ໃນວັນທີ 5 ມິຖຸນານີ້, ໂຄງການພຸດທະສາສະໜາເພື່ອພັດທະນາ (ຄ.ພ.ພ), ພະແນກສຶກສາທິການ ແລະ ກິລາ ນະ ຄອນຫລວງວຽງຈັນ ແລະ ສະມາຄົມຮ່ວມນ້ຳໃຈກັບເດັກນ້ອຍລາວ
(ALC) ຮ່ວມກັນຈັດງານນິທັດສະການປຶ້ມຂຶ້ນຢູ່ວັດສະພານທອງເໜືອ
ເມືອງສີສັດຕະນາກ ນະຄອນຫລວງວຽງຈັນ
ເຊິ່ງມີຜູ້ທີ່ສົນໃຈອ່ານປຶ້ມ ແລະ
ຊື້ປຶ້ມເຂົ້າຮ່ວມຢ່າງຫລວງຫລາຍ, ໂດຍສະເພາະພະສົງສາມະເນນຈາກວັດຕ່າງໆອ້ອມຂ້າງ, ຄູ-ອາຈານ
ແລະ ນັກຮຽນຈາກໂຮງຮຽນຕ່າງໆໃນນະຄອນຫລວງວຽງຈັນ ເຂົ້າຮ່ວມເປັນຈຳນວນຫລາຍ.
ການຈັດງານຄັ້ງນີ້ ເພື່ອນຳສະເໜີໃຫ້ນັກຮຽນ, ພະສົງສາມະເນນ ແລະ ສັງຄົມໄດ້ຮັບຮູ້ເຖິງວຽກງານສົ່ງເສີມການອ່ານ
ແລະ ການຈັດພິມປຶ້ມສຳລັບເດັກ, ປຶ້ມທຳມະ, ປຶ້ມອ່ານທົ່ວໄປ ໃຫ້ຜູ້ທີ່ສົນໃຈເຫັນຄວາມຈຳເປັນຂອງການອ່ານ ພ້ອມທັງໃຫ້
ທຸກຄົນໄດ້ມີໂອກາດສຳຜັດກັບປຶ້ມອ່ານທີ່ໃຫ້ສາລະຕ່າງໆ
ແລະ ເພື່ອສົ່ງເສີມໃຫ້ທຸກຄົນໃນສັງຄົມຮັກການອ່ານຫລາຍຂຶ້ນ ຈົນກາຍເປັນວັດທະນະທຳໃໝ່ໃນຄອບຄົວ, ໃນວັດ ແລະ ສັງຄົມ, ພ້ອມທັງເຮັດໃຫ້ພະສົງສາມະເນນ, ອອກຕົນຍາດໂຍມ,
ເດັກນ້ອຍ, ຄູ-ອາຈານ,
ນັກຮຽນ-ນັກສຶກສາ
ທົ່ວສັງຄົມເຂົ້າໃຈຕື່ມໃນຄວາມສຳຄັນຂອງການອ່ານ, ຊຶ່ງເປັນຫົວໃຈຂອງການສຶກສາ
ແລະ ການພັດທະນາຊັບພະຍາກອນມະນຸດ.
ໃນງານວາງສະແດງປຶ້ມດັ່ງກ່າວປະກອບມີ:
ປຶ້ມທຳມະ, ໜັງສືຜູກໃບລານ, ພະໄຕປີດົກ, ປຶ້ມອ່ານທົ່ວໄປ, ປຶ້ມສຳລັບເດັກ, ນະວະນິຍາຍເລື່ອງສັ້ນ, ກາບກອນ
ແລະ ປຶ້ມອື່ນໆອີກຢ່າງຫລວງຫລາຍ,
ເພື່ອສະແດງໃຫ້ເຫັນການພັດທະນາ
ແລະ ການຜະລິດສື່ສິ່ງພິມຂອງໂຄງການພຸດທະສາສະໜາ ແລະ ບັນດາສຳນັກພິມອື່ນໆໃນລາວໄດ້ເຕີບໃຫຍ່ຂະຫຍາຍຕົວ.
No comments:
Post a Comment