ໃນລະຫວ່າງວັນທີ 25-26 ຕຸລາ
2015, ທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ,
ລັດຖະມົນຕີວ່າການກະຊວງການຕ່າງປະເທດ, ທັງເປັນປະທານຄະນະກໍາມາທິການຮ່ວມ
ວ່າດ້ວຍການຮ່ວມມື ລາວ-ໄທ
ໄດ້ເຂົ້າຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມື ລາວ-ໄທ ຄັ້ງທີ 20
ທີ່ຈັງຫວັດຊຽງລາຍ, ຣາຊະອານາຈັກໄທ ຕາມການເຊື້ອເຊີນຂອງທ່ານ ດອນ ປຣະມັດວິໄນ
ລັດຖະມົນຕີວ່າການກະຊວງການຕ່າງປະເທດ, ປະທານຄະນະກໍາມາທິການຮ່ວມ ວ່າດ້ວຍການຮ່ວມມື ໄທ-ລາວ.
ກອງປະຊຸມໄດ້ທົບທວນຜົນການຈັດຕັ້ງປະຕິບັດບົດບັນທຶກກອງປະຊຸມຄັ້ງທີ່ຜ່ານມາ ແລະ
ໄດ້ປຶກສາຫາລືໃນຫລາຍບັນຫາ ທັງບັນຫາທີ່ຍັງຈະຕ້ອງສືບຕໍ່ຮ່ວມມືກັນ ແລະ
ບັນຫາໃໝ່ທີ່ຈະຕ້ອງຊຸກຍູ້ສົ່ງເສີມໃຫ້ຂະຫຍາຍຕົວ ແລະ ແຕກດອກອອກຜົນ
ເປັນຕົ້ນການແລກປ່ຽນການຢ້ຽມຢາມຂອງການນຳຂັ້ນສູງລະຫວ່າງສອງປະເທດຈະຕ້ອງສືບຕໍ່ເປັນປົກກະຕິ,
ການປັກຫລັກໝາຍຊາຍແດນ ທັງສອງຝ່າຍໄດ້ເຫັນດີເປັນເອກະພາບຮ່ວມກັນສືບຕໍ່ດຳເນີນການສຳຫລວດ
ແລະ ປັກ
ຫລັກໝາຍຊາຍແດນທາງບົກທີ່ຍັງຄົງຄ້າງໃຫ້ສຳເລັດໂດຍໄວ ແລະ
ຊາຍແດນທາງນ້ຳ ຈະຕ້ອງໄດ້ຖ່າຍຖອດທາງດ້ານເຕັກນິກຈາກແຜນທີ່ຝຣັງ-ສະຫຍາມ ມາດຕາສ່ວນ 1/25,000 ໃສ່ແຜນທີ່ສະບັບໃໝ່
ຕາມວິທີການແຕ່ລະຝ່າຍ ແລະ
ກ້າວໄປສູ່ການສ້າງຂໍ້ກຳນົດທາງດ້ານເຕັກນິກໃນການສຳຫລວດ ແລະ
ປັກຫລັກໝາຍ ທັງໝົດເຫລົ່ານີ້ ແມ່ນເພື່ອເຮັດໃຫ້ຊາຍແດນມີຄວາມສະຫງົບ, ມີການພັດທະນາຮ່ວມກັນ ແລະ ເປັນມູນມໍລະດົກໃຫ້ແກ່ຄົນຮຸ່ນໃໝ່ຜູ້ສືບທອດຕໍ່ໄປ;
ຝ່າຍໄທເຫັນດີຈະພິຈາລະນາໃນການຮັບຊື້ໄຟຟ້າຈາກ ສປປ ລາວ
ເພີ່ມເຕີມອີກຈາກກອບ MOU 7000 ເມັກກາວັດ
ແລະ ພ້ອມທັງຈະມີການຮ່ວມມືກັນໃນການສະໜອງກະແສໄຟຟ້າໃຫ້ແກ່ສິງກະໂປ ໂດຍການນຳໃຊ້ສາຍສົ່ງຜ່ານໄທ ແລະ ມາເລເຊຍ; ສ່ວນການຮ່ວມມືດ້ານແຮງງານ
ທັງສອງຝ່າຍຈະຕ້ອງໄດ້ມີການປັບປຸງບົດບັນທຶກຄວາມເຂົ້າໃຈໃໝ່
ເພື່ອໃຫ້ແທດເໝາະກັບສະພາບແລະເງື່ອນໄຂໃນປັດຈຸບັນ
ທັງໃຫ້ມີລັກສະນະກວ້າງຂວາງ ແລະ ພັດທະນາໃຫ້ມີຄວາມຍຶນຍົງຮ່ວມກັນ.ສຳລັບການພັດທະນາພື້ນຖານໂຄງລ່າງ,
ຖືວ່າເປັນສ່ວນສຳຄັນອີກດ້ານໜຶ່ງ
ເພື່ອແນໃສ່ການເຊື່ອມໂຍງເສັ້ນທາງຄົມມະນາຄົມໃຫ້ທະລຸ ແລະ
ໂລ່ງລ່ຽນໃນການຂົນສົ່ງ ແລະ ໂດຍສານລະຫວ່າງກັນ ແລະ
ໃຫ້ມີການເຊື່ອມໂຍງກັບອະນຸພາກພື້ນ;ການຄ້າຈະຕ້ອງອຳນວຍຄວາມສະດວກເຊິ່ງກັນແລະກັນບໍ່ວ່າຈະເປັນການຄ້າສອງຝ່າຍ
ແລະ ການຄ້າຜ່ານແດນ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນໃນທ້າຍປີນີ້
ຍິ່ງຕ້ອງໃຫ້ມີການຮ່ວມມືລະຫວ່າງກັນ, ທັງນີ້ກໍເພື່ອເຮັດໃຫ້ແຜນປະຕິບັດງານຂອງອາຊຽນໃຫ້ມີປະສິດທິຜົນ, ປະກອບສ່ວນສຳຄັນອັນໜຶ່ງໃນຖານະສະມາຊິກອາຊຽນດ້ວຍກັນ.ຄຽງຄູ່ກັນນັ້ນ ການພັດທະນາຊັບພະຍາກອນມະນຸດ ແລະ
ພື້ນຖານໂຄງລ່າງດ້ານການບໍລິການໃນຂະແໜງດ້ານສັງຄົມ
ຖືວ່າເປັນພື້ນຖານການພັດທະນາຊິວິດການເປັນຢູ່ນັ້ນຈະຕ້ອງໄດ້ເພິ່ງພາແລະອາໄສເຊິ່ງກັນແລະກັນ.
ໃນໄລຍະຜ່ານມາ, ລັດຖະບານໄທໄດ້ໃຫ້ການສະໜັບສະໜູນໃນຫລາຍໂຄງການ
ເປັນຕົ້ນແມ່ນໃນຂະແໜງສຶກສາ, ກະສິກຳ, ສາທາລະນະສຸກ ແລະ ຂະແຫນງການອື່ນໆ. ໃນວັນທີ 27
ຕຸລາ 2015ລັດຖະມົນຕີຕ່າງປະເທດທັງສອງທ່ານ
ໄດ້ຮ່ວມກັນວາງສິລາລຶກການກໍ່ສ້າງໂຮງໝໍແຂວງບໍ່ແກ້ວໄລຍະສອງ.
ໂຄງການນີ້ຖືວ່າເປັນສ່ວນໜຶ່ງໃນການປະກອບສ່ວນສຳຄັນເຂົ້າໃນການພັດທະນາຄຸນນະພາບຊີວິດ ຈາກລັດຖະບານໄທ
ແລະ ເປັນອີກກິດຈະກໍາໜຶ່ງໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ ແລະ ໄທ
ຄົບຮອບ 65 ປີ.
ໃນຕອນບ່າຍຂອງວັນທີ
26 ຕຸລາ, ພາຍຫຼັງກອງປະຊຸມ, ລັດຖະມົນຕີທັງສອງໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືສ້າງສູນພັດທະນາສັງຄົມມິດຕະພາບ
ລາວ-ໄທ, ຊຶ່ງເປັນສູນຟື້ນຟູຜູ້ຖຶກເຄາະຮ້າຍຈາກການຄ້າມະນຸດ ແລະ
ສົ່ງເສີມພັດທະນາອາຊີບ,ມູນຄ່າການກໍ່ສ້າງຈຳນວນ 25 ລ້ານບາດ
ແລະ
ໃນຕອນແລງຂອງວັນດຽວກັນປະທານຮ່ວມທັງສອງຝ່າຍກໍໄດ້ເດີນທາງໄປຢ້ຽມຢາມເຂດທ່ອງທ່ຽວພູຊີ້ຟ້າ.
ໃນໂອກາດດັ່ງກ່າວ, ທ່ານທອງລຸນ ສີສຸລິດ,
ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ,
ໄດ້ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນໄທ
ທີ່ໃຫ້ການຕ້ອນຮັບຢ່າງອົບອຸ່ນ, ດ້ວຍໄມຕີຈິດມິດຕະພາບ ແລະ ອຳນວຍຄວາມສະດວກທຸກດ້ານ
ໃນການເຂົ້າຮ່ວມກອງປະຊຸມ ທີ່ຣາຊະອານາຈັກໄທ ຄັ້ງນີ້ ປະສົບຜົນສຳເລັດຢ່າງຈົບງາມ.
No comments:
Post a Comment