ລາວປະກອບຄໍາເຫັນໃສ່ຮ່າງບົດວິເຄາະຄວາມຮູ້ດ້ານກົດໝາຍປ່າໄມ້

      ໃນວັນທີ 6 ພະຈິກນີ້, ຢູ່ໂຮງແຮມວຽງຈັນພລາຊາ ນະຄອນຫລວງວຽງຈັນ, ໄດ້ຈັດກອງປະຊຸມປຶກສາຫາລືປະ ກອບຄໍາຄິດເຫັນໃສ່ຮ່າງບົດວິເຄາະຂອງການສຶກສາສັງລວມຄວາມຮູ້ດ້ານກົດໝາຍປ່າໄມ້, ໂດຍການເປັນປະທານຂອງທ່ານ ຄໍາພຸດ ພັນດານຸວົງ ຫົວໜ້າກົມປ່າໄມ້ກະຊວງກະສິກໍາ-ປ່າໄມ້, ທ່ານ ສະຕີເຟັນ ຣູດກາດ ຜູ້ຕາງໜ້າອົງການອາຫານ ແລະ ການກະເສດ (FAO) ປະຈໍາລາວ, ການປະກອບຄໍາເຫັນນີ້ແມ່ນບາດກ້າວສໍາຄັນໃນການນໍາໄປສູ່ການສົ່ງເສີມການຄ້າໄມ້ທີ່ຖືກກົດໝາຍໃນລາວ ແລະ ວຽກງານການວິເຄາະນີ້, ແມ່ນໄດ້ຮັບການສະໜັບສະໜູນຈາກໂຄງການຮ່ວມມືລະຫວ່າງອົງການອາຫານ ແລະ ການກະເສດ, ທະນາຄານໂລກ, ລັດຖະບານປະເທດ​ແຟັງ​ລັງ ແລະ ໂຄງການ GIZ ProFLEGT, ຊຶ່ງເປັນສ່ວນໜຶ່ງຂອງແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ລະຫວ່າງລາວ ແລະ ສະຫະພາບເອີຣົບ.

    ທ່ານຫົວໜ້າກົມກວດກາປ່າໄມ້ກະຊວງກະສິກໍາ-ປ່າໄມ້ ກ່າວວ່າ: ວຽກງານການສຶກສາສັງລວມຄວາມຮູ້ດ້ານກົດໝາຍປ່າໄມ້ແມ່ນການສັງລວມເອົາບັນດານິຕິກໍາທີ່ກ່ຽວຂ້ອງທັງໝົດ ແລະ ການວິເຄາະກ່ຽວກັບຕິນິກໍາປ່າໄມ້, ລວມທັງລະບຽບກົດໝາຍທີ່ກ່ຽວຂ້ອງກັບປ່າໄມ້, ເນື້ອທີ່ປ່າ ແລະ ການນໍາໃຊ້ຜະລິດຕະພັນໄມ້ທັງຈາກປ່າຜະລິດ, ປ່າປູກ, ພື້ນທີ່ປ່າສໍາປະທານ ແລະ ປ່າໄມ້ສໍາລັບໃຊ້ຄົວເຮືອນ. ການສັງລວມແມ່ນກວມເອົາທຸກຂັ້ນຕອນນັບແຕ່ການວາງແຜນ, ການຕັດໄມ້, ການຂົນສົ່ງ, ການປຸງແຕ່ງ ແລະ ການຄ້າໄມ້.

     ຫົວໜ້າກົມດັ່ງກ່າວໃຫ້ຮູ້ວ່າ: ເນື່ອງຈາກຂອບຂອງລະບຽບການຕ່າງໆທີ່ໃຊ້ໃນການຄຸ້ມຄອງຂະແໜງປ່າໄມ້ມີຫລາກຫລາຍ ແລະ ກວ້າງຂວາງ, ເຊິ່ງໄດ້ຮັບຜົນມາຈາກກົດໝາຍທີ່ແຕກຕ່າງກັນໃນຂະແໜງຊັບພະຍາກອນທໍາມະຊາດ ແລະ ຂະແໜງການຄ້າ, ສິ່ງເຫລົ່ານີ້ໄດ້ເຮັດໃຫ້ເກີດຄວາມບໍ່ຈະແຈ້ງທາງດ້ານການນໍາໃຊ້ກົດໝາຍ ແລະ ໜ່ວຍງານທີ່ຮັບຜິດຊອບໃນການຈັດຕັ້ງປະຕິບັດ, ສ່ວນໜຶ່ງແມ່ນມາຈາກຄວາມຫລາກຫລາຍ ແລະ ຄວາມບໍ່ສອດຄ່ອງຂອງກົດໝາຍທີ່ມີຢູ່, ສະນັ້ນ ການແປຄວາມໝາຍ ແລະ ການນໍາໃຊ້ກົດລະບຽບແມ່ນບໍ່ສອດຄ່ອງກັນໃນຂັ້ນແຂວງ,

ເມືອງ ແລະ ບ້ານ ແລະ ການສັງລວມນິຕິກໍາປ່າໄມ້ນີ້ຈະສາມາດຊ່ວຍໃຫ້ຂອບຂອງລະບຽບການຕ່າງໆໃນຂະແໜງປ່າໄມ້ຂອງລາວມີຄວາມຊັດເຈນຫລາຍຂຶ້ນ ແລະ ການບໍລິຫານຈັດການປ່າໄມ້ແບບຍືນຍົງ, ພ້ອມທັງເປັນການເພີ່ມຈໍານວນການປົກຫຸ້ມຂອງປ່າຂຶ້ນເຖິງ 70% ໃນປີ 2020.