ໂດຍຕອບສະໜອງຕາມການເຊື້ອເຊີນຂອງຄະນະຈັດຕັ້ງກອງປະຊຸມສາກົນ ຄັ້ງທີ
3 ຂອງອະດີດນັກສຶກສາມະຫາວິທະຍາໄລພົວພັນການຕ່າງປະເທດ ແຫ່ງສະຫະພັນຣັດເຊຍ (MGIMO), ວັນທີ 22-24 ຕຸລາ 2015 ນີ້,
ຄະນະຜູ້ແທນລາວໃນນາມອະດີດນັກສຶກສາ MGIMO ນໍາໂດຍທ່ານ ພົງສະຫວັນ ສີສຸລາດຫົວໜ້າກົມອາຊຽນ ກະຊວງການຕ່າງປະເທດ
ໄດ້ເຂົ້າຮ່ວມກອງປະຊຸມດັ່ງກ່າວ ເຊິ່ງຈັດຂຶ້ນຢູ່ນະຄອນຫລວງເອເລວັນ ສາທາລະນະລັດ ອາກເມນີ, ມີອະດີດນັກສືກສາ MGIMO ຈາກ 30 ກວ່າປະເທດເຂົ້າຮ່ວມ.
ຕອນເຊົ້າວັນທີ 23 ຕຸລາ 2015, ກ່ອນພິທີເປີດກອງປະຊຸມ, ຄະນະຜູ້ແທນລາວໄດ້ເຂົ້າຮ່ວມພິທີວາງພວງມະລາອະນຸສາວະລີນິລະນາມ.
ຈາກນັ້ນກໍເຂົ້າຮ່ວມພິທີເປີດກອງປະຊຸມທາງການ ໂດຍແມ່ນປະທານາທິບໍດີ ອັກມຽນນີ
ເປັນຜູ້ກ່າວເປີດກອງປະຊຸມ ເພື່ອປຶກສາຫາລື ແລະ
ແລກປ່ຽນບົດຮຽນຕ່າງໆກ່ຽວກັບບັນຫາຂະບວນການເຊື່ອມໂຍງພາກພື້ນ,
ຂະຫຍາຍການຮ່ວມມືເຂົ້າກັບຂອບການເຊື່ອມໂຍງເສດຖະກິດ (URASIA) ຂອງອາກເມນີໃນອະນາຄົດ, ກົນໄກການແກ້ໄຂ້ບັນຫາຕ່າງໆ,
ບັນຫາໃໝ່ຂອງສະພາບການທີ່ເກີດຂຶ້ນຢູ່ເຂດຕາເວັນອອກກາງ ແລະ ຢູ່ອີຣານ,
ຮູບແບບເສດຖະກິດໃໝ່ຂອງຈີນໃນລະບົບການພົວພັນສາກົນຄື “ໜຶ່ງແລວທາງ, ໜຶ່ງເສັ້ນທາງ” ແລະ ມູມມອງຂອງໂຄງການເສັ້ນທາງສາຍໄໝຂອງຈີນ.
ໃນກອງປະຊຸມດັ່ງກ່າວ, ຫົວໜ້າຄະນະຜູ້ແທນລາວ
ໄດ້ປະກອບຄໍາເຫັນກ່ຽວກັບການພົວພັນລະຫວ່າງ ອາ ຊຽນ-ຈີນ ໃນດ້ານເສດຖະກິດ-ການຄ້າ,
ການລົງທຶນ, ການທ່ອງທ່ຽວ ໂດຍສະເພາະອາຊຽນຕີລາຄາສູງຕໍ່ລັດຖະບານຈີນທີ່ໄດ້ກຳນົດເອົານະໂຍບາຍ
“ໜຶ່ງແລວທາງ, ໜຶ່ງເສັ້ນທາງ” (One Belt,
One Road) ເປັນຍຸດທະສາດຂະຫຍາຍການຮ່ວມມືໃນພາກພື້ນ, ທັງເປັນການສະແດງອອກເຖິງການຜັນຂະຫຍາຍແນວຄິດລິເລີ່ມ ແລະ
ວິໄສທັດອັນກວ້າງໄກຂອງ ສປ ຈີນ ທີ່ສອດຄ່ອງກັບຍຸກສະໄຫມແຫ່ງການຊຸກຍູ້ການເຊື່ອມໂຍງ ແລະ
ການເພີ່ມທະວີການຮ່ວມມືເພື່ອພັດທະນາທີ່ຈະນຳເອົາຜົນປະໂຫຍດຕົວຈິງມາສູ່ອາຊຽນ ແລະ
ສປ.ຈີນ. ນອກນີ້ ກໍໄດ້ເນັ້ນເຖິງທະນາຄານການລົງທຶນພື້ນຖານໂຄງລ່າງອາຊີ (AIIB) ແລະ ກອງທຶນເສັ້ນທາງສາຍໄໝ (Silk Road Fund) ເຊິ່ງພວມຖືກສ້າງຕັ້ງຂຶ້ນ
ອັນຈະເປັນແຮງດັນສໍາຄັນໃນການສະໜັບສະໜູນທຶນ
ເພື່ອພັດທະນາພື້ນຖານໂຄງລ່າງໃນພາກພື້ນ ແລະ ສາກົນ.
ກອງປະຊຸມສາກົນ ຄັ້ງທີ 4 ຂອງອະດີດນັກສຶກສາ MGIMO ແມ່ນ ສສ ຫວຽດນາມ ຈະເປັນເຈົ້າພາບ ແລະ
ຈະຈັດຂຶ້ນໃນທ້າຍປີ 2016.
No comments:
Post a Comment