ສື່ມວນຊົນຢ້ຽມຊົມເຂດເສດຖະກິດສະເພາະບຶງທາດຫລວງ

ເນື່ອງໃນໂອກາດກະກຽມໃຫ້ແກ່ການສະເຫລີມສະຫລອງ ວັນສື່ມວນຊົນ ແລະ ການພີມຈຳໜ່າຍແຫ່ງຊາດຄົບຮອບ 65 ປີ (13 ສິງຫາ 1950-13 ສິງຫາ 2015), ໃນທ້າຍອາທິດຜ່ານມາສື່ ມວນຊົນລາວ, ຊຶ່ງນຳພາໂດຍທ່ານ ສີພາ ນົງລາດ ອຳນວຍການສະ ຖານີວິທະຍຸກະຈາຍສຽງແຫ່ງຊາດ ຮອງປະທານ ສະມາຄົມນັກແຫ່ງ ສປປ ລາວ, ທ່ານ ສູນທອນ ຄັນທະວົງອຳນວຍການໃຫຍ່ ສຳນັກຂ່າວສານປະເທດລາວ ຮອງປະທານສະມາຄົມນັກຂ່າວແຫ່ງ ສປປ ລາວ, ໄດ້ດຳເນີນການຢ້ຽມ ເຂດເສດຖະກິດສະເພາະບຶງທາດຫລວງ ເມືອງໄຊເສດຖາ ນະຄອນຫລວຽງຈັນ ໂຄງການດັ່ງ ກ່າວເກີດຂຶ້ນຍ້ອນການຊີ້ນຳ-ນຳພາຂອງພັກ ແລະ ລັດຖະບານໃນການປະຕິບັດນະໂຍບາຍການ ເປີດກວ້າງການລົງ ທຶນເພື່ອເຊື່ອມໂຍງເສດຖະກິດກັບສາກົນ, ແນໃສ່ດຶງດູດການລົງທຶນ ຕ່າງປະເທດເຂົ້າມາລົງທຶນ ເພື່ອປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມໃຫ້ຂະ ຫຍາຍຕົວໄວ ແລະ ຊ່ວຍເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກ ລະດັບດີຂຶ້ນເທື່ອລະກ້າວ.

     ເຂດເສດຖະກິດສະເພາະບຶງທາດຫລວງມີເນື້ອທີ່ທັງໝົດ 365 ເຮັກຕາ, ໂດຍແມ່ນກຸ່ມບໍລິສັດ ຫວ່ານເຟິງ ຊຽງໄຮ ສປ ຈີນ ເປັນຜູ້ລົງທຶນພັດທະນາໃນມູນຄ່າ 5 ຕື້ໂດລາສະຫະລັດ ເພື່ອສ້າງເປັນ ເຂດການຄ້າ, ການລົງທຶນ, ທີ່ຢູ່ອາໄສ, ສູນການສຶກສາ, ກິລາ, ສູນບໍລິການຮັກສາສຸຂະພາບ, ແຫລ່ງທ່ອງທ່ຽວທີ່ສວຍງາມ ແລະ ທັນສະໄໝຢູ່ໃຈກາງນະ ຄອນຫລວງວຽງຈັນ ແລະ ຜ່ານການ ບຸກເບີກກໍ່ສ້າງໂຄງການມາໄດ້ປະມານ 3 ປີ ແລະ ເຫັນວ່າມີຄວາມຄືບໜ້າໃນຫລາຍວຽກຄື: ສຳເລັດການກໍ່ສ້າງເສັ້ນທາງ, ເຂດຂຽວ ແລະ ປັບປຸງທັດສະນີຍະພາບໃນເຂດຕຶກອາຄານ, ການກໍ່ສ້າງຕະຫລາດສົດ, ສູນການຄ້າ, ສະຖານບັນເທິງ, ສູນບໍລິການອາຫານ, ສູນກິລາຄົບວົງຈອນ, ສະຖານີລົດເມເຂົ້າ-ອອກໂຄງການ ແລະ ພັດທະນາໜອງນ້ຳໃຫຍ່ສຳເລັດແລ້ວຈຳນວນໜຶ່ງ, ຊຶ່ງມາຮອດປັດຈຸບັນໄດ້ມີລູກຄ້າທັງພາຍໃນ ແລະ ຕ່າງປະເທດມາຈັບຈອງຫ້ອງພັກອາໄສໃນຕຶກ ອາຄານແລ້ວຈຳນວນໜຶ່ງ ແລະ ຄາດວ່າຈະມີລູກຄ້າມາຈັບຈອງເພີ່ມຫລາຍຂຶ້ນຫລັງຈາກ ການກໍ່ສ້າງໃກ້ສຳເລັດ.

ໃນໂອກາດນີ້, ທ່ານອຳນວຍການວິທະຍຸກະຈາຍສຽງແຫ່ງຊາດ ສີພາ ນົງລາດ ກໍໄດ້ຕາງໜ້າໃຫ້ສື່ ມວນຊົນລາວ ສະແດງຄວາມຂອບໃຈຕໍ່ຄະນະຮັບພິຊອບໂຄງການເຂດເສດຖະກິດສະເພາະບຶງທາດ ຫລວງທີ່ໄດ້ແນະນຳໃຫ້ນັກຂ່າວລາວຮູ້ຈັກ ແລະ ເຂົ້າໃຈແຈ້ງຕໍ່ໂຄງການພັດທະນາດັ່ງກ່າວ ແລະ ຢືນຢັນວ່າສື່ມວນຊົນລາວຈະພ້ອມໃຫ້ການຮ່ວມມືໃນການໂຄສະນາຄວາມຄືບໜ້າຂອງການພັດທະນາໂຄງການ ເພື່ອເຮັດໃຫ້ການຄ້າ, ການລົງທຶນ ແລະການຈັບຈອງຫ້ອງພັກອາໃສໃນເຂດດັ່ງກ່າວມີບັນຍາຟົດຟື້ນ ແລະ ໃນທ້າຍພິທີກໍໄດ້ມີການຈັດກິດຈະກຳແຂ່ງຂັນກິລາເຕະບານມິດຕະພາບລະຫວ່າງສື່ມວນຊົນ ແລະ ພະນັກງານໂຄງການເຂດເສດຖະກິດສະເພາະບຶງທາດຫລວງ ເພື່ອຮັດແໜ້ນຄວາມສາມັກຄີ ຮັກແພງຊຶ່ງກັນ ແລະ ກັນດ້ວຍບັນຍາກາດອັນເບີກບານມ່ວນຊື່ນ ແລະ ຄືກຄື້ນ.