ໃນທ້າຍອາທິດທີ່ຜ່ານມານີ້, ຢູ່ສະພາແຫ່ງຊາດ ນະຄອນຫລວງວຽງຈັນ ທ່ານປະທານສານປະຊາຊົນສູງສຸດ ດຣ. ຄຳພັນ ສິທິດດຳມາ
ໄດ້ຂຶ້ນຊີ້ແຈງຕໍ່ຄຳຖາມເຈາະຈີ້ມຂອງສະມາຊິກສະພາແຫ່ງຊາດ ໃນວາລະດຳເນີນກອງປະຊຸມສາມັນເທື່ອທີ 9 ຂອງສະພາແຫ່ງຊາດທີ VII ກ່ຽວກັບບັນຫາຄະດີທີ່ຄ້າງຢູ່ສານປະຊາຊົນຂັ້ນຕ່າງໆ ທີ່ມີລັກສະນະແກ່ຍາວ
ເປັນເວລາດົນນານ ຊຶ່ງເກີດຈາກຄວາມບໍ່ໂປ່ງໃສຂອງພະນັກງານ. ຕໍ່ບັນຫາດັ່ງກ່າວທາງຄະນະນຳຂອງສານປະຊາຊົນສູງສຸດ
ໄດ້ໃຫ້ຄວາມສຳຄັນໃນການແກ້ໄຂຄະດີໃຫ້ຮັບປະກັນ 2 ດ້ານຄື: ດ້ານຄວາມວ່ອງໄວ ແລະ ມີຄຸນນະພາບ ຕາມກຳນົດເວລາຂອງການດຳເນີນຄະດີທີ່ກຳນົດໄວ້ໃນກົດໝາຍຄື: ຄະດີອາຍາຢູ່ສານຂັ້ນຕົ້ນ ຕ້ອງພິຈາລະນາພາຍໃນກຳນົດ 30 ວັນ ນັບແຕ່ມື້ທີ່ໄດ້ຮັບສຳນວນຄະດີຈາກຫົວໜ້າອົງການໄອຍະການເປັນຕົ້ນໄປ, ເວັ້ນເສຍແຕ່ການສັ່ງຟ້ອງຂຶ້ນສານໂດຍກົງໃຫ້ພິຈາລະນາຄະດີພາຍໃນກຳນົດ 48 ຊົ່ວໂມງ ຢູ່ຂັ້ນອຸທອນ
ໃຫ້ພິຈາລະນາພາຍໃນ 45 ວັນ ແລະ ຢູ່ຂັ້ນລົບລ້າງໃຫ້ພິຈາລະນະພາຍໃນ 30 ວັນ. ສຳລັບຄະດີແພ່ງຢູ່ສານຂັ້ນຕົ້ນ ຕ້ອງ
ພິຈາລະນາໃຫ້ສຳເລັດ ພາຍໃນ 9 ເດືອນ, ຂັ້ນອຸທອນ ໃຫ້ສຳເລັດພາຍໃນ 4
ເດືອນ, ຂັ້ນລົບລ້າງໃຫ້ສຳເລັດພາຍໃນ 3
ເດືອນ ແລະ ຂັ້ນຮື້ຟື້ນໃຫ້ສຳເລັດພາຍໃນ 2 ເດືອນ, ໃນກໍລະນີທີ່ບໍ່ສຳເລັດຕາມກຳນົດເວລາດັ່ງກ່າວ ກໍສາມາດຕໍ່ເວລາອອກໄປໄດ້ແຕ່ບໍ່ໃຫ້ເກີນ 3 ເດືອນ. ເຖິງຢ່າງໃດກໍດີ ຕໍ່ບັນຫາການປະພຶດທີ່ບໍ່ໂປ່ງໃສຂອງພະນັກງານ ຖືເປັນການກະທຳທີ່ບໍ່ຖືກຕ້ອງ, ຂາດຈັນຍາບັນ-ຈັນຍາທຳ, ເປັນປະກົດການຫຍໍ້ທໍ້ໜຶ່ງທີ່ຄະນະພັກ, ຄະນະນຳຂອງສານປະຊາຊົນສູງສຸດ ໄດ້ເອົາໃຈໃສ່ຕ້ານ ແລະ ສະກັດກັ້ນ
ໃຫ້ໝົດໄປຈາກລະບົບສານ.
ດັ່ງນັ້ນ ຈຶ່ງຮຽກຮ້ອງມາຍັງໂຈດ, ຈຳເລີຍ ຫລື
ບຸກຄົນກ່ຽວຂ້ອງ
ຖ້າພົບເຫັນພຶດຕິກຳຂອງຜູ້ພິພາກສາ, ພະນັກງານສານທີ່ບໍ່ໂປ່ງໃສແກ່ຍາວການດຳເນີນຄະດີໃຫ້ສະເໜີ ຫລື ຮ້ອງທຸກຕໍ່ຄະນະນຳຂອງສານປະຊາຊົນທີ່ກ່ຽວຂ້ອງ
ຫລື ສະເໜີຫາສານປະຊາຊົນສູງສຸດໄດ້ທຸກເວລາ ເພື່ອທຳການດຳເນີນຄະດີກັບຜູ້ກ່ຽວຕາມກໍລະນີໜັກ ຫລື ເບົາ.
ຕໍ່ກັບຄຳຊັກຖາມຂອງສະມາຊິກສະພາແຫ່ງຊາດ ກ່ຽວກັບການປັບປຸງການຈັດຕັ້ງຂອງສານປະຊາຊົນ
ເພື່ອໃຫ້ປະຊາຊົນເຂົ້າຫາສານປະຊາຊົນໄດ້ງ່າຍ,
ໂດຍການສ້າງຕັ້ງສານປະຊາຊົນເມືອງຄືນນັ້ນ?
ຕໍ່ບັນຫານີ້ ສານປະຊາຊົນ ກໍໄດ້ຮັບຮູ້ ແລະ ເຫັນວ່າ ການເຄື່ອນຍ້າຍນັກໂທດເຂົ້າມາຕັດສິນຢູ່ສານ ກໍພົບຄວາມຫຍຸ້ງຍາກ ແລະ ບໍ່ຮັບປະກັນຄວາມປອດໄພ ແລະ ປະຊາຊົນ ກໍພົບຄວາມຫຍຸ້ງຍາກ ທີ່ຈະເຂົ້າມາຍື່ນຟ້ອງ ຫລື ເຂົ້າຮ່ວມໃນການດຳເນີນຄະດີຢູ່ສານບາງເຂດ, ບາງແຂວງແທ້ ແລະ ສານປະຊາຊົນ
ກໍມີຄວາມຫຍຸ້ງຍາກທີ່ຈະເກັບກໍາຂໍ້ມູນຫລັກການເຊັນດຽວກັນ, ແຕ່ຖ້າຈະສ້າງສານປະຊາຊົນເມືອງຂຶ້ນ ກໍເຫັນວ່າເປັນການສິ້ນເປື້ອງຫລາຍດ້ານເຊັ່ນ:
ບຸກຄະລາກອນ, ຫ້ອງການ,
ງົບປະມານ, ພາຫະນະ ແລະ ອຸປະກອນຕ່າງໆ ແຕ່ກົງກັນຂ້າມ ຖ້າຫາກເມືອງໃດ ມີຈຳນວນຄະດີເກີດຂຶ້ນຫລາຍ, ມີບຸກຄະລາກອນທີ່ຈະປະກອບໃສ່ການຈັດຕັ້ງສານເຊັ່ນ: ປະທານ, ຮອງປະທານ, ຜູ້ພິພາກສາ,
ຜູ້ຊ່ວຍຜູ້ພິພາກສາ, ຈ່າສານ
ແລະ ພະນັກງານວິຊາການ, ມີອາຄານ,
ສະຖານທີ່ເຮັດວຽກຂອງສານ (ຫ້ອງການເຮັດວຽກ,
ຫ້ອງບັນລັງຕັດສິນ) ແລະ ມີງົບປະມານ,
ພາຫະນະ, ອຸປະກອນຮັບໃຊ້ທີ່ຈຳເປັນ ກໍສາມາດປະສານສົມທົບກັບຄະນະພັກອຳນາດການປົກຄອງທ້ອງຖິ່ນ ເພື່ອສະເໜີສ້າງຕັ້ງສານປະຊາຊົນເຂດຂຶ້ນຕື່ມຢູ່ເມືອງດັ່ງກ່າວ
ເພື່ອອຳນວຍຄວາມສະດວກໃຫ້ການບໍລິການຮັບໃຊ້ປະຊາຊົນ
ແລະ ການເຂົ້າຫາເພື່ອດໍາເນີນຄະດີຂອງສານໄດ້ສະດວກກວ່າເກົ່າ.
No comments:
Post a Comment