ສານປະຊາຊົນ​ຫລວງ​ນ້ຳທາ​ຕັດສິນ​ປະຫານ​ຊີວິດຂະບວນການຄ້າ​ຢາ​ເສບ​ຕິດຂ້າມຊາດລາຍໃຫຍ່

ຂ່າວ-ພາບ: ຫນັງສືພິມ ປກສ

 ເມື່ອບໍ່ດົນມານີ້, ສານປະຊາຊົນແຂວງຫລວງນ້ຳທາ, ໄດ້ຕັດສີນປະຫານຊີວິດຂະບວນການຄ້າຢາເສບຕິດຂ້າມຊາດລາຍໃຫຍ່ຫລາຍຄະດີຄື: ຕັດສີນປະຫານຊີວິດທ້າວ ໜໍ ອາຍຸ 45 ປີ (ສັນຊາດ​ຈີນ) ພັກ​ເຊົາ​ຢູ່​ບ້ານ​ຊຽງ ​ແລະ ທ້າວ ​ໃໝ່​ຈ້ອຍ ຢູ່​ບ້ານ​ຊຽງ, ​ເມືອງ​ສິງໃນຂໍ້ຫາຂົນສົ່ງຢາເສບຕິດປະເພດເຮໂຣອິນ, ນ້ຳໜັກ 700 ກລາມ, ເຊິ່ງຖືກເຈົ້າໜ້າທີ່ຈັບຕົວໄດ້ຢູ່ເຮືອນພັກແຫ່ງໜຶ່ງໃນເຂດເມືອງສິງ ແລະ ຕັດສິນປະຫານຊີວິດທ້າວ ​ໃໝ່​ອຸ່ນ​ແສງ ອາຍຸ 42 ປີ, ທ້າວ ​ໃໝ່​ຈ່າຍ​ປີ ອາຍຸ 28 ປີທັງ​ສອງ​ຢູ່​ບ້ານ​ຊຽງ​ມູນ, ທ້າວ ​ໃໝ່​ຂຸ່ງ ອາຍຸ 38 ປີຢູ່​ບ້ານນ້ຳກຽງ ​ເມືອງ​ສິງ ​ແລະ ທ້າວ ຕຸ​ນ ອາຍຸ 35 ປີ ຢູ່​ບ້ານ​ດົງ​ສະຫວາດ ເມືອງ​ສີ​ສັດຕະ​ນາກ ນະຄອນຫລວງ​ວຽງຈັນ ໃນຂໍ້ຫາຂົນສົ່ງຢາເສບຕິດປະເພດຫົວເຊື້ອຜະລິດຢາໄອນ້ຳໜັກ 56 ກິໂລຈາກປະເທດມຽນມາເຂົ້າມາລາວ, ໂດຍພວກກ່ຽວຖືກເຈົ້າໜ້າທີ່ຈັບຕົວໄດ້ຢູ່ເຂດຊາຍແດນລາວ-ມຽນມາໃນເດືອນ

ມິຖຸນາ 2013 ແລະ ຕັດສີນປະຫານຊີວິດທ້າວ ທອງຂາວ ອາຍຸ 32 ປີ, ທ້າວ ​ແປງ ອາຍຸ 49 ປີ ​ແລະ ທ້າວ ອິນ ອາຍຸ 30 ປີ ສັນຊາດ​ມຽນມາ, ທັງ​ສາມ​ຢູ່​ບ້ານ​ນາ​ຄຳ ເມືອງ​ສິງ ແລະ ຕັດສິນລົງໂທດຜູ້ຮ່ວມຂະບວນການອີກສອງຄົນຄື: ທ້າວ ກອງ ອາຍຸ 26 ປີ ຢູ່​ບ້ານ​ມອມ ​ແລະ ທ້າວ ຄຳ​ແກ້ວ ອາຍຸ 26 ປີ ຢູ່​ບ້ານ​ນາ​ຄຳ, ເມືອງສິງໃຫ້ຈຳຄຸກ 15 ປີ, ພ້ອມປັບໃໝຜູ້ລະ 100 ລ້ານກີບ ໃນຂໍ້ຫາຂົນສົ່ງຢາເສບຕິດປະເພດຢາບ້າຈຳນວນ 30 ມັດ, ນ້ຳໜັກ 6 ກິໂລຈາກປະເທດມຽນມາເຂົ້າມາລາວ, ຊຶ່ງພວກກ່ຽວແມ່ນຖືກເຈົ້າໜ້າທີ່ຈັບຕົວໄດ້ຢູ່ເຂດຊາຍແດນລາວ-ມຽນມາເຊັ່ນກັນເມື່ອເດືອນເມສາ 2013 ຜ່ານມາຈຶ່ງຖືກສານຕັດສີນລົງໂທດຕາມລະບຽບກົດໝາຍ.