ຂະບວນການໂຕະມົນມີຄວາມສຳຄັນຕໍ່ການພັດທະນາເສດຖະກິດ-ສັງຄົມຂອງລາວ

ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະ ເທດ ທອງລຸນ ສີສຸລິດ ໄດ້ໃຫ້ຮູ້ກ່ຽວກັບຄວາມສຳຄັນຂອງຂະບວນ ການໂຕະມົນວ່າ: ເບື້ອງຕົ້ນຂະບວນ ການດັ່ງກ່າວເປັນພຽງເວທີປະ ກາດການສະໜັບສະໜູນຊ່ວຍເຫລືອ ຂອງວົງຄະນະ ຍາດສາກົນຕໍ່ ສປປ ລາວ ເທົ່ານັ້ນ, ແຕ່ຍ້ອນເຫັນໄດ້ຄວາມສຳຄັນຕໍ່ການພັດທະ ນາເສດຖະກິດ-ສັງຄົມ ກໍຄືການມີສ່ວນຮ່ວມຂອງປະເທດໃຫ້ທຶນ ແລະ ເພື່ອນມິດສາກົນເຂົ້າໃນການພັດທະນາຢູ່ລາວ, ລັດຖະບານ ລາວຈຶ່ງໄດ້ຍົກລະດັບຈາກກອງປະຊຸມລະດົມທຶນມາເປັນກົນໄກການ ປຶກສາຫາລືແບບມີສ່ວນຮ່ວມລະຫວ່າງລັດຖະບານກັບຄູ່ຮ່ວມພັດທະນາເພື່ອເຮັດໃຫ້ການຊ່ວຍເຫລືອ ຂອງສາກົນສອດຄ່ອງກັບທິດທາງ ແລະ ບູລິມະສິດຂອງການພັດທະນາຢູ່ລາວກໍຄືການນຳໃຊ້ທຶນຊ່ວຍ ເຫລືອຈາກສາກົນຢ່າງມີປະສິດດທິພາ, ມີຄວາມໂປ່ງໃສ ແລະ ຈິງໃຈ. ຕະຫລອດໄລຍະຜ່ານມາ,
ຂະບວນການປຶກສາຫາລືສຳຄັນດັ່ງກ່າວໄດ້ປະກອບສ່ວນຫລາຍດ້ານໃນການພັດທະນາເສດຖະກິດ-ສັງຄົມ ແລະ ຫລຸດຜ່ອນຄວາມທຸກຍາກໃນລາວແຕ່ລະໄລຍະຄື: ການຊ່ວຍເຫລືອຂອງສາກົນໄດ້ເພີ່ມຂຶ້ນຈາກ 178 ລ້ານໂດລາສະຫະລັດໃນປີ 1991 ມາເປັນ 795,18 ລ້ານໂດລາສະຫະລັດໃນສົກປີ 2013-2014, ຊຶ່ງ ເຮັດໃຫ້ ສປປ ລາວ ສາມາດບັນລຸເປົ້າໝາຍການພັດທະນາແຫ່ງຊາດ ແລະ ສາກົນ ເປັນກ້າວໆມາເຊັ່ນ: ອັດຕາຄວາມທຸກຍາກໄດ້ຫລຸດລົງຈາກ 48% ໃນປີ 1992 ເຫລືອພຽງ 27,6% ໃນປີ 2008 ແລະ ມາ ຮອດປີ 2013 ຍັງເຫລືອພຽງ 20,5% ແລະ ຄາດວ່າໃນປີ 2015 ຈະເຫລືອພຽງ 17%, ສ່ວນການພັດທະ ນາໃນຂົງເຂດສັງຄົມກໍໄດ້ຮັບການປັບປຸງດີຂຶ້ນເປັນກ້າວໆເຊັ່ນກັນ.

ນອກຈາກນີ້ຂະບວນການໂຕະມົນຍັງໄດ້ສ້າງກາລະໂອກາດໃຫ້ແກ່ລັດຖະບານ ແລະ ຄູ່ຮ່ວມພັດ ທະນາ ໄດ້ແລກປ່ຽນ ແລະ ປະກອບຄຳຄິດເຫັນໃນການວາງແຜນພັດທະນາເສດຖະກິດ-ສັງຄົມຢູ່ລາວ, ເຊິ່ງສາກົນໄດ້ມີຄວາມເຂົ້າໃຈສະພາບຄວາມເປັນຈິງ ແລະ ຈຸດພິເສດ ຂອງ ສປປ ລາວຫລາຍຂຶ້ນ ແລະ ເປັນບ່ອນອິງໃນການພິຈາລະນາໃຫ້ການຊ່ວຍເຫລືອສະໜັບສະໜູນ ສປປ ລາວ ຕໍ່ໄປ.

ຂະບວນການໂຕະມົນແມ່ນກົນໄກການລະດົມທຶນຈາກສາກົນເພື່ອນຳໃຊ້ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມກໍຄືປະຕິບັດຍຸດທະສາດຫລຸດຜ່ອນຄວາມທຸກຍາກຢູ່ ສປປ ລາວ, ກົນໄກດັ່ງກ່າວໄດ້ຈັດຕັ້ງມາແຕ່ປີ 1983 ບົນພື້ນຖານການສະໜັບສະໜູນຂອງອົງການ ເຄືອຂ່າຍສະຫະປະຊາຊາດ (ສປຊ) ແລະ ກອງປະຊຸມດັ່ງກ່າວໄດ້ຈັດຂຶ້ນທຸກໆ 3 ປີຢູ່ສຳນັກງານ ສປຊ ໃນນະຄອນຫລວງເຊີແນວ, ປະເທດສະວິດ ແລະ ໄດ້ປ່ຽນມາຈັດຢູ່ ສປປ ລາວ ຕັ້ງແຕ່ປີ 2000 ຈົນມາຮອດປັດຈຸບັນ.