ເມື່ອເຫັນເຫດການນີ້ ໃຜໆກໍອາດຈະຕົກໃຈ
ເມື່ອລູກຊາຍອາຍຸ 14 ປີ
ເອົາມີດມາປາດຄໍຜູ້ເປັນພໍ່ໃນຂະນະທີ່ທົນບໍ່ໄຫວຕໍ່ຄວາມໂມໂຫຂອງຜູ້ເປັນພໍ່ທີ່ທຳຮ້າຍຮ່າງກາຍຜູ້ເປັນເມຍເປັນແມ່ດ້ວຍຄວາມທາລຸນ, ຊຶ່ງເຫດການດັ່ງກ່າວ ເກີດຂຶ້ນໃນຫົວຄ່ຳຂອງວັນທີ
30 ສິງຫາຜ່ານມານີ້ ແລະ ກໍບໍ່ແມ່ນຢູ່ບ່ອນອື່ນໄກ, ເຫດເກີດຂຶ້ນຢູ່ກະໂຕເມືອງຈັນທະບູລີ ນະຄອນຫລວງວຽງຈັນ, ຊຶ່ງແມ່ນບ່ອນສູນກາງເສດຖະກິດ-ການເມືອງ ແລະ ວັດທະນະທຳຂອງປະເທດນີ້ເອງ.
ເຫດການມີຢູ່ວ່າ: ມື້ນັ້ນ ຜູ້ເປັນພໍ່ອາຍຸກໍປະມານ 40 ກວ່າປີ
ໄດ້ໄປດື່ມເຫລົ້າ, ດື່ມເບຍຊຸມແຊວກັບໝູ່, ເມື່ອກັບມາເຮືອນຜູ້ເປັນເມຍຢູ່ກັບລູກຊາຍເກີດຄວາມບໍ່ພໍໃຈ ແລະ ມີອາລົມບໍ່ດີຕໍ່ຜົວ, ຜູ້ເວົ້າໄປ ຜູ້ເວົ້າມາ ຫລາຍປາກ ຫລາຍຄວາມບວກກັບນ້ຳເມົາກໍເລີຍເກີດເສິກດັ່ງກ່າວຂຶ້ນ, ເມື່ອເຫັນເຫດການຮ້າຍແຮງຂອງຜູ້ເປັນພໍ່ທີ່ມີຕໍ່ແມ່ຂອງຕົນ ລູກຊາຍໄວ
14 ປີ
ບໍ່ຮູ້ວ່າຜີໂຕໃດມາສູນກໍເລີຍແລ່ນເຂົ້າເຮືອນຄົວຈັບເອົາມີດມາປາດຄໍຜູ້ເປັນພໍ່ ເພື່ອຫວັງຊ່ວຍແມ່ໄດ້ຮັບບາດເຈັບສາຫັດ ໂຊກດີແຕ່ຢູ່ໃກ້ໂຮງໝໍ ຈຶ່ງຊ່ວຍຊີວິດໄວ້ໄດ້.
ຕໍ່ເຫດການດັ່ງກ່າວ ຈະເອົາໂທດໃຜ
ເມື່ອຜູ້ກະທຳຜິດພັດແມ່ນລູກຊາຍຂອງຕົນເອງ ແລະ ມີອາຍຸພຽງ 14 ປີ ຖ້ານັກຂ່າວເປັນເຈົ້າໜ້າທີ່ທາງກົດໝາຍກໍຈະເອົາເລື່ອງຜູ້ເປັນພໍ່ເປັນແມ່, ມາສຶກສາອົບຮົມໃນຄວາມເປັນມະນຸດ, ຄວາມເປັນແບບເປັນຢ່າງໃນຄອບຄົວຕໍ່ລູກຕໍ່ເມຍ, ສິ່ງໃດຄວນປະພຶດ ແລະ ບໍ່ຄວນປະພຶດ, ຖ້າເຮັດໄດ້ແນວນີ້ ຈຶ່ງຈະສາມາດສຶກສາລູກຫລານຂອງຕົນໄປໃນທາງທີ່ຖືກຕ້ອງ ແລະ ກາຍເປັນອະນາຄົດທີ່ດີຂອງຊາດໄດ້ ແລະ ບໍ່ພຽງແຕ່ເຫລົ່ານັ້ນ ເຫດການດັ່ງກ່າວ ຍັງເປັນອຸທາຫອນເຕືອນສະຕິສັງຄົມ ແລະ ຄອບຄົວໃນການເອົາໃຈໃສ່ ຍົກສູງລະດັບການສຶກສາ-ວັດທະນະທຳ, ບໍ່ຄວນເຮັດໃຫ້ນະໂຍບາຍສ້າງບ້ານ ແລະ ຄອບຄົວວັດທະນະທຳກາຍເປັນສູນເປົ່າ.
No comments:
Post a Comment