ໃນພິທີອັນມີຄວາມໝາຍສໍາຄັນດັ່ງກ່າວ ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ທອງລຸນ ສີສຸລິດ ໄດ້ຂຶ້ນລາຍງານປະຫວັດຄວາມເປັນມາຂອງວັນການທູດລາວວ່າ: ການປະກາດເອກະລາດຄັ້ງທຳອິດຂອງ ສປປ
ລາວ ໃນວັນທີ
12 ຕຸລາ 1945 ແມ່ນໝາກຜົນແຫ່ງການຕໍ່ສູ້ດ້ານກຳລັງອາວຸດ ແລະ ການຕໍ່ສູ້ທາງດ້ານການເມືອງຂອງປະຊາຊົນບັນດາເຜົ່າໃນທົ່ວປະເທດ, ໂດຍພາຍໃຕ້ການນຳຂອງທ່ານປະທານ ໄກສອນ ພົມວິຫານ
ແລະ ປະທານສຸພານຸວົງ, ຊຶ່ງເປັນຂີດໝາຍແຫ່ງການເລີ່ມຕົ້ນວຽກງານການຕ່າງປະເທດຂອງລາວຈົນມາເຖິງປັດຈຸບັນ, ສະນັ້ນພາຍໃຕ້ການຄົ້ນຄວ້າ ແລະ ສະເໜີຂອງກະຊວງການຕ່າງປະເທດ
ແລະ ຄະນະພົວພັນຕ່າງປະເທດສູນກາງພັກ, ກົມການເມືອງສູນການພັກຈຶ່ງໄດ້ຕົກລົງເຫັນດີກຳນົດເອົາວັນທີ 12 ຕຸລາ 1945 ເປັນວັນການທູດລາວຢ່າງເປັນທາງການ.
ທ່ານຮອງນາຍົກລັດຖະມົນຕີ, ລັດຖະມົນຕີ່ວ່າການກະຊວງການຕ່າງປະເທດ ກ່າວວ່າ: ຕະຫຼອດໄລຍະ 70 ປີຜ່ານມາ, ພາຍໃຕ້ການນຳພາອັນສະຫຼາດສ່ອງໃສ
ແລະ ຖືກຕ້ອງຂອງພັກປະຊາຊົນປະຕິວັດລາວ,
ຂະແໜງການຕ່າງປະເທດໄດ້ເຕີບໃຫຍ່ຂະຫຍາຍຕົວເປັນກ້າວໆມາ,
ນັບທັງດ້ານປະລິມານ ແລະ ຄຸນນະພາບໂດຍຍືດໝັ້ນແນວທາງການຕ່າງປະເທດຄື: ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ ແລະ ປະຕິບັດນະໂຍບາຍເປີດກວ້າງການພົວພັນຮ່ວມມືແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ, ຕາມທິດເພີ່ມມິດຫຼຸດຜ່ອນສັດຕູ, ຂະແໜງການຕ່າງປະເທດໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດຕໍ່ສູ້ເພື່ອເອກະລາດແຫ່ງຊາດ, ປົກປັກຮັກສາ ແລະ ສ້າງສາປະເທດຊາດ, ສ້າງເງື່ອນໄຂທີ່ຈຳເປັນໃຫ້ແກ່ການເປີດກວ້າງສາຍພົວພັນຮ່ວມມືກັບຕ່າງປະເທດເພື່ອນມິດທັງຢູ່ໃກ້ ແລະ ໄກ,
ສ້າງໄດ້ຄວາມໄວ້ເນື້ອເຊື້ອໃຈຈາກປະເທດເພື່ອນມິດໃກ້ຄຽງ ແລະ ສາກົນ, ຊຶ່ງມາຮອດປັດຈຸບັນ, ສ ປປ ລາວ
ໄດ້ມີການພັວພັນດ້ານການທູດກັບ 138 ປະເທດ, ມີສາຍພົວພັນກັບພັກການເມືອງໃນທົ່ວໂລກ 124 ພັກ, ມີສຳນັກງານການທູດຢູ່ຕ່າງປະເທດ 38 ແຫ່ງ, ໃນນັ້ນມີສະຖານເອກອັກຄະລັດຖະທູດ 26 ແຫ່ງ, ມີສຳ ນັກງານຜູ້ຕ່າງໜ້າຖາວອນ 3 ແຫ່ງ, ສະຖານກົງສູນໃຫຍ່ 8 ແຫ່ງ, ມີດ່ານສາກົນ 27 ແຫ່ງ, ກົງສູນກິຕິມະສັກຂອງລາວຢູ່ 17 ປະເທດ, ກົງສູນກິດຕິມະສັກຕ່າງປະເທດຢູ່ລາວມີ 15 ປະເທດ ແລະ ມີການພົວພັນດ້ານການຄ້າຫຼາຍກວ່າ 50 ປະເທດໃນໂລກ, ເຖິງຢ່າງໃດກໍດີ,
ສປປ ລາວ
ໄດ້ມີການເຄື່ອນໄຫວວຽກງານການຕ່າງປະເທດຢ່າງມີຈຸດສຸມ ແລະ ບຸກທະລຸເຮັດໃຫ້ມີຜົນສຳເລັດຫຼາຍດ້ານເປັນຕົ້ນ: ການພົນພັນຮ່ວມມືສອງຝ່າຍ ແລະ ຫຼາຍຝ່າຍ ກໍຄືການພົວພັນຮ່ວມມືກັບສາກົນ, ພ້ອມນັ້ນກໍໄດ້ສຳເລັດການປັກຫຼັກໝາຍຊາຍແດນກັບ ສປ ຈີນ,
ຫວຽດນາມ, ມຽນມາ ແລະ ຍັງສືບຕໍ່ປັກຫຼັກໝາຍກັບລາຊະອານາຈັກໄທ, ກຳປູເຈຍ, ໄດ້ລົງນາມສົນທິສັນຍາກັບຫຼາຍປະເທດໃນໂລກ, ເປັນພາຄີຂອງສົນທິສັນຍາສາກົນ, ສົນທິສັນຍາພາກພື້ນ ແລະ ອານຸພາກພື້ນຫຼາຍລະດັບ ແລະ ປະເທດເຮົາຍັງຖືກຮັບເຂົ້າເປັນສະມາຊິກອົງການສະຫະປະຊາຊາດ(ສປຊ) ໃນວັນທີ 24 ທັນວາ 1955, ເຂົ້າເປັນສະມາຊິກອາຊຽນໃນວັນທີ 23 ກໍລະກົດ 1997 ແລະ ເປັນສະມາຊິກອົງການການຄ້າໂລກ(WTO) ໃນວັນທີ 2 ກຸມພາ 2013 ແລະ ປັດຈຸບັນປະເທດເຮົາກຳລັງກະກຽມເຂົ້ິາເປັນສະມາຊິກປະຊາຄົມເສດຖະກິດອາຊຽນ (AEC) ໃນທ້າຍປີ 2015 ນີ້ ແລະ ກະ ກຽມເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ກອງປະຊຸມອື່ນໆໃນປີ
2016 ທີ່ຈະມາເຖິງນີ້.
ໂອກາດນີ້, ທ່ານເລຂາທິການໃຫຍ່,
ປະທານປະເທດ ຈູມມາລີ ໄຊຍະສອນ ກໍໄດ້ໃຫ້ກຽດຂຶ້ນກ່າວສູນທອນພົດ, ໂດຍໄດ້ສະແດງຄວາມຍ້ອງຍໍຊົມຊົມຜົນງານຕ່າງໆຂອງຂະແໜງການຕ່າງປະເທດຍາດມາໄດ້ໃນຕະຫຼອດໄລຍະ 70 ປີຜ່ານມາ, ພ້ອມທັງເນັ້ນໃຫ້ສືບຕໍ່ຮັກສາມູນເຊື້ອຜົນງານດັ່ງກ່າວໄວ້ເພື່ອສືບຕໍ່ເປັນເສນາທິການດ້ານການຕ່າງປະເທດໃຫ້ແກ່ພັກ-ລັດ, ພ້ອມພາກັນກ້າວຂຶ້ນຍາດເອົາຜົນສໍາເລັດອັນໃຫຍ່ຫລວງກວ່າເກົ່າພາຍໃຕ້ຄໍາຂວັນວ່າ: “ການທູດປ້ອງກັນເຫດ ແລະ
ບຸກທະລຸເພື່ອປົກປັກຮັກສາ ແລະ ສ້າງສາພັດທະນາປະເທດຊາດ”, ສືບຕໍ່ເຄື່ອນໄຫວ
ພົວພັນຮ່ວມມືກັບບັນດາປະເທດເພື່ອຍາດແຍ່ງເອົາການຮ່ວມມື, ຊ່ວຍເຫລືອເພື່ອມາພັດທະນາປະເທດຊາດໃຫ້ມັ່ງຄັ່ງຮັ່ງມີ ແລະ ຫລຸດພົ້ນອອກຈາກຄວາມດ້ອຍພັດທະນາໃນປີ 2020.
ແລະ ໃນບ່າຍວັນດຽກັນຢູ່ກະຊວງການຕ່າງປະເທດ, ໄດ້ມີພິທີເປີດຫ້ອງມູນເຊື້ອການເຄື່ອນໄຫວວຽກງານການຕ່າງປະເທດ, ເພື່ອເປັນບ່ອນເຕົ້າໂຮມ ແລະ ວາງສະແດງຜົນງານການຈັດຕັ້ງປະຕິບັດວຽກງານການຕ່າງປະເທດໃນແຕ່ລະໄລຍະໄວ້ໃຫ້ຄົນລຸ່ນຫລັງໄດ້ສຶກສາຮຽນຮູ້.
No comments:
Post a Comment