laophatthananewspaper: ລາວ ແລະ ສະຫະພາບເອີຮົບຮ່ວມສົນທະນາດ້ານວຽກງານການປົກຄອງ

ສປປ ລາວ ແລະ ສະຫະພາບເອີຣົບ ( ອີຢູ ) ໄດ້ຈັດການພົບປະສົນທະນາຄັ້ງທີ 6 ຂອງຄະນະເຮັດວຽກບໍ່ເປັນທາງການດ້ານການປົກຄອງ ແລະ ສິດທິມະນຸດທີ່ນະຄອນຫຼວງວຽງຈັນ,ໃນວັນທີ 6 ພະຈິກ 2015 ພາຍໃຕ້ການເປັນປະທານຂອງທ່ານ ພູໂຂງ ສີສຸລາດ ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ແລະ ທ່ານ ຣານີເອຣີ ຊາບາຕຸກຊິ ( Ranieri Sabatucci ), ຫົວໜ້າໜ່ວຍງານຮັບຜິດຊອບອາຊີຕາເວັນອອກສ່ຽງໃຕ້, ສຳນັກງານການຕ່າງປະເທດສະຫະພາບເອີຣົບ,ໂດຍມີຕົວແທນຝ່າຍລາວຈາກກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງຢຸດຕິທຳ, ກະຊວງພາຍໃນ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ສະພາແຫ່ງຊາດ, ສູນກາງແນວລາວສ້າງຊາດ, ສະຫະພັນແມ່ຍິງ, ສະພາການຄ້າ ແລະ ອຸດສາຫະກຳແຫ່ງຊາດ ແລະ ຕົວແທນຝ່າຍອີຢູຈາກບຣຸກແຊນ, ຫ້ອງການຕົວແທນອີຢູປະຈຳ ນະຄອນຫຼວງວຽງຈັນ, ສະຖານທູດຝຣັງ, ອັງກິດ, ເຢຍລະມັນ, ຊູແອັດ, ໂປໂລຍ, ປະຈຳລາວເຂົ້າຮ່ວມ.

ໃນການພົບປະສົນທະນາຄັ້ງນີ້, ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບຄວາມຄືບໜ້າຂອງການຈັດຕັ້ງປະຕິບັດຕາມຜົນກອງປະຊຸມຄັ້ງຜ່ານມາທີ່ຈັດຂຶ້ນໃນເດືອນພຶດສະພາ 2014 ທີ່ບຣຸກແຊນ, ປະເທດເບນຊິກ, ຊຶ່ງເຫັນວ່າ ສປປ ລາວ ໄດ້ປະຕິບັດຕາມນະໂຍບາຍສົ່ງເສີມ ແລະ ປ້ອງກັນສິດທິມະນຸດຂອງປະຊາຊົນລາວບັນດາເຜົ່າໃນທົ່ວປະເທດດ້ວຍຜົນສຳເລັດເປັນກ້າວໆມາ, ໂດຍຕັ້ງໜ້າປະຕິບັດພັນທະຂອງຕົນຕໍ່ສົນທິສັນຍາສາກົນວ່າດ້ວຍສິດທິມະນຸດທີ່ໄດ້ເຂົ້າເປັນພາຄີ, ໂດຍສະເພາະໄດ້ເອົາໃຈໃສ່ວຽກງານຈັດກອງປະຊຸມເຜີຍແຜ່ສົນທິສັນຍາສາກົນວ່າດ້ວຍສິດທິທະນຸດໃຫ້ແກ່ເຈົ້າໜ້າທີ່ຂັ້ນສູນກາງ ແລະ ທ້ອງຖິ່ນໄດ້ຢ່າງກວ້າງຂວາງ.

ຄະນະຜູ້ແທນຝ່າຍລາວຍັງໄດ້ແຈ້ງໃຫ້ຝ່າຍອີຢູ ຊາບກ່ຽວກັບຜົນການທົບທວນຄືນປະຈຳໄລຍະດ້ານສິດທິມະນຸດ ( UPR ) ທີ່ ສປປ ລາວ ໄດ້ລາຍງານຕໍ່ກອງປະຊຸມ ສປຊ ໃນເດືອນທີທຸນາ 2015 ແລະ ສະພາບໂດຍລວມຂອງການຮ່ວມືດ້ານສິດທິມະນຸດໃນພາກພື້ນອາຊີ ແລະ ການກະກຽມເປັນປະທານອາຊຽນໃນປີ 2016 ຂອງ ສປປ ລາວ.ນອກຈາກໄດ້ແຈ້ງສະພາບຄວາມຄືບໜ້າໃນການຈັດຕັ້ງປະຕິບັດດ້ານສິດທິມະນຸດຂອງອີຢູ ໃຫ້ກອງປະຊຸມຊາບແລ້ວ, ຝ່າຍອີຢູ ຍັງໄດ້ແຈ້ງກ່ຽວກັບການຮ່ວມມືດ້ານການປົກຄອງ ແລະ ສິດທິມະນຸດ, ການຮ່ວມມືໃນການພັດທະນາສັງຄົມໃນອີຢູ ແລະ ການແກ້ໄຂບັນຫາຊາວອົບພະຍົບທີ່ຫລັ່ງໄຫລເຂົ້າພາກພື້ນເອີລົບໃນປັດຈຸບັນ.

ກອງປະຊຸມສົນທະນາດ້ານສິດທິມະນຸດຂອງຄະນະເຮັດວຽກບໍ່ເປັນທາງການລະຫວ່າງ ລາວ-ອີຢູ ແມ່ນກົນໄກໜຶ່ງຂອງຄະນະກຳມາທິການຮ່ວມມືສອງຝ່າຍລະຫວ່າງລາວ-ອີຢູ, ເຊິ່ງຈັດຂຶ້ນເພື່ອສົ່ງເສີມ, ສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ໃນການປະຕິບັດດ້ານສິດທິມະນຸດ ແລະ ການປົກຄອງ ໂດຍຜ່ານການສົນທະນາແລກປ່ຽນຂໍ້ມູນຂ່າວສານ, ປະສົບການ ແລະ ບົດຮຽນທີດີນຳກັນ, ໃນວຽກງານສິດທິມະນຸດຂອງທັງສອງຝ່າຍເພື່ອປະກອບສ່ວນໃຫ້ແກ່ການຮ່ວມມືລະຫວ່າງ ສປປ ລາວ ແລະ ອີຢູ ໃຫ້ນັບມື້ໄດ້ຮັບການຂະຫຍາຍຕົວຂຶ້ນເລື່ອຍໆ.