ເນື່ອງໃນໂອກາດວັນສາກົນຕ້ານຢາເສບຕິດຄົບຮອບ
28 ປີ (ວັນທີ 26 ມິຖຸນາ 1978-26 ມິຖຸນາ 2015) ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ມີສານ ກ່ຽວກັບວັນດັ່ງກ່າວວ່າ:
ຄືດັ່ງຮູ້ນໍາກັນແລ້ວວ່າບັນຫາຢາເສບຕິດ ແມ່ນໄພອັນຕະ ລາຍຮ້າຍແຮງຕໍ່ມວນມະນຸດ,
ເປັນອຸປະສັກກົດໜ່ວງທ່ວງດຶງການສ້າງສາພັດທະ ນາຂອງແຕ່ລະປະເທດ,ເປັນບໍ່ເກີດຂອງການກໍ່ອາຊະຍາກຳ,ການສໍ້ລາດບັງຫຼວງ
ແລະ ຍັງໄດ້ນຳເອົາຄວາມເສື່ອມເສຍມາສູ່ຊີວິດ, ຊັບສິນ
ແລະ ຄອບຄົວຂອງ ຜູ້ທີ່ພົວພັນກັບຢາເສບຕິດນໍາອີກ,ຍ້ອນແນວນັ້ນ,ພັກ ແລະ ລັດຖະບານຈຶ່ງໄດ້ຖືເອົາການສະກັດກັ້ນ ແລະ ແກ້ໄຂບັນຫາຢາເສບຕິດເປັນໜ້າທີ່ສຳຄັນ
ແລະ ຈໍາເປັນໂດຍ ຊີ້ນຳ-ນຳພາທຸກພາກສ່ວນໃນສັງຄົມເອົາໃຈໃສ່ສະກັດກັ້ນ
ແລະ ແກ້ໄຂບັນຫານີ້ຢ່າງຈິງຈັງຕະຫຼອດມາ.ໂດຍສະເພາະໄດ້ເອົາໃຈໃສ່ສຶກສາອົບຮົມປະຊາຊົນ, ຊາວໜຸ່ມ-ເຍົາວະຊົນໃຫ້ຮັບຮູ້
ແລະ ເຂົ້າໃຈກ່ຽວກັບພິດໄພ
ແລະ ຜົນຮ້າຍຂອງຢາເສບຕິດ ດ້ວຍການໂຄສະນາເຜີຍແຜ່ແນວທາງນະໂຍບາຍ,ລະບຽບກົດໝາຍ ແລະ ມະຕິ-ຄຳສັ່ງຕ່າງໆກ່ຽວກັບບັນຫາຢາເສບຕິດ
ຢ່າງເປັນປົກກະຕິ,ພ້ອມກັນນັ້ນກໍໄດ້ຊ່ວຍເຫຼືອ ແລະ ສ້າງເງື່ອນໄຂໃຫ້ປະຊາຊົນຢູ່ເຂດພູດອຍຫ່າງໄກສອກຫຼີກໄດ້ມີຊີວິດການເປັນຢູ່ດີຂື້ນດ້ວຍການຫັນໄປປະກອບອາຊີບອື່ນທີ່ໝັ້ນຄົງແທນການປູກຝິ່ນ,
ໄດ້ປິ່ນປົວຟື້ນຟູສຸຂະພາບ ແລະ ຝຶກວິຊາຊີບໃຫ້ຜູ້ຖືກເຄາະຮ້າຍຈາກຢາເສບຕິດໃນແຕ່ລະປີເປັນຈຳນວນຫຼາຍສົມຄວນ,
ສຳລັບການປະຕິບັດມາດຕະການທາງດ້ານກົດໝາຍຫຼາຍທ້ອງຖິ່ນກໍເຮັດໄດ້ດີເປັນຕົ້ນ:
ແມ່ນເຈົ້າໜ້າທີ່ໄດ້ມ້າງຄະດີ ແລະ ຈັບກຸມຜູ້ລະເມີດກົດໝາຍດ້ວຍການຢຶດຢາເສບຕິດປະເພດຕ່າງໆໄດ້ເປັນຈຳນວນຫຼວງຫຼາຍ,
ການປະຕິບັດວຽກງານ 3 ສ້າງເປັນຕົ້ນ :
ການສ້າງບ້ານ ແລະ ໂຮງຮຽນປອດຢາເສບຕິດໃນແຕ່ລະທ້ອງຖິ່ນກໍໄດ້ເຮັດຢ່າງເປັນຂະບວນ
ແລະ ເກີດມີໂຮງຮຽນຕົວແບບປອດຢາເສບຕິດ ຢູ່ຫຼາຍທ້ອງ ຖິ່ນ. ນອກຈາກນັ້ນກໍໄດ້ເອົາໃຈໃສ່ປະຕິບັດພັນທະ
ແລະ ສົນທິສັນຍາສາກົນທີ່ ສປປ ລາວ ເປັນພາຄີ, ຊຶ່ງກໍແມ່ນໝາກຜົນ ຂອງການປະກອບສ່ວນຂອງທຸກພາກສ່ວນໃນສັງຄົມກໍຄືການຮ່ວມມືຊ່ວຍເຫຼືອຂອງບັນດາປະເທດເພື່ອນມິດ
ແລະ ອົງການຈັດຕັ້ງສາກົນຕ່າງໆຢ່າງມີໝາກຜົນຕົວຈິງ.
ໃນປັດຈຸບັນການຜະລິດ ແລະ ຈຳໜ່າຍຢາເສບຕິດ,
ໄດ້ກາຍເປັນຂະບວນການຂ້າມຊາດ, ເຖິງວ່າຫຼາຍປະເທດໄດ້ເພີ່ມທະວີມາດຕະການ ແລະ ຄວາມພະຍາຍາມໃນການປ້ອງກັນ
ແລະ ແກ້ໄຂບັນຫານີ້ປານໃດກໍຕາມ, ແຕ່ການເຄື່ອນໄຫວກ່ຽວກັບບັນຫາດັ່ງກ່າວກໍຍັງມີທ່າອ່ຽງຂະຫຍາຍຕົວ
ແລະ ເພີ່ມທະວີຄວາມຮຸນແຮງຂຶ້ນຢ່າງໜ້າເປັນຫ່ວງ.
ສຳລັບຢູ່ ສປປ ລາວ, ການຄ້າຂາຍຢາເສບຕິດກໍໄດ້ແຜ່ລາມຈາກຕົວເມືອງໄປສູ່ເຂດຊົນນະບົດຫ່າງໄກສອກຫຼີກຢ່າງໄວວາ,
ຊຶ່ງໄດ້ມີຊາວໜຸ່ມ, ນັກຮຽນ-ນັກສຶກສາ ແລະ ກຳມະກອນຈຳນວນບໍ່ໜ້ອຍໄດ້ຕົກເປັນທາດຂອງຢາເສບຕິດ,
ຊຶ່ງຜູ້ໄດ້ຮັບເຄາະຮ້າຍເຫຼົ່ານີ້ໄດ້ສ້າງບັນຫາໃຫ້ແກ່ສັງຄົມ
ແລະ ຄອບຄົວຕົນເອງ,ກາຍເປັນປະກົດການຫຍໍ້ທໍ້ຢູ່ໃນສັງຄົມເປັນຕົ້ນ:
ຂີ້ລັກງັດແງະ, ປຸ້ນຈີ້ຊິງຊັບ, ອຸປະຕິເຫດບົນທ້ອງຖະໜົນ,
ການກໍ່ອາລະວາດຕີກັນ ແລະ ອື່ນໆ, ສະນັ້ນ
ເພື່ອສະກັດກັ້ນບໍ່ໃຫ້ບັນຫາຢາເສບຕິດແຜ່ລະບາດອອກສູ່ວົງກວ້າງ ແລະ ເພີ່ມທະວີຄວາມຮຸນແຮງຂື້ນຕື່ມນັ້ນ,
ຈຶ່ງຂໍສະເໜີໃຫ້ທຸກພາກສ່ວນໃນສັງຄົມເອົາໃຈໃສ່ບາງບັນຫາຕົ້ນຕໍດັ່ງນີ້: (1)ໃຫ້ສືບຕໍ່ເປີດຂະບວນການສຶກສາອົບຮົມ
ແລະ ໂຄສະ ນາເຜີຍແຜ່ຢ່າງກວ້າງຂວາງດ້ວຍຫຼາຍຮູບການໂດຍຜ່ານສື່ມວນຊົນລວມທັງການປະຊຸມ-ສຳມະນາ, ການສ້າງຂະບວນການກິລາ,
ການສະແດງສິນລະປະວັນນະຄະດີ ແລະ ການສ້າງຂະບວນການອື່ນໆ, ເພື່ອສ້າງຈິດສໍານຶກໃຫ້ທຸກຄົນເຫັນໄດ້ພິດໄພ ແລະ ຜົນຮ້າຍຂອງຢາເສບຕິດທັງປຸກລະດົມໃຫ້ເຂົາເຈົ້າຕື່ນຕົວ
ແລະ ສະໝັກໃຈເຂົ້າຮ່ວມຂະບວນການແກ້ໄຂຢາເສບຕິດຢ່າງຕັ້ງໜ້າ.(2)
ເອົາໃຈໃສ່ຕິດຕາມກວດກາ, ສຶກສາອົບຮົມ
ແລະ ຊ່ວຍເຫຼືອປະຊາຊົນທີ່ໄດ້ຢຸດເຊົາປູກຝິ່ນແລ້ວນັ້ນໃຫ້ມີເງື່ອນໄຂປະກອບອາຊີບອື່ນທີ່ໝັ້ນຄົງ,
ພ້ອມກັນນັ້ນກໍໃຫ້ເອົາໃຈໃສ່ຕິດຕາມຢ່າງໃກ້ຊິດ ເພື່ອບໍ່ໃຫ້ເຂົາເຈົ້າໄດ້ກັບຄືນໄປປູກຝິ່ນອີກ. (3)ໃຫ້ສືບຕໍ່ເອົາໃຈໃສ່ການບໍາບັດປິ່ນປົວ,
ຟື້ນຟູສຸຂະພາບ ແລະ ຝຶກວິຊາຊີບໃຫ້ຜູ້ທີ່ໄດ້ຮັບເຄາະຮ້າຍຈາກຢາເສບຕິດປະເພດຕ່າງໆໃຫ້ຄືນສູ່ສະພາບປົກກະຕິ, ຄືນສູ່ສັງຄົມ,ມີວຽກເຮັດງານທຳ ແລະ ກາຍເປັນພົນລະເມືອງດີຂອງຊາດ. ຄຽງຄູ່ກັນນັ້ນກໍຕ້ອງໄດ້ປັບປຸງ
ແລະ ຍົກລະດັບບັນດາສູນປິ່ນປົວທີ່ມີແລ້ວໃຫ້ໄດ້ມາດຕະຖານເພື່ອບໍລິການຮັບໃຊ້ສັງຄົມໃຫ້ດີກ່ວາເກົ່າ.(4)ໃຫ້ຖືເອົາການແກ້ໄຂບັນຫາຢາເສບຕິດ ເຂົ້າເປັນວຽກງານຈຸດສຸມໃນວຽກງານກໍ່ສ້າງຮາກຖານການເມືອງ
ແລະ ພັດທະນາຊົນນະບົດຮອບດ້ານຢູ່ຂັ້ນບ້ານ ແລະ ກຸ່ມບ້ານ. ພ້ອມກັນນີ້,
ກໍໃຫ້ສືບຕໍ່ຂື້ນບັນຊີບັນດາເປົ້າໝາຍທີ່ພົວພັນກັບບັນຫາຢາເສບຕິດເພື່ອຫາວິທີແກ້ໄຂຢ່າງທັນການ,
ສໍາລັບຜູ້ຄ້າຂາຍຢາເສບຕິດ ກໍຕ້ອງດຳເນີນຄະດີຕາມລະບຽບກົດໝາຍຢ່າງເດັດຂາດເຂັ້ມງວດ.(5)ໃຫ້ແຕ່ລະແຂວງຄົ້ນຄວ້າເພື່ອສ້າງ
ຕັ້ງກອງທຶນຕ້ານຢາເສບຕິດດ້ວຍແຫຼ່ງທຶນຕ່າງໆຕາມເງື່ອນໄຂ ແລະ ຄວາມສາມາດຕົວຈິງ.(6)ໃຫ້ສືບຕໍ່ປັບປຸງກົງຈັກການຈັດຕັ້ງຂອງອົງການກວດກາ ແລະ ຄວບຄຸມຢາເສບຕິດໃຫ້ມີຄວາມເຂັ້ມແຂງສາມາດເປັນເສນາທິການໃຫ້ພັກ-ລັດໃນການແກ້ໄຂບັນຫາຢາເສບຕິດ.(7)ເພີ່ມທະວີການພົວພັນ ແລະ ຮ່ວມມືກັບບັນດາປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆໃຫ້ຫຼາຍຂື້ນກ່ວາເກົ່າເພື່ອພ້ອມກັນແກ້ໄຂການລັກລອບຄ້າຂາຍ
ແລະ ລຳລຽງຂົນສົ່ງຢາເສບຕິດໄດ້ຢ່າງທັນການແລະຂໍຮຽກຮ້ອງມາຍັງພະນັກງານ,
ທະຫານ, ຕຳຫຼວດ ແລະ ປະຊາຊົນທຸກຊັ້ນຄົນຈົ່ງເປັນເຈົ້າການເຂົ້າຮ່ວມໃນຂະບວນການສະກັດກັ້ນ
ແລະ ຕ້ານຢາເສບຕິດໃຫ້ແຂງແຮງກ່ວາເກົ່າ ແລະຫວັງວ່າບັນດາປະເທດເພື່ອນມິດກໍຄືອົງການຈັດຕັ້ງສາກົນຕ່າງໆຈະສືບຕໍ່ໃຫ້ການສະໜັບສະໜູນ,
ຮ່ວມມື ແລະ ຊ່ວຍເຫຼືອດ້ານທຶນຮອນແກ່ ສປປ ລາວ ເພື່ອແກ້ໄຂບັນຫາຢາເສບຕິດໃຫ້ມີໝາກຜົນຕົວຈິງຫຼາຍຂຶ້ນ.
No comments:
Post a Comment