ປັດຈຸບັນນີ້, ເນື່ອງຈາກສະພາບຝົນຕົກໜັກຢູ່ທົ່ວທຸກພາກຂອງປະເທດ ສົ່ງຜົນໃຫ້ເສັ້ນທາງຫລາຍສາຍໄດ້ຮັບຜົນກະທົບ ແລະ ເປ່ເພໜັກ, ບາງຍ່ານຖືກດິນພູເຈື່ອນຖົມ ເຮັດໃຫ້ການສັນຈອນໄປມາພົບຄວາມຫຍຸ້ງຍາກ ຈຶ່ງຮຽກຮ້ອງໃຫ້ນັກຂັບຂີ່, ຜູ້ເດີນທາງຈົ່ງມີສະຕິລະວັງຕົວ ເພື່ອຫລີກເວັ້ນການເກີດອຸປະຕິເຫດ ຄືເສັ້ນທາງ 13 ເໜືອ ແມ່ນເລີ່ມແຕ່ເຂດເມືອງວັງວຽງ ແຂວງວຽງຈັນ ໄປຫາເມືອງຊຽງເງິນ ແຂວງຫລວງພະບາງ ເຊິ່ງເປັນໄລຍະທາງເກົ່າແກ່ ແລະ ເປັນເຂດພູສູງ ຈຶ່ງເປ່ເພໄດ້ງ່າຍ, ເສັ້ນທາງໄປສູ່ແຂວງໄຊສົມບູນເກີດສະພາບດິນພູເຈື່ອນຖົມຫລາຍຈຸດ ອັນເຮັດໃຫ້ ການສັນຈອນໄປມາຖືກຕັດຂາດເປັນບາງໄລຍະ, ສຳລັບເສັ້ນທາງເລກ 8 ແຕ່ເມືອງຄຳເກີດ ແຂວງບໍລິຄຳໄຊ ໄປຫາຊາຍແດນຫວຽດນາມ ແລະ ເສັ້ນທາງເລກທີ 12 ຈາກເມືອງທ່າແຂກ ແຂວງຄຳມ່ວນ ອອກສູ່ຊາຍແດນ
ຫວຽດນາມມີຫລາຍຈຸດກໍເກີດບັນຫາດິນເຈື່ອນຖົມ ແລະ ເສັ້ນທ້ອງຖິ່ນອີກຫລາຍສາຍກໍປະສົບສະພາບເປ່ເພຫລາຍ. ດັ່ງນັ້ນ ຈຶ່ງເຕືອນມາຍັງຜູ້ຮັບຜິດຊອບເອົາໃຈໃສ່ບູລະນະປົວແປງໃຫ້ທັນເວລາ ເພື່ອບໍ່ເຮັດໃຫ້ການຄົມມະນາຄົມຖືກຕັດຂາດ.
ສະເພາະຢູ່ນະຄອນຫລວງວຽງຈັນກໍມີສະພາບດັ່ງກ່າວ ໂດຍສະເພາະເສັ້ນທາງເຂດຊານເມືອງ ຍ້ອນນ້ຳເຊາະເກີດເປັນບວກເປັນຂຸມ ເຮັດໃຫ້ການສັນຈອນພົບຄວາມຫຍຸ້ງຍາກ ຄືເສັ້ນທາງລຽບແຄມຂອງ ແຕ່ທ່າເດື່ອ-ສິມມະໂນ-ຄວາຍແດງ ໄປຮອດບ້ານພ້າວຕໍ່ໃສ່ເສັ້ນທາງ 13 ໃຕ້ ກໍເປ່ເພໜັກຈົນຈະໃຊ້ການບໍ່ໄດ້. ດັ່ງນັ້ນ ຈຶ່ງຮຽກຮ້ອງໃຫ້ຂະແໜງຮັບຜິດຊອບເລັ່ງກວດກາ ແລະ ປົວແປງ ເພື່ອເສັ້ນທາງສາຍສຳຄັນນີ້ໃຊ້ງານໄດ້ທັງສອງລະດູ.
No comments:
Post a Comment