ທາງຫລວງເລກ 11 ຊຸດຕົວແຕກແຫງບໍລິເວນກວ້າງ

ຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ເດດສົງຄາມ ທໍາມະວົງ ລາຍງານໃຫ້ຮູ້ວ່າ: ໃນຕອນເຊົ້າວັນທີ 23 ກັນຍານີ້, ໄດ້ເກີດສະພາບເສັ້ນທາງເລກທີ 11 ຫລັກກິໂລແມັດທີ 24 ເຂດຕີນຄ້ອຍແລນມານ, ບ້ານອ່າງສໍາພັນນາ ເມືອງສັງທອງນະຄອນຫລວງວຽງຈັນ ຊຸດຕົວແຕກແຫງມີຄວາມຍາວປະມານ 60 ກວ່າເມັດ ແລະ ກວ້າງປະມານ 5-6 ແມັດ, ເຊິ່ງເສັ້ນທາງດັ່ງກ່າວປູຢາງຂົ້ວ(ອັດສະຟານ)ທີ່ຫາກໍສໍາເລັດການກໍ່ສ້າງໃນປີກາຍນີ້, ສ່ວນສາເຫດຂອງການຊຸດຕົວແຕກແຫງດັ່ງກ່າວແມ່ນເກີດຈາກການກັດເຊາະຂອງນໍ້າຂອງ ແລະ ນໍ້າທີ່ໄຫລລົງມາຈາກພູໃນເຂດໃກ້ຄຽງ, ພາຍຫລັງເກີດມີຝົນຕົກແຮງຕິດຕໍ່ກັນຫລາຍວັນຜ່ານມາ. ປັດຈຸບັນພາກສ່ວນກ່ຽວຂ້ອງໄດ້ນໍາເອົາກົນຈັກໜັກສຸມໃສ່ການເຮັດທາງເວັ້ນບໍລິເວນຈຸດເກີດເຫດເພື່ອໃຫ້ລົດສາມາດຜ່ານໄປມາໄດ້ເປັນປົກກະຕິ ແລະ ຄາດວ່າການສ້ອມແປງແກ້ໄຂສະພາບທີ່ເກີດຂຶ້ນຈະສໍາເລັດໃນໄວໆນີ້. ສະນັ້ນ ຈຶ່ງຮຽກຮ້ອງໃຫ້ຜູ້ຂັບຂີ່ລົດຜ່ານໄປມາຈົ່ງມີສະຕິລະວັງຕົວຕື່ມ, ເນື່ອງຈາກຊ່ວງນີ້ມີຝົນຕົກຫລາຍເຮັດໃຫ້ຫລາຍເສັ້ນທາງມີສະພາບມື່ນ ແລະ ດິນເຈື່ອນ, ຊຶ່ງອາດພາໃຫ້ເກີດອຸປະຕິເຫດໄດ້ງ່າຍ.