ປະເທດລຸ່ມນໍ້າຂອງ ແລະ ອາເມລິກາແລກປ່ຽນບົດຮຽນການຮັບມືໄພພິບັດທໍາມະຊາດ

ກອງປະຊຸມແລກປ່ຽນວິຊາການກ່ຽວກັບການຮັບມືໄພພິບັດທໍາມະຊາດລະຫວ່າງບັນດາປະເທດລຸ່ມແມ່ນໍ້າຂອງຄື: ລາວ, ຫວຽດນາມ, ກໍາປູເຈຍ, ມຽນມາ ແລະ ໄທກັບສະຫະລັດອາເມລິກາ ພາຍໃຕ້ຂອບການຮ່ວມມືແມ່ນໍ້າຂອງຕອນລຸ່ມ-ສ.ອາເມລິກາຄັ້ງທີ 4, ໄດ້ຈັດຂຶ້ນໃນລະຫວ່າງວັນທີ 22- 25 ກັນຍານີ້, ທີ່ໂຮງແຮມດອນຈັນພາເລດ,

ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານຮັກສາການຫົວໜ້າກົມເສດຖະກິດ, ກະຊວງການຕ່າງປະເທດ ລາວຄອນເພັງ ທໍາມະວົງ ແລະ ທ່ານຮອງຜູ້ບັນຊາການກອງພົນກອງທັບສະຫະລັດອາເມລິກາປະຈໍາພາກພື້ນປາຊີຟິກ, ມີຄະນະຜູ້ແທນຈາກປະເທດລຸ່ມແມ່ນໍ້າຂອງ ແລະ ຜູ້ຕາງໜ້າອົງການຈັດຕັ້ງສາກົນເຂົ້າຮ່ວມເປັນຈໍານວນຫລາຍ, ເພື່ອຮ່ວມກັນປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນກ່ຽວກັບການຮັບມືກັບໄພພິບັດທໍາມະຊາດທີ່ອາດຈະເກີດຂຶ້ນໃນຂົງເຂດອານຸພາກພື້ນແມ່ນໍ້າຂອງເປັນຕົ້ນ: ໄພນໍ້າຖ້ວມທີ່ສົ່ງຜົນກະທົບຕໍ່ຂະແໜງກະສິກໍາ, ສາທາລະນະສຸກແລະພື້ນຖານໂຄງລ່າງດ້ານຄົມມານາຄົມ, ນອກຈາກນີ້, ຜູ້ແທນເຂົ້າຮ່ວມຍັງໄດ້ລົງໄປບ້ານຄວາຍແດງ ເມືອງຫາດຊາຍຟອງ ນະຄອນ ຫລວງວຽງຈັນ ເພື່ອເບິ່ງສະຖານທີ່ເຄີຍຖືກນໍ້າຖ້ວມໜັກເມື່ອປີ 2008.

ກອງປະຊຸມລະດັບວິຊາການເທື່ອນີ້, ແມ່ນໂຄງການໜຶ່ງຂອງເສົາຄໍ້າການຮ່ວມມືຂະແໜງຊັບພະຍາກອນນໍ້າ ແລະ ສິ່ງແວດລ້ອມຂອງຂອບການຮ່ວມມືແມ່ນໍ້າຂອງຕອນລຸ່ມ ແລະ ສະຫະລັດອາເມລິກາທີ່ໄດ້ເລີ່ມຈັດຕັ້ງປະຕິບັດມາແຕ່ປີ 2011 ເປັນຕົ້ນມາ ແລະ ບັນດາປະເທດລຸ່ມແມ່ນໍ້າຂອງໄດ້ຜັດປ່ຽນກັນເປັນເຈົ້າພາບຮ່ວມກັບສະຫະລັດອາເມລິ ກາ, ເພື່ອສ້າງູຄວາມເຂັ້ມແຂງໃຫ້ແກ່ພະນັກງານວິຊາການຂອງບັນດາປະເທດລຸ່ມແມ່ນໍ້າຂອງໃຫ້ສາມາດຮັບມືກັບໄພທໍາມະຊາດເຊັ່ນ: ໄພນໍ້າຖ້ວມ, ການປ້ອງກັນພະຍາດລະບາດ ແລະ ການຊ່ວຍເຫລືອຜູ້ເຄາະຮ້າຍລວມເຖິງການຫລຸດຜ່ອນ ແລະ ຟື້ນຟູຄວາມເສຍຫາຍຈາກໄພທໍາມະຊາດທີ່ອາດຈະເກີດຂຶ້ນມີປະສິດທິຜົນກວ່າເກົ່າ.