ກຳມະກອນ 72 ຄົນມີອາການເບື່ອສານເຄມີຢູ່ໂຮງງານແຫ່ງໜຶ່ງໃນເມືອງໄຊທານີ

           

ຫົວໜ້າຂະແໜງລະບາດວິທະຍາ, ພະແນກສາທາລະນະສຸກ ນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 21 ກັນຍານີ້, ໜ່ວຍງານຂອງຕົນໄດ້ຮັບໂທລະສັບຈາກໂຮງງານແຫ່ງໜຶ່ງວ່າ: ມີພະນັກງານເມົາ (ເບື່ອ) ສານເຄມີພາຍໃນໂຮງງານແຫ່ງໜຶ່ງ, ຈາກນັ້ນໜ່ວຍງານຂອງຕົນຈຶ່ງໄດ້ລົງກວດກາ ແລະ ສອບສວນໂຮງງານດັ່ງກ່າວ ພົບພະນັກງານ ແລະ ກຳມະກອນຈຳນວນ 72 ຄົນ ໃນຈຳນວນ 400 ຄົນ, ມີອາການວິນຫົວ, ປວດຮາກ, ສັ່ນເຊັນຕາມຮ່າງກາຍ ແລະ ມຶນຕາມຄໍ່ຕີນຄໍ່ມື ແລະ ຈາກການກວດຢ່າງລະອຽດແພດສັນນິຖານວ່າເປັນການເບື່ອສານເຄມີປະເພດຢາຂ້າແມງໄມ້ ແລະ ຈາກການບອກເລົ່າຂອງພະນັກງານຄົນໜຶ່ງວ່າ: ໃນວັນທີ 20 ກັບຍາທາງໂຮງງານໄດ້ມີການພົ່ນຢາຂ້າຍຸງພາຍໃນໂຮງງານ, ດັ່ງນັ້ນ ຈຶ່ງອາດເປັນໄດ້ວ່າເປັນການເບື່ອເມົາຢາຂ້າຍຸງອັນເນື່ອງຈາກໃສ່ຢາໃນປະລິມານທີ່ເຂັ້ມຂຸ້ນເກີນໄປ ຈຶ່ງເຮັດໃຫ້ຢານານລະເຫີຍ ແລະ ພະນັກງານໄດ້ສູບດົມເຂົ້າໄປຈຶ່ງມີອາການເບື່ອເກີດຂຶ້ນ ແລະ ເພື່ອຄວາມປອດໄພຂອງພະນັກງານພາຍໃນໂຮງງານດັ່ງກ່າວ, ພາກສ່ວນກ່ຽວຂ້ອງໄດ້ສັ່ງ
ໃຫ້ໂຮງງານຢຸດການເຮັດວຽກເປັນເວລາ 2-3 ວັນເພື່ອໃຫ້ສານເຄມີລະເຫີຍໝົດໄປ, ສ່ວນຜູ້ທີ່ມີອາການເບື່ອທັງໝົດແມ່ນໄດ້ຮັບການປິ່ນປົວ ແລະ ຫາຍດີແລ້ວ, ເຖິງຢ່າງໃດກໍຂໍເຕືອນມາຍັງໂຮງຈັກໂຮງງານ ແລະ ຊົນຊຸມຕ່າງໆຄວນມີສະຕິລະວັງຕົວໃນການນຳໃຊ້ຢາຂ້າແມງໄມ້ປະເພດຕ່າງໆ ແລະ ຄວນປະຕິບັດຕາມວິທີການນຳໃຊ້ຢ່າງເຂັ້ມງວດ ແລະ ສິ່ງສຳຄັນແມ່ນຕ້ອງໃຊ້ຜ້າອັດປາກທຸກຄັ້ງເມື່ອໃຊ້ສານເຄມີເພື່ອເປັນການປ້ອງກັນຕົວ.