5 ປີຜ່ານມາກະສິກຳນະຄອນຫຼວງມີຜົນສຳເລັດຫຼາຍດ້ານ

ກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາກະສິກຳ ແລະ ປ່າໄມ້ຂອງພະແນກກະສິກຳ ແລະ ປ່າ ໄມ້ນະຄອນຫຼວງວຽງຈັນໃນ 5 ປີຜ່ານມາ( 2011-2015 )ໄດ້ຈັດຂື້ນເມື່ອ ບໍ່ດົນມານີ້, ຊຶ່ງທ່ານຫົວຫ້າພະແນກດັ່ງ ກ່າວລາຍງານໃຫ້ຮູ້ວ່າ: ການຈັດຕັ້ງປະຕິບັດແຜນ ພັດທະນາກະສິກຳໄລຍະຜ່ານມາຂອງຂະແໜງການຕົນມີຜົນສຳ ເລັດຫຼາຍດ້ານເປັນຕົ້ນແມ່ນ: ໂຄງການປູກເຂົ້າສາມາດຜະລິດໄດ້ 1,6 ລ້ານກວ່າໂຕນ, ເທົ່າກັບ 93 % ຂອງແຜນ ການ, ສະເລ່ຍ 360 ກິໂລເຂົ້າເປືອກຕໍ່ຄົນຕໍ່ປີ, ພຽງພໍກັບຄວາມຕ້ອງການ, ພ້ອມຍັງມີແຮ່ໄວ 22 ພັນກວ່າໂຕນ/ປິ, ໂຄງການ ປູກຜັກປະຕິບັດໄດ້ 591 ພັນກວ່າໂຕນເທົ່າກັບ 95,94%, ສະເລ່ຍໃສ່ຫົວຄົນປະຕິບັດໄດ້ 132 ກິໂລຕໍ່ຄົນຕໍ່ປີ, ພຽງພໍ ໂດຍພື້ນຖານ, ໂຄງການປູກມັນຕົ້ນເປັນສິນຄ້າສາມາດຜະລິດໄດ້ 453.200 ໂຕນ, ໃນເນື້ອທີ 14.700 ເຮັກຕາ, ຫຼຸດແຜນການ 38%, ໂຄງການລ້ຽງງົວເປັນສິນຄ້າມາຮອດປັດຈຸບັນມີງົວທັງໝົດ 69 ພັນກວ່າໂຕ, ມີ 41 ຄອບຄົວທີ່ມີ

ທ່າກ້າວຈະລ້ຽງແບບເປັນຟາມ, ໂຄງການລູກໝູເປັນສິນຄ້າມາຮອດປັດຈຸ ບັນມີຟາມໝູ 155 ຟາມ, ມີໝູຈຳນວນ 110 ພັນກວ່າໂຕ, ຖືວ່າເປັນການຂະຫຍາຍຕົວດີພໍ ສົມຄວນ, ໂຄງການລ້ຽງສັດປີກກໍມີທ່າຂະຫຍາຍຕົວດີພໍສົມຄວນ, ມາຮອດປັດຈຸບັນມີເຖິງ 161 ຟາມ, ສາມາດຕອບສະໜອງຊີ້ນ, ໄຂ່ໃຫ້ຕະຫຼາດໄດ້ເປັນຢ່າງດີ, ສ່ວນການລ້ຽງປາກະ ຊັງມາຮອດປັດຈຸບັນມີທັງໝົດ 3.136 ກະຊັງ, ສາມາດສະໜອງປາໄດ້ 41 ໂຕນຕໍ່ມື້, ເຫັນວ່າປະຕິບັດໄດ້ລື່ນແຜນການ, ສັງລວມເຫັນວ່າການສະໜອງທາດຊີ້ນ, ປາ, ໄຂ່, ໃນໄລຍະ 5 ປີຜ່ານມາແມ່ນປະຕິບັດໄດ້ໂດຍພື້ນ ຖານ, ເຖິງຢ່າງໃດກໍຕາມ ກໍຍັງມີບາງວຽກງານ ທີ່ຍັງບໍ່ທັນ ເຮັດໄດ້ດີເທົ່າທີ່ຄວນ, ຊຶ່ງໄດ້ຈະສືບຕໍ່ຈັດຕັ້ງປະຕິບັດໃນແຜນພັດທະນາຄັ້ງຕໍ່ໄປ ເຊັ່ນ: ວຽກ ງານຜະລິດສະບຽງອາຫານ, ຜະລິດເປັນສິນຄ້າ, ພ້ອມນັ້ນກໍຈະສຸມໃສ່ວຽກງານຟື້ນຟູ ແລະ ກໍ່ສ້າງຊົນລະປະທານ ແລະ ແຜນງານຄຸ້ມຄອງປ່າໄມ້ແບບຍືນຍົງ ແລະ ວຽກງານອື່ນໆໃຫ້ໄດ້ຕາມຄາດໝາຍກຳນົດໄວ້.