຈີນ 5 ປີຄັ້ງທີ 2 ແຕ່ 2016-2020 ໃຫ້ສໍາເລັດ.
No comments:
Post a Comment