ໃນວັນທີ 28 ສິງຫານີ້, ຢູ່ສະມາຄົມນັກຂ່າວແຫ່ງ ສປປ
ລາວ ນະຄອນ ຫລວງວຽງຈັນ, ທ່ານ ໄຊຊະນະ ສີສານ
ປະທານສະມາຄົມຫັດຖະກຳລາວ ໄດ້ຖະແຫລງຂ່າວຕໍ່ສື່ມວນຊົນລາວກ່ຽວກັບການກະກຽມຈັດງານມະຫາກຳສີມືຫັດຖະກຳລາວ ຄັ້ງທີ 14 ຂຶ້ນໃນລະຫວ່າງວັນທີ 30 ຕຸລາ
ຫາ ວັນທີ 3 ພະຈິກ 2015 ນີ້ ຢູ່ສູນການຄ້າລາວ-ໄອເຕັກ
ທີ່ນະຄອນຫລວງວຽງຈັນນີ້ວ່າ: ປີນີ້ສະມາຄົມຫັດຖະກຳລາວ ຈະໄດ້ຈັດງານວາງສະແດງສິນຄ້າຫັດຖະກຳຂຶ້ນເພື່ອເປັນການປຸກລະດົມເອົາຊາວຊ່າງຫັດຖະກຳໃນທົ່ວປະເທດເຂົ້າຮ່ວມ ແລະ ສ້າງກິດຈະກຳຕ່າງໆທີ່ເປັນມູນມໍລະດົກ,
ທາງດ້ານສິລະປະຫັດຖະກຳອັນເປັນເອກກະລັກຂອງຄົນລາວ ໃຫ້ຊາວໂລກໄດ້ຮັບຮູ້ເຖິງຮີດຄອງປະເພນີ
ແລະ ວັດທະນະທຳຂອງຊາວລາວ, ພ້ອມກັນນີ້ ຍັງເປັນການເປີດໂອກາດດ້ານການຕະຫລາດແບບກວ້າງຂວາງສາມາດສ້າງລາຍຮັບໃຫ້ຊາວຊ່າງຫັດຖະກຳ,
ຊາວບ້ານ ແລະ ຊ່ວຍ
ເຫລືອເຂົາເຈົ້າໃຫ້ຫລຸດພົ້ນອອກຈາກຄວາມທຸກຍາກຕາມແນວທາງນະໂຍບາຍຂອງພັກ ແລະ ລັດຖະບານວາງອອກ ທັງເປັນການພັດທະນາ ແລະ ສົ່ງເສີມຜະລິດຕະພັນຫັດຖະກຳລາວໃຫ້ກາຍເປັນສິນຄ້າອອກສູ່ຕະຫລາດຕ່າງປະເທດນຳອີກ.
ໃນງານຄັ້ງນີ້
ຈະປະກອບມີກິດຈະກຳຕ່າງໆເຊັ່ນ: ການວາງສະແດງ-ຂາຍສິນຄ້າຫັດຖະກຳລາວ ໂດຍເນັ້ນໃສ່ເພື່ອສົ່ງເສີມ ແລະ
ພັດທະນາ ສີໄມ້ລາຍມືຂອງຄົນລາວ, ເອກກະລັກລາວ, ຜະລິດຕະພັນຂອງຄົນລາວ ໃຫ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ການແຂ່ງຂັນຜະລິດຕະພັນດີເດັ່ນ ໃນຫົວຂໍ້: ເຄື່ອງທີ່ລະນຶກລາວ
ໃຫ້ສ່ອດຄ່ອງກັບຜະລິດຕະພັນຂອງຄົນລາວທີ່ແທ້ຈິງ; ການສາທິດການຜະລິດ ເປັນຕົ້ນ ຂະບວນການລ້ຽງມ້ອນສາວໄໝ, ຕ່ຳຫູກ,
ເຂັມຝ້າຍ, ແສ່ວ, ການທັກປໍປຽດ, ຈັກສານ, ເຄື່ອງປັ້ນດິນເຜົາ, ແກະສະລັກໄມ້ ແລະ ອື່ນໆ
ພ້ອມນັ້ນ ກໍຈະມີ ການເດີນແບບເສື້ອຜ້າອາພອນຂອງລາວ ເຮົາໂດຍຈະເນັ້ນໃສ່ຊຸດປະຈຳຊາດຂອງບັນດາປະເທດສະມາຊິກອາຊຽນ ແລະ ແນະນຳດອກໄມ້ປະຈຳຊາດຂອງແຕ່ລະປະເທດ, ເດີນແບບເສື້ອຜ້າອາພອນແບບລາວໆ, ໂດຍຈະມີການເອ້ເຄື່ີອງປະດັບ,
ຊຸດປະຍຸກທີ່ທັນສະໄໝ, ຊຸດຂອງຊົນເຜົ່າຕ່າງໆ ແລະ ກິດຈະກຳອື່ນໆອີກ
ດັ່ງນັ້ນ ຈຶ່ງຂໍເຊີນຊວນທຸກທ່ານທີ່ສົນໃຈ ເຂົ້າຮ່ວມຊົມ ແລະ ຮ່ວມຊື້ຜະລິດຕະພັນຂອງລາວເຮົາໄດ້ນຳດ້ວຍ.
No comments:
Post a Comment