ໃນການພັດທະນາເສດຖະກິດ-ສັງຄົມສຳລັບສົກປີ
2015-2016, ລັດຖະບານຈະສືບຕໍ່ປະຕິບັດເປົ້າໝາຍສະຫັດສະວັດດ້ານການພັດທະນາ (MDGs) ໂດຍສະເພາະບັນດເປົ້າໝາຍທີ່ບໍ່ບັນລຸຜ່ານມາໃຫ້ປະສົບຜົນສຳເລັດ. ພ້ອມກັນນັ້ນ ກໍເລີ່ມຕົ້ນປະຕິບັດບັນດາເປົ້າໝາຍການພັດທະນາແບບຍືນຍົງ (SDG) ແລະ ບັນດາຄາດໝາຍຂອງການນຳພາປະເທດຊາດຫລຸດພົ້ນອອກຈາກສະຖານະພາບຄວາມດ້ອຍພັດທະນາ (LDCs).
ບັນດາເປົ້າໝາຍທີ່ເລັ່ງໃສ່ສູ້ຊົນປະຕິບັດໃນສົກປີນີ້ທາງດ້ານການສຶກສາແມ່ນເລັ່ງໃສ່ປະຕິຮູບການສຶກສາໃຫ້ດີກວ່າເກົ່າ, ປັບປຸງ ແລະ ຂະຫຍາຍໂຄງລ່າງການສຶກສາໃຫ້ທົ່ວເຖິງ, ປັບປຸງຄຸນນະພາບການສຶກສາ ໂດຍການເອົາໃຈໃສ່ປັບປຸງຄຸນນະພາບຂອງຄູ, ປັບປຸງ ແລະ ຂະຫຍາຍຫລັກສູດການຮຽນ-ການສອນລະດັບອາຊີວະສຶກສາ ແລະ ມະຫາວິທະຍາໄລໃນສາຂາວິຊາຂະແໜງໄຟຟ້າ, ບໍ່ແຮ່, ປຸງແຕ່ງ, ຫັດຖະກຳ ແລະ ບໍລິການ. ໃນຂະນະດຽວກັນກໍຕ້ອງສຸມໃສ່ປັບປຸງວຽກງານສາທາລະນະສຸກໃຫ້ທົ່ວເຖິງ ແລະ ມີຄຸນນະພາບກວ່າເກົ່າ ໂດຍສະເພາະການປັບປຸງດ້ານການບໍລິການ ແລະ ການນຳໃຊ້ເຕັກນິກທີ່ທັນສະໄໝ,
ເລັ່ງໃສ່ປ້ອງກັນການລະບາດຂອງພະຍາດທີ່ເກີດຂຶ້ນຕາມລະດູການ, ເອົາໃຈໃສ່ຕິດຕາມກວດກາ ແລະ ຢັ້ງຢືນຄວາມປອດໄພໃຫ້ແກ່ຜູ້ປະກອບການ ເພື່ອສ້າງຄວາມເຊື່ອໝັ້ນໃຫ້ແກ່ຜູ້ບໍລິໂພກ,
ສືບຕໍ່ປະຕິບັດນະໂຍບາຍ
ປິ່ນປົວແບບເສຍຄ່າ ແລະ ບໍ່ເສຍຄ່າ, ນະໂຍບາຍປິ່ນປົວແມ່ມານ ແລະ ເດັກນ້ອຍບໍ່ເສຍຄ່າໃຫ້ທົ່ວເຖິງກວ່າເກົ່າ. ຄຽງຄູ່ກັນນີ້ກໍຕ້ອງສຸມໃສ່ຍົກລະດັບຄຸນນະພາບສີມືແຮງງານໃນສາຂາວິຊາຊີບ, ດຸ່ນດ່ຽງແຮງງານໃນແຕ່ລະຂົງເຂດໃຫ້ມີຄວາມເໝາະສົມ ໂດຍໃຫ້ສາມາດຕອບສະໜອງກຳລັງແຮງງານໃຫ້ບັນດາໂຄງການລົງທຶນ, ຫົວໜ່ວຍທຸລະກິດ ແລະ ການຜະລິດໃຫ້ໄດ້ໂດຍພື້ນຖານ, ສ້າງສີມືແຮງງານໃຫ້ໄດ້ມາດຕະຖານ ສາມາດແຂ່ງຂັນ ແລະ ກ້າວສູ່ຕະຫລາດແຮງງານໃນຂົງເຂດພາກພື້ນ ໂດຍສະເພາະການກະກຽມເຂົ້າຮ່ວມປະຊາຊົນເສດຖະກິດອາຊຽນ (AEC). ປັບປຸງແຜນແມ່ບົດການນຳໃຊ້ທີ່ດິນແຫ່ງຊາດ ແລະ ດຳເນີນການຈັດສັນການນຳໃຊ້ທີ່ດິນແບບຮອບດ້ານ ແລະ ມີສ່ວນຮ່ວມ ຂັ້ນແຂວງ 18 ແຂວງ, ຂັ້ນເມືອງ 92 ເມືອງ ແລະ ຂັ້ນບ້ານຈຳນວນ 3.455 ບ້ານ ໃນຂອບເຂດທົ່ວປະເທດ, ຈັດສັນ, ກຳນົດເຂດ ແລະ ຟື້ນຟູປ່າປົກຫຸ້ມຂອງປ່າໄມ້ໃຫ້ໄດ້ 70% ຂອງເນື້ອທີ່ທົ່ວປະເທດ ໂດຍການຟື້ນຟູປ່າໄມ້ທຳມະຊາດໃຫ້ໄດ້ 1,5 ລ້ານເຮັກຕາ ແລະ ການປູກປ່າທົດແທນໃຫ້ໄດ້ 35.000 ເຮັກຕາ. ສ້າງລະບົບຄຸ້ມຄອງ ແລະ ນຳໃຊ້ຊັບພະຍາກອນປ່າໄມ້ ເພື່ອຮັບປະກັນການບໍລິຫານປ່າໄມ້ທີ່ມີປະສິດທິພາບ ແລະ
ຍືນຍົງ ແລະ ກົນໄກການຄຸ້ມຄອງການຫລຸດຜ່ອນທາດອາຍພິດເຮືອນແກ້ວຈາກການທຳລາຍປ່າໄມ້ ແລະ ເຮັດໃຫ້ປ່າໄມ້ເຊື່ອມໂຊມ. ກະກຽມມາດຕະການ ແລະ ເງື່ອນໄຂທີ່ຈຳເປັນ ເພື່ອຮັບມືກັບໄພພິບັດທາງທຳມະຊາດທີ່ອາດຈະເກີດຂຶ້ນ ເພື່ອເຮັດໃຫ້ທິດທາງລວມ, ເປົ້າໝາຍ, ວຽກຈຸດສຸມ ແລະ ໜ້າທີ່ຕົ້ນຕໍທີ່ກຳນົດໃນແຜນການສົກປີ
2015-2016 ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດ, ບັນດາກະຊວງ-ອົງການຂັ້ນສູນກາງ ແລະ ທ້ອງຖິ່ນຕ້ອງເອົາໃຈໃສ່ເປັນເຈົ້າການປະຕິບັດ ແລະ ຜັນຂະຫຍາຍບັນດາມາດຕະການຕ່າງໆໃຫ້ກາຍເປັນຮູບປະທຳຫລາຍຂຶ້ນ.
No comments:
Post a Comment