ລາວຮັບຮອງການກວດກາ-ຕີ​ລາຄາມາດຕະຖານຄວາມທຸກຍາກ ແລະ ພັດທະນາ

ກອງປະຊຸມຮັບຮອງການກວດກາ-ຕີ​ລາຄາມາດຕະຖານຄວາມທຸກຍາກ ແລະ ມາດຕະຖານການພັດທະນາຢູ່ລາວນັບ ແຕ່ປີ 2011-2015 ໄດ້ມີຂຶ້ນແຕ່ວັນທີ 22-23 ມິຖຸນານີ້ຢູ່ສູນການຝຶກອົບຮົມ ແລະ ການຮ່ວມມືສາກົນ (ITCT) ນະຄອນ ຫລວງວຽງຈັນ, ໂດຍການເປັນປະທານຂອງທ່ານ ບຸນເຮືອງ ດວງພະຈັນ ລັດຖະມົນຕີປະຈຳຫ້ອງວ່າການລັດຖະບານ, ຫົວ ໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ແລະ ໃຫ້ກຽດເຂົ້າຮ່ວມຂອງທ່ານ ອາຊາງ ລາວລີ ຮອງນາຍົກລັດຖະມົນຕີ, ຜູ້ຊີ້ນຳວຽກງານການປົກຄອງ, ມີບັນດາລັດຖະມົນຕີ, ເຈົ້າ ແຂວງ ແລະ ພະນັກງານກ່ຽວ ຂ້ອງເຂົ້າຮ່ວມເປັນຈຳຫລາຍ.

    ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໄດ້ກ່າວເປີດກອງປະຊຸມວ່າ: ການແກ້ໄຂ ຄວາມທຸກຍາກຢູ່ປະເທດເຮົາໄດ້ກາຍເປັນນະໂຍບາຍສຳຄັນທີ່ລັດຖະບານໄດ້ຮັບຮອງເອົາເປັນເປົ້າໝາຍສະຫັດສະວັດດ້ານການພັດທະນາປະເທດ, ການກວດກາ-ຕີ ລາຄາດ້ານການພັດທະນາໂດຍສະເພາະແມ່ນຜົນຂອງການສ້າງບ້ານນ້ອຍ ໃນຊົນນະບົດຢ່າງເປັນລະບົບເອ ກະພາບໃນທົ່ວປະເທດແມ່ນເລີ່ມຂຶ້ນໃນປີ 2011 ແລະ ໄດ້ສືບຕໍ່ຈັດຕັ້ງປະຕິບັດມາແຕ່ລະປີ ແລະ ແຕ່ປີ 2011 -2015 ແມ່ນໄດ້ມີການກວດກາທັງໝົດ 5 ຄັ້ງ ແລະ ຄັ້ງສຸດທ້າຍແມ່ນການກວດກາ-ຕີ​ລາຄາຄວາມທຸກຍາກ ແລະ ການພັດທະນາ 5 ປີ, ເຊິ່ງໄດ້ສຳເລັດຜົນໃນ 1.162.082 ຄອບຄົວ,8.466 ບ້ານ,148 ເມືອງໃນ 17 ແຂວງ ແລະ ນະຄອນຫລວງວຽງຈັນ ແລະ ໄລຍະການຈັດຕັ້ງປະຕິບັດດຳລັດວ່າດ້ວຍມາດຕະຖານຄວາມທຸກຍາກ ແລະ ມາດຕະຖານການພັດທະນາ 2011-2015 ໄດ້ສິ້ນສຸດລົງແລ້ວ, ດັ່ງນັ້ນ ຈຶ່ງຕ້ອງໄດ້ມີການກວດກາ-ຕີ​ລາຄາຜົນຄວາມທຸກ ແລະ ການພັດທະນາ 5 ປີເພື່ອລາຍງານລັດຖະ ບານຮັບຮອງເອົາຢ່າງເປັນທາງການ, ປະກອບສ່ວນສະໜອງຂໍ້ມູນໃສ່ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະ ບົດລາຍງານການເມືອງຂອງກອງປະຊຸມໃຫຍ່ຄັ້ງທີ 10 ຂອງພັກ, ທັງເປັນພື້ນຖານບ່ອນອິງໃຫ້ແກ່ການສ້າງໂຄງການ, ແຜນການໃນການແກ້ໄຂຄວາມທຸກຍາກ ແລະ ພັດທະ ນາທ້ອງຖິ່ນຮາກຖານ, ພ້ອມທັງປືກສາຫາລືການປັບປຸງມາດ ຕະຖານຄວາມທຸກຍາກ ແລະ ການພັດທະນາໃນໄລຍະ 2016-2020 ເພື່ອສືບຕໍ່ຊຸກຍູ້, ຕິດຕາມ, ກວດກາວຽກງານການ ສ້າງຮາກຖານການເມືອງພັດທະນາຊົນນະບົດ ແລະ ລຶບລ້າງຄວາມທຸກຍາກຕິດພັນກັບການສ້າງບ້ານໃຫ້ກາຍ ເປັນຫົວໜ່ວຍ ພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດຕາມ 4 ເນື່ອໃນ 4 ຄາດໝາຍ.

     ທ່ານ ສົມສະນິດ ສຸວັນນະລາດ ລັດຖະມົນຕີຊ່ວຍປະຈຳຫ້ອງວ່າການລັດຖະບານ, ຮອງຫົວໜ້າຄະນະພັດທະນາຊົນ ນະບົດ ແລະ ລຶບລ້າງຄວາມທຸກຍາກຂັ້ນສູນກາງລາຍງານໃຫ້ຮູ້ວ່າ: ໃນປີ 2015 ມີຈຳນວນຄອບຄົວທັງໝົດ 1.162.486 ຄອບຄົວ, ທຽບໃສ່ປີ 2011 ເພີ່ມຂຶ້ນ 109.149 ຄອບຄົວ, ຈຳນວນບ້ານທັງໝົດມີ 8.470 ບ້ານ, ຫລຸດລົງ 184 ບ້ານ, ຈຳນວນກຸ່ມບ້ານທັງໝົດມີ 921 ກຸ່ມ, ຫລຸດລົງ 176 ກຸ່ມ, ຈຳນວນເມືອງທັງໝົດມີ 148 ເມືອງ, ເພີ່ມຂຶ້ນ 5 ເມືອງ, ຈຳນວນເມືອງທຸກຍາກທັງໝົດມີ 23 ເມືອງ, ກວມ 15,54% ທຽບໃສ່ປີ 2011 ມີເມືອງທຸກຍາກ 53 ເມືອງ, ຫລຸດລົງ 30 ເມືອງ, ຈຳນວນບ້ານທຸກຍາກທັງໝົດມີ 1.736 ບ້ານ, ກວມ 20,50% ທ່ຽບໃສ່ປີ 2011 ຫລຸດລົງ 1.439 ບ້ານ, ຈຳນວນຄອບຄົວທຸກຍາກທັງໝົດມີ 76.609 ຄອບຄົວ, ກວມ 6,59% ທຽບໃສ່ປີ 2011 ຫລຸດລົງ 122.069 ຄອບຄົວ.ສ່ວນຈຳນວນບ້ານພັດທະນາທັງໝົດມີ 3.557 ບ້ານ, ກວມ 42% ທຽບໃສ່ປີ 2011 ເພີ່ມຂຶ້ນ 2.674 ບ້ານ, ຈຳນວນຄອບຄົວພັດທະນາທັງໝົດມີ 893.272 ຄອບຄົວ, ກວມ 76,84% ທຽບໃສ່ 2011 ເພີ່ມຂຶ້ນ 397.646 ຄອບຄົວ. ສຳລັບການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດມີ 11 ຈຸດນອນໃນ 5 ແຂວງຄື: ແຂວງໄຊຍະບູລີ 5 ຈຸດປະກອບມີ: ບ້ານນາຫລ້າ, ນາຊຳ-ຜາຊ້າງເມືອງໄຊຍະບູລີ, ບ້ານເມືອງປາ, ບວມເລົາ-ຜາແກ້ວ ແລະ ບ້ານສຸວັນນະພູມ, ເມືອງປາກລາຍ, ແຂວງບໍລິຄຳໄຊ 2 ຈຸດຄື: ບ້ານຜາເມືອງ, ເມືອງບໍລິຄັນ ແລະ ບ້ານວຽງຄຳເມືອງປາກກະດິງ, ແຂວງຊຽງຂວາງໜຶ່ງຈຸດຄື: ບ້ານຍອດງື່ມເມືອງແປກ, ແຂວງຄຳມ່ວນມີໜຶ່ງຈຸດຄື: ບ້ານປຸ່ງເໜືອ, ເມືອງຫີນບູນ, ແຂວງຈຳປາສັກມີ 2 ຈຸດຄື: ບ້ານຫ້ວຍທອງເມືອງປາກຊ່ອງ ແລະ ບ້ານສະພ່າຍເມືອງຊະນະສົມບູນ. ສ່ວນບັນດາແຂວງທີ່ບັນລຸຄາດໝາຍສູ້ຊົນຫລຸດອັດຕາຄອບຄົວທຸກຍາກໄດ້ຕ່ຳກວ່າ 10% ໃນປີ 2015 ມີຈຳນວນ 11 ແຂວງຄື: ນະຄອນຫລວງວຽງຈັນ, ຈຳປາສັກ, ວຽງຈັນ, ຄຳມ່ວນ, ໄຊຍະບູລີ, ຊຽງຂວາງ, ບໍລິຄຳໄຊ, ຫລວງພະບາງ, ສະຫວັນນະເຂດ, ສາລະວັນ ແລະ ຫລວງນ້ຳທາ, ແຂວງສາມາດບັນລຸຄາດໝາຍສູ້ຊົນສ້າງບ້ານພັດທະນາຫລາຍກວ່າ 50% ຂອງບ້ານທັງໝົດໃນແຂວງປະກອບມີແຂວງຈຳປາສັກ, ນະຄອນຫລວງວຽງຈັນ, ບໍລິຄຳໄຊ, ຄຳມ່ວນ, ໄຊຍະບູລີ ແລະ ຫລວງນ້ຳທາ,ມີຈຳນວນ 3 ແຂວງທີ່ມີຄອບຄົວທຸກຍາກຫລາຍກວ່າ 15% ຂອງຄອບຄົວທັງໝົດໃນທົ່ວແຂວງຂອງຕົນຄື: ແຂວງຫົວພັນ, ຜົ່ງສາລີ ແລະ ອຸດົມໄຊ, ມີຈຳນວນ 10 ແຂວງທີ່ມີບ້ານທຸກຍາກຍັງກວມຫລາຍກວ່າ 15% ຂອງບ້ານທັງໝົດໃນທົ່ວແຂວງຂອງຕົນຄື: ຜົ້ງສາລີ, ຫົວພັນ, ອຸດົມໄຊ, ເຊກອງ, ຫລວງນ້ຳທາ, ໄຊສົມບູນ, ບໍ່ແກ້ວ, ຫລວງພະບາງ, ຊຽງຂວາງ ແລະ ສະຫວັນນະເຂດ.