ສູນພາສາດັ່ງກ່າວ ໄດ້ສ້າງຂຶ້ນໃນຂອບເຂດເນື້ອທີ່ກວ້າງ 3 ເຮັກຕາ ທີ່ເທສະບານເມືອງວຽງໄຊ ເຂດທີ່ໝັ້ນຂອງການປະຕິວັດໃນເມື່ອກ່ອນ,
ປະກອບມີອາຄານສູງສອງຊັ້ນ ມີ
8 ຫ້ອງຮຽນ ທີ່ສາມາດຮອງຮັບນັກຮຽນໄດ້ຫລາຍກວ່າ 160 ຄົນ ທີ່ປະກອບອຸປະກອນການສອນ
ແລະ ຮ່ຳຮຽນຄົບຊຸດ, ມີອາຄານຫ້ອງການຄູອາຈານ
ແລະ ສິ່ງອຳນວຍຄວາມສະດວກອື່ນໆ ຄືເດີ່ນໂຮງຮຽນ, ສວນດອກໄມ້, ລະບົບຫ້ອງນ້ຳ, ດອກໄຟແສງສະຫວ່າງ,
ກຳແພງ ແລະ ລະບົບລະບາຍນ້ຳທີ່ສະດວກ,
ສະບາຍ ໂດຍແມ່ນບໍລິສັດ ຈິດຈະເລີນ ເປັນຜູ້ຮັບເໝົາກໍ່ສ້າງ ໂດຍທຶນຊ່ວຍເຫລືອລ້າຈາກ ສສ ຫວຽດ ນາມ.
ໃນໄລຍະຢ້ຽມຢາມລາວຂອງນາຍົກລັດຖະມົນຕີ ສສ ຫວຽດນາມ ເນື່ອງໃນໂອກາດວັນປົດປ່ອຍແຂວງຫົວພັນ ຄົບຮອບ 60 ປີ ໃນປີ
2013 ຜ່ານມາ, ດ້ວຍການນຳສະເໜີຂອງແຂວງຫົວພັນ ແລະ ເຫັນໄດ້ຄວາມສຳຄັນ
ແລະ ຈຳເປັນໃນການຍົກລະດັບດ້ານພາສາຫວຽດນາມໃຫ້ແກ່ພະນັກງານ
ແລະ ນັກຮຽນ-ນັກສຶກສາລູກຫລານຊາວຫວຽດນາມຕ່າງດ້າວທີ່ພວມດຳລົງຊີວິດ ແລະ ທຳມາຫາກິນຢູ່ແຂວງຫົວພັນ,
ນາຍົກລັດຖະມົນຕີ ຫງວຽນເຕິນຢຸງ ຈຶ່ງໄດ້ຕັດສິນໃຈໃຫ້ການຊ່ວຍເຫລືອກໍ່ສ້າງສູນພາສາແຫ່ງນີ້
ແລະ ທັງເປັນຂອງຂວັນອັນປະເສີດມອບໃຫ້ແຂວງຫົວພັນນຳໃຊ້ເຂົ້າໃນການພັດທະນາຊັບພະຍາກອນມະນຸດຂອງທ້ອງຖິ່ນໃຫ້ນັບມື້ເຕີບໃຫຍ່ເຂັ້ມແຂງ ປະກອບສ່ວນສຳຄັນເຂົ້າໃນການພັດ ທະນາເສດຖະກິດ-ສັງຄົມຂອງທ້ອງຖິ່ນ ກໍຄືຂອງຊາດເຕີບໃຫຍ່ຂະຫຍາຍໂຕ.
No comments:
Post a Comment