ກອງປະຊຸມຄະນະກຳມະການຊາຍແດນຮ່ວມລາວ-ຈີນ ຄັ້ງທີ XIII
ໄດ້ຈັດຂຶ້ນໃນລະຫວ່າງວັນທີ 11-15 ພຶດສະພານີ້
ຢູ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານ ແພງສະຫວັນ ແກ້ວປະເສີດ ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດຂອງລາວ, ທັງເປັນຫົວໜ້າຄະນະກຳມະການຊາຍແດນຮ່ວມລາວ-ຈີນ ແລະ
ທ່ານ ເຫີ ເຫຍີ່ຍ ຮອງຫົວໜ້າກົມກິດຈະການຊາຍແດນ ແລະ
ທະເລ
ກະຊວງການຕ່າງປະເທດຂອງຈີນ ທັງເປັນຫົວໜ້າຄະນະກຳມະການຊາຍແດນຮ່ວມຈີນ-ລາວ.
ໃນກອງປະຊຸມຄັ້ງນີ້ ສອງຝ່າຍ ໄດ້ສະແດງຄວາມປິຕິຍິນດີຕໍ່ສາຍພົວພັນອັນດີງາມຂອງທັງສອງປະເທດທີ່ໄດ້ມີການຂະຫຍາຍຕົວຂຶ້ນສູ່ລະດັບສູງ ໂດຍສະເພາະຢ່າງຍິ່ງແມ່ນການແລກປ່ຽນຢ້ຽມຢາມເປັນທາງການເຊິ່ງກັນ
ແລະ ກັນ ຂອງຄະນະຜູ້ແທນຂັ້ນສູງຂອງພັກ-ລັດ.
ໃນກອງປະຊຸມຄັ້ງນີ້ ສອງຝ່າຍໄດ້ພ້ອມກັນສັງເກດຕີລາຄາຄືນຜົນການຈັດຕັ້ງປະຕິບັດເນື້ອໃນບົດບັນທຶກກອງປະຊຸມຄະນະກຳມະການຊາຍແດນຮ່ວມລາວ-ຈີນ
ຄັ້ງທີ XII ໃນໄລຍະຜ່ານມາ, ເຊິ່ງທັງສອງຝ່າຍ ໄດ້ເຫັນດີເປັນເອກະພາບກັນວ່າສະພາບຕາມບໍລິເວນຊາຍແດນແມ່ນມີຄວາມສະຫງົບໂດຍພື້ນຖານ, ໄດ້ມີການຮ່ວມືຄຸ້ມຄອງ ແລະ ປະຕິບັດກົດໝາຍເປັນຢ່າງດີ, ການຮ່ວມມືຂັ້ນສູນກາງ ແລະ
ທ້ອງຖິ່ນຂອງທັງສອງຝ່າຍກໍໄດ້ມີການຂະຫຍາຍຕົວສູງ, ຊຶ່ງທັງສອງຝ່າຍໄດ້ມີການພົບປະກັນຢ່າງເປັນປົກກະຕິ, ໄດ້ຮ່ວມສະກັດກັ້ນ ແລະ ແກ້ໄຂປາກົດການຫຍໍ້ທໍ້, ເປັນຕົ້ນການຄ້າຂາຍເຖື່ອນ, ການຄ້າຂາຍຢາເສບຕິດ, ຊຶ່ງໄດ້ຮັບໝາກຜົນຂຶ້ນເທື່ອລະກ້າວ. ນອກຈາກນັ້ນ
ສອງຝ່າຍຍັງໄດ້ມີການຊ່ວຍເຫລືອເຊິ່ງກັນ ແລະ ກັນ ໄດ້ຮ່ວມກັນຊຸກຍູ້ສົ່ງເສີມທາງດ້ານເສດຖະກິດ,
ການຄ້າ ແລະ ການທ່ອງທ່ຽວຕາມບໍລິເວນຊາຍແດນໃຫ້ນັບມື້ນັບມີການຂະຫຍາຍຕົວຢ່າງບໍ່ຢຸດຢັ້ງ. ສອງຝ່າຍໄດ້ເປັນເອກະພາບກັນກ່ຽວກັບມາດຕະການສະກັດກັ້ນບັນຫາປະກົດການຫຍໍ້ທໍ້ ທີ່ເກີດຂຶ້ຶ້ນຕາມບໍລິເວນຊາຍແດນລາວ-ຈີນໃຫ້ທັນການ ແລະ
ມີປະສິດທິຜົນຫລາຍກວ່າເກົ່າ, ພ້ອມກັນນັ້ນ
ສອງຝ່າຍຍັງໄດ້ປຶກສາຫາລືປັບປຸງກົນໄກການເຮັດວຽກຢູ່ດ່ານສາກົນບໍ່ເຕັນ-ບໍ່ຫານ ເພື່ອອຳນວຍຄວາມສະດວກໃຫ້ການເຂົ້າອອກຂອງຄົນ ແລະ ພາຫະນະໃຫ້ມີຄວາມສະດວກ.
ຜົນສຳເລັດຂອງກອງປະຊຸມຄັ້ງນີ້ ເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ມີມູນເຊື້ອອັນດີງາມລະຫວ່າງສອງປະເທດທີ່ມີມາແຕ່ບູຮານນະການ, ທັງເປັນການປະກອບສ່ວນເຂົ້າໃນການປົກປັກຮັກສາ ແລະ
ສ້າງເສັ້ນຊາຍແດນຂອງສອງປະເທດ ໃຫ້ກາຍເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືອັນຍາວນານຕະຫລອດການ.
No comments:
Post a Comment