ສາທາເຕືອນໃຫ້ລະວັງພະຍາດລະບາດໃນ​ໄລຍະ​ໜ້າຝົນ

ໜ່ວຍເຝົ້າລະວັງພະຍາດ, ກະຊວງສາທາລະນະສຸກ,ໄດ້ອອກມາເຕືອນໃຫ້ປະຊາຊົນເອົາໃຈໃສ່ຮັກ ສາສຸຂະພາບ, ເນື່ອງຈາກປັດຈຸບັນພວມຢູ່ໃນໄລຍະຫນ້າຝົນ, ສະພາບດິນຟ້າອາ ກາດມີການປ່ຽນ ແປງຢູ່ຕະຫຼອດເວລາ, ຊຶ່ງອາດຈະກໍໃຫ້ເກີດພະຍາດຕາມລະດູການໄດ້ງ່າຍເຊັ່ນ: ພະຍາດຕິດຕໍ່ ຈາກສັດສູ່ຄົນ, ໄຂ້ຫວັດ, ເບື່ອເຫັດ, ຖອກທ້ອງ ແລະ ອື່ນໆ, ຊຶ່ງຜ່ານມາພະຍາດດັ່ງກ່າວມັກເກີດ ລະບາດຂຶ້ນຢູ່ໃນຫຼາຍທ້ອງຖິ່ນມາແລ້ວ, ໂດຍສະເພາະແມ່ນເຂດຊົນນະບົດຫ່າງໄກສອກຫຼີກ ທີ່ຍັງຂາດການຕິດຕາມເຝົ້າລະວັງ, ສົ່ງຜົນໃຫ້ເກີດການສູນເສຍທາງດ້ານຊີວິດ ແລະ ຊັບສິນຂອງ ປະຊາຊົນທີ່ຍັງຖືເບົ່າຕໍ່ການປະຕິບັດຕາມຫຼັກການສຸຂະສຶກສາ, ອະນາໄມ 3 ສະອາດ ແລະ ເພື່ອຫຼີກ ລ້ຽງຈາກພະຍາດດັ່ງກ່າວ, ຂໍໃຫ້ທຸກຄົນຈົ່ງເພີ່ມທະວີຄວາມ ເປັນເຈົ້າການປະຕິບັດຕາມຫຼັກສຸຂະອະນາ ໄມຄື ໝັ່ນທຳຄວາມສະອາດຮ່າງກາຍ ແລະ ທີ່ຢູ່ອາໄສເປັນປະຈຳ, ຫຼີກ​ເວັ້ນການສຳຜັດກັບສັດທີ່ປ່ວຍ
ຫຼື ຕາຍ, ບໍ່ແຂ່ງຝົນເປັນເວລາດົນເກີນໄປ ແລະ ອາຫານການກິນກໍຕ້ອງຖືກຕາມຫຼັກສຸຂະອະນາໄມ ແລະ ເມື່ອຮູ້ສຶກບໍ່ສະບາຍໃຫ້ໄປພົບແພດໝໍເພື່ອປິ່ນປົວໄດ້ຖືກຕ້ອງທັນເວລາ.

             ໜ່ວຍເຝົ້າລະວັງພະຍາດໃຫ້ຮູ້ອີກວ່າ: ນອກຈາກພະຍາດຕາມລະດູການດັ່ງກ່າວແລ້ວກໍຕ້ອງ ໄດ້ເພີ່ມຄວາມເອົາໃຈໃສ່ປ້ອງກັນພະຍາດໄຂ້ເລືອດອອກ, ເນື່ອງຈາກປັດຈຸບັນ, ໄດ້ກວດພົບຜູ້ຕິດ ເຊື້ອແລ້ວຈຳນວນໜຶ່ງ, ດັ່ງນັ້ນ ທຸກຄົນກໍຄືທຸກພາກສ່ວນຕ້ອງໄດ້ເພີ່ມທະ ວີຄວາມເອົາໃຈໃສ່ໃນການ ປ້ອງກັນພະຍາດນີ້ດ້ວຍການປະຕິບັດຕາມຫຼັກການ 5 ປ ທີ່ກະຊວງສາທາລະນະສຸກວາງອອກຄື 1. ປິດຝາພາຊະນະທີ່ມີນ້ຳໃນເຮືອນ ແລະ ນອກ ເຮືອນເພື່ອບໍ່ໃຫ້ຍຸງມາໄຂ່ໃສ່. 2 ປ່ຽນນ້ຳ ແລະ ຜັດຖູພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ. 3 ປ່ອຍປາຫາງນົກຍຸງເພື່ອກິນ ໜອນນ້ຳຍຸງລາຍ. 4 ປັບ ປຸງບໍ່ໃຫ້ມີນ້ຳຄ້າງຂັງກະໂປະ, ກະປ໋ອງ, ຮາງລິນ, ຢາງຕີນລົດເກົ່າ ແລະ 5 ປະຕິ ບັດເປັນປະຈຳທຸກອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ສຸກສາລາໄກ້ບ້ານເພື່ອ​ບໍ່​​ໃຫ້​ເກີດ​ກາ​ນລະບາດ​ຂອງ​ພະຍາດ​ນີ້​ດັ່ງ​ທີ່​ເຄີຍ​ເປັນ​ມາ.