ວັນທີ
27 ຕຸລານີ້, ທ່ານ ອາຊາງ ລາວລີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດການປົກຄອງ ໄດ້ໃຫ້ກຽດໂອ້ລົມຕໍ່ກອງປະຊຸມໃຫຍ່ອົງຄະນະພັກກະຊວງຍຸຕິທໍາຄັ້ງທີ
IV ພາຍຫລັງໄດ້ດໍາເນີນມາແຕ່ວັນທີ 26 ຕຸລານີ້ ທີ່ສູນເຝິກອົບຮົມ ແລະ ຮ່ວມມືສາກົນ
ໃນນະຄອນຫລວງວຽງຈັນ ເຊິ່ງທ່ານໄດ້ເນັ້ນໃຫ້ຄະນະພັກຊຸດໃໝ່ຂອງກະຊວງຍຸຕິທໍາເອົາໃຈໃສ່ເຊີດຊູບົດບາດເປັນໃຈກາງໃນການສ້າງ,
ປັບປຸງກົດໝາຍ ແລະ ນິຕິກໍາຕ່າງໆໃຫ້ມີຄຸນນະພາບສູງຂຶ້ນ, ຮັບປະກັນຄວາມສັກສິດຂອງກົດໝາຍ, ປັບປຸງລະບົບຍຸຕິທໍາໃຫ້ເປັນທີ່ເພີ່ງຂອງປະຊາຊົນ, ຮັບໃຊ້ປະຊາຊົນຢ່າງບໍລິສຸດໃຈ ແລະ ເພີ່ມທະວີການສຶກສາອົບຮົມການເມືອງແນວຄິດໃນຖັນແຖວສະມາຊິກພັກ, ພະນັກງານ-ລັດຖະກອນໃຫ້ມີການຫັນປ່ຽນຢ່າງຕັ້ງໜ້າເລິກເຊິ່ງ ແລະ ແທດເໝາະກັບສະພາບຕົວຈິງ.
ທ່ານ
ອາຊາງ ລາວລີ ໄດ້ກ່າວວ່າ: ຂະແໜງຍຸຕິທໍາຕ້ອງໄດ້ເອົາໃຈໃສ່ປັບປຸງວຽກງານກໍ່ສ້າງພັກຕາມ 5 ຫລັກການ ແລະ 3 ທິດນໍາ ຕາມທີ່ໄດ້ກໍານົດໄວ້ໃນກົດລະບຽບຂອງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ຍົກສູງຄຸນທາດການເມືອງ, ປັບປຸງທັດສະນະຫລັກໝັ້ນປະຕິວັດ, ຄວາມສັດຊື່ບໍລິສຸດ, ຄວາມຈົງຮັກພັກດີຕໍ່ພັກ, ຕໍ່ປະເທດຊາດ
ແລະ ຕໍ່ປະຊາຊົນ, ປົກປ້ອງຄວາມຍຸຕິທໍາໃນສັງຄົມ, ສ້າງສັງຄົມຍຸຕິທໍາ ບົນພື້ນຖານລັດຖະທໍາມະນູນ ແລະ ກົດໝາຍ, ເອົາໃຈໃສ່ຈັດຕັ້ງຜັນຂະຫຍາຍແນວທາງນະໂຍບາຍ, ມະຕິຄໍາສັ່ງຂອງພັກເຂົ້າໃນວຽກງານຮອບດ້ານຂອງຕົນ ເປັນຕົ້ນຕ້ອງເອົາໃຈໃສ່ສ້າງໃຫ້ມີການຫັນປ່ຽນໃນຂົງເຂດກົດໝາຍ ແລະ ຍຸຕິທໍາ ເພື່ອຮອງຮັບໃຫ້ແກ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ
X ຂອງພັກ, ແຜນການແຫ່ງລັດ 5 ປີ ຄັ້ງທີ VIII ທີ່ໄດ້ກໍານົດທິດທາງ ເພື່ອນໍາພາປະເທດຊາດໄປສູ່ການຂະຫຍາຍຕົວຮອບດ້ານ.
ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ ໃນເງື່ອນໄຂກົນໄກເສດຖະກິດຕະຫລາດຕາມທິດສັງຄົມນິຍົມ ແລະ ການເຊື່ອມໂຍງສາກົນ, ເສີມຂະຫຍາຍປະຊາທິປະໄຕ,
ຮັບປະກັນໃຫ້ພົນລະເມືອງໄດ້ນໍາໃຊ້ສິດ ແລະ ປະຕິບັດພັນທະຂອງຕົນຢ່າງເຕັມສ່ວນ, ວາງມາດຕະການທີ່ສັກສິດ ເພື່ອສະກັດກັ້ນການລ່ວງລະເມີດກົດໝາຍ. ຮັບປະກັນຄວາມເປັນເອກະພາບສູງທາງດ້ານຄວາມຮູ້ ແລະ ການກະທໍາເພື່ອສ້າງບາດກ້າວບຸກທະລຸໃຫ້ມີການຫັນປ່ຽນຢ່າງຕັ້ງໜ້າ, ປະກອບສ່ວນເຂົ້າໃນການຈັດຕັ້ງປະຕິບັດສອງໜ້າທີ່ຍຸດທະສາດ ແລະ ວິໄສທັດຂອງປະເທດເຮົາຮອດປີ 2030.
No comments:
Post a Comment