ສປປ ລາວ ຄາດວ່າຮອດປີ 2020 ຈະສາມາດດຶງດູດນັກທ່ຽວທ່ຽວຕ່າງປະເທດ ເຂົ້າມາທ່ຽວຢູ່ລາວຫລາຍກວ່າ 6 ລ້ານຄົນຕໍ່ປີ ແລະ ຈະສ້າງລາຍຮັບຈາກການທ່ອງທ່ຽວດັ່ງກ່າວໃຫ້ໄດ້ 953 ລ້ານໂດລາສະຫະລັດຕໍ່ປີ ເພື່ອບັນລຸເປົ້າໝາຍດັ່ງກ່າວຂະແໜງກ່ຽວຂ້ອງຈະຕ້ອງໄດ້ສຸມໃສ່ສ້າງແຜນພັດທະນາແຫລ່ງທ່ອງທ່ຽວໃໝ່ໃຫ້ໄດ້ 25 ແຫ່ງ, ຈັດສັນແຫລ່ງທ່ອງທ່ຽວໃຫ້ໄດ້ 40 ແຫ່ງ, ປັບປຸງພັດທະນາແຫລ່ງທ່ອງທ່ຽວທີ່ມີຈຸດເດັ່ນຕ່າງໆໃຫ້ຄຸນນະພາບດີຂຶ້ນຢ່າງໜ້ອຍ 10 ແຫ່ງ, ພ້ອມສູ້ຊົນການເຊື່ອມໂຍງ “ເວບໄຊ” ທ່ອງທ່ຽວລາວເຂົ້າກັບ ASEAN, GMS,
PATA ແລະ ຂະຫຍາຍຜູ້ຕາງໜ້າຕົວແທນການທ່ອງທ່ຽວລາວຢູ່ປະເທດທີ່ເປັນຕະຫລອດຕົ້ນຕໍຂອງການທ່ອງທ່ຽວໃຫ້ໄດ້ 5 ແຫ່ງ, ກໍຄືສູ້ຊົນຈັດງານປີທ່ອງທ່ຽວລາວຄັ້ງທີ 3 ໃນປີ 2018.
ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປີດເຜີຍເມື່ອບໍ່ດົນນີ້ວ່າ: ເພື່ອຈະບັນລຸຕາມເປົ້າໝາຍທີ່ກ່າວໄວ້ນັ້ນ ຕ້ອງໄດ້ສືບຕໍ່ພັດທະນາການທ່ອງທ່ຽວລາວ ໃຫ້ມີຄວາມຍືນຍົງຕາມທິດສົ່ງເສີມການທ່ອງທ່ຽວທຳມະຊາດ, ວັດທະນ ະທຳ ແລະ ປະຫວັດສາດ ເຮັດໃຫ້ປະເທດເຮົາກາຍເປັນຈຸດໝາຍປາຍທາງການທ່ອງທ່ຽວຂອງນັກທ່ອງທ່ຽວຈາກທົ່ວໂລກ, ເປັນພື້ນຖານໃນການເຊື່ອມຕົວເຂົ້າກັບການທ່ອງທ່ຽວໃນລະດັບພາກພື້ນ-ສາກົນ, ພັດທະນາ ແລະ ກາຍເປັນອຸດສາຫະກຳ ແລະ ເປັນຂະແໜງການເສດຖະກິດນຳໜ້າເພື່ອຊ່ວຍເຮັດໃຫ້ປະຊາຊົນມີວຽກເຮັດງານທຳ ແລະ ສາມາດຫລຸດພົ້ນອອກຈາກຄວາມທຸກຍາກໄດ້ໂດຍໄວປະກອບສ່ວນຊຸກຍູ້ເຮັດໃຫ້ລາຍໄດ້ແຫ່ງຊາດເພີ່ມຂຶ້ນໃນລະດັບທີ່ແນ່ນອນ.
No comments:
Post a Comment