laophatthananewspaper: ສະຫາຍ ພັນຄຳ ວິພາວັນ ກົມການເມືອງສູນກາງພັກ ໃຫ້ກຽດໂອ້ລົມ ອົງຄະນະພັກກະຊວງແຮງງານ ແລະ ສະຫວັດດີການສັງຄົມຊຸດໃໝ່

ໃນໂອກາດຜົນສຳເລັດກອງປະຊຸມໃຫຍ່ຜູ້ແທນອົງຄະນະພັກກະຊວງແຮງງານ ແລະ ສະຫວັດດີການສັງຄົມ ຄັ້ງທີ V, ທີ່ຈັດຂຶ້ນໃນວັນທີ 26 ຕຸລານີ້ ທີ່ນະຄອນ ຫລວງວຽງຈັນ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ຜູ້ຊີ້ນຳວຽກງານວັດທະນະທຳ-ສັງຄົມ ໄດ້ເຂົ້າຮ່ວມ ແລະ ໃຫ້ກຽດໂອ້ລົມອົງຄະນະພັກຊຸດໃໝ່ຂອງກະຊວງດັ່ງກ່າວ. ພາຍຫລັງໄດ້ປ່ອນບັດຄັດເລືອກເອົາຢູ່ໃນກອງປະຊຸມໃຫຍ່ຄັ້ງນີ້, ໂດຍໄດ້ເປັນເອກກະສັນຢ່າງສົມບູນເລືອກເອົາສະຫາຍ ດຣ. ຄຳແພງ ໄຊສົມແພງ ເປັນເລຂາຄະນະບໍລິຫານງານພັກກະຊວງ, ສະຫາຍ ນາງໃບ ຄຳ ຂັດທິຍະ ເປັນຮອງເລຂາພັກ ແລະ ສະຫາຍ ດຣ. ຄໍາແກ້ວ ສານບຸນຄຸນໄຊ ເປັນປະທານກວດກາພັກ ແລະ ສະຫາຍ ສະຫລອງ ມະນີວັນ, ສະຫາຍ ສອນໄຊ ໃບຍາວົງ ເປັນຮອງປະທານກວດກາພັກ ກະຊວງແຮງງານ ແລະ ສະຫວັດດີການສັງຄົມຊຸດໃໝ່.

ໃນໂອກາດອັນສະຫງ່າລາສີ ສະຫາຍ ຮອງນາຍົກລັດຖະມົນຕີ ໄດ້ເນັ້ນໃຫ້ຄະນະພັກຊຸດໃໝ່, ເພີ່ມທະວີຄວາມສາມັກຄີເປັນເອກະພາບທົ່ວອົງຄະນະພັກກະຊວງ, ຢຶດໝັ້ນ 5 ຫລັກການ ແລະ 3 ທິດນຳໃນການກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເຊື່ອມຊຶມແນວທາງນະໂຍບາຍຂອງພັກໃນແຕ່ລະໄລຍະຢ່າງເລິກເຊິ່ງ ແນໃສ່ສ້າງຄວາມເປັນເອກະພາບດ້ານແນວຄິດ, ທັດສະນະ ແລະ ການກະທຳຕົວຈິງ, ເອົາໃຈໃສ່ປັບປຸງລະບົບການເມືອງ ຕາມຂະແໜງການຂອງຕົນ ໃຫ້ມີຄວາມເຂັ້ມແຂງ ໂດຍສືບຕໍ່ສຶກສາອົບຮົມການເມືອງແນວຄິດ, ດ້ວຍການຄົ້ນຄ້ວາເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງຂອງພັກ, ລະບຽບກົດໝາຍຂອງລັດ ແລະ ຈຸດໝາຍຂອງການປະຕິວັດໃນໄລຍະໃໝ່ ໃຫ້ມີເນື້ອໃນເລິກເຊິ່ງ ແລະ ແທດເໝາະກັບຕົວຈິງ, ເອົາໃຈໃສ່ປັບປຸງບົດບາດການນຳພາຂອງພັກ ແລະ ຄວາມສັກສິດໃນການຄຸ້ມຄອງບໍລິຫານລັດຕາມຂະແໜງແຮງງານ ແລະ ສະຫວັດດີການສັງຄົມ ໃຫ້ມີຄວາມສອດຄ່ອງກົມກຽວ ເຊິ່ງກັນ ແລະ ກັນ, ສືບຕໍ່ປັບປຸງແບບແຜນການນຳພາ ແລະ ວິທີເຮັດວຽກຂອງຄະນະພັກ ຄະນະນຳ ແຕ່ລະຂັ້ນໃຫ້ເຂົ້າສູ່ລະບອບລະບຽບຫລັກການຂອງພັກ, ກົດໝາຍຂອງລັດຢ່າງເຂັ້ມງວດ ປະຕິບັດຫລັກການລວມສູນປະຊາທິປະໄພ, ນຳພາເປັນໝູ່ຄະນະ, ມີການແບ່ງງານ ແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ, ສືບຕໍ່ປັບປຸງບູລະນະກົງຈັກການຈັດຕັ້ງຂອງພັກ ຂອງລັດ ແລະ ບັນດາອົງການຈັດຕັ້ງມະຫາຊົນຂັ້ນຕ່າງໆ ໃຫ້ກະທັດຮັດ, ສົມເຫດສົມຜົນ ແລະ ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະເພາະໜ້າ ແລະ ຍາວນານ ແລະ ເພີ່ມທະວີຄວາມສາມັກຄີເປັນເອກະພາບພາຍໃນໃຫ້ເປັນປຶກແຜ່ນ, ຍົກສູງຄວາມຮັບຜິດຊອບທາງການເມືອງ, ຕັ້ງໜ້າຄົ້ນຄ້ວາຮ່ຳຮຽນ ເພື່ອຍົກລະດັບຄວາມຮູ້-ຄວາມສາມາດຂອງຕົນໃຫ້ສູງຂຶ້ນ, ປັບປຸງແບບແຜນການນຳພາ ແລະ ວິທີເຮັດວຽກໃຫ້ດີຂຶ້ນຕື່ມ ແລະ ຍາມໃດກໍຕ້ອງເປັນແບບຢ່າງໃນການປະຕິບັດໜ້າທີ່ ກໍຄືການດຳລົງຊີວິດ ໃຫ້ສົມກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງສະມາຊິກພັກ ແລະ ມະຫາຊົນ ທີ່ໄດ້ເລືອກເອົາຄະນະພັກຊຸດໃໝ່ນີ້ ເປັນຕົວແທນແກນນຳສູງສຸດຂອງຂະແໜງແຮງງານ ແລະ ສະຫວັດດີການສັງຄົມ.