ໃນວັນທີ 5 ພະຈິກນີ້, ທີ່ສະພາແຫ່ງຊາດ, ນະຄອນຫລວງວຽງຈັນ,
ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວພ້ອມຄະນະ, ໄດ້ຕ້ອນຮັບ ແລະ ພົບປະກັບທ່ານລາຊໂລ ໂກເວປະທານສະພາແຫ່ງຊາດ ຮົງກາລີ ພ້ອມຄະນະ,ເພື່ອປືກສາຫາລືແລກປ່ຽນຄໍາຄິດຄໍາເຫັນ ແລະປະສົບປະການກ່ຽວກັບການປະຕິບັດໜ້າທີ່ຂອງສອງສະພາແຫ່ງຊາດ,ໃນໂອກາດທີ່ທ່ານ ແລະ ຄະນະເດີນທາງມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການແຕ່ວັນທີ
4-6 ພະຈິກນີ້.
ໃນໂອກາດພົບປະ, ສອງຝ່າຍໄດ້ພ້ອມກັນຕີລາຄາແລກປ່ຽນຄໍາຄິດຄໍາເຫັນກ່ຽວກັບການປະຕິບັດໜ້າທີ່ຂອງສອງສະພາແຫ່ງຊາດໃນໄລຍະຜ່ານມາ, ເຊິ່ງເຫັນວ່າສອງສະພາແຫ່ງຊາດລາວ-ຮົງກາລີ ໄດ້ມີການສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນຢ່າງຕໍ່ເນື່ອງ, ອັນໄດ້ປະກອບສ່ວນສ້າງຄວາມເຂົ້າອົກເຂົ້າໃຈກັນລະຫວ່າງລັດຖະບານ ແລະ ປະຊາຊົນສອງຊາດເຮັດໃຫ້ການຮ່ວມມືດ້ານຕ່າງໆໄດ້ຮັບການພັດທະນາດີຂຶ້ນຕາມລໍາດັບ. ໃນໂອກາດພົບປະດັ່ງ
ກ່າວ, ທ່ານນາງ ປານີ ຢາທໍ່ຕູ້ ຍັງໄດ້ສະເໜີໃຫ້ສອງສະພາແຫ່ງຊາດລາວ ແລະ ຮົງກາລີ ຄວນມີການແຕ່ງຕັ້ງຄະນະມິດຕະພາບລັດຖະສະພາຂອງຕົນເພື່ອເປັນເສນາທິການໃນການປະສານງານ ແລະ ແລກປ່ຽນຖອດຖອນບົດຮຽນເຊິ່ງກັນ ແລະ ກັນກ່ຽວກັບວຽກງານຕ່າງໆຂອງສະພາແຫ່ງຊາດ, ໃຫ້ສະພາແຫ່ງຊາດຮົງກາລີພິຈາລະນາຄວາມເປັນໄປໄດ້ໃນການແລກປ່ຽນບົດຮຽນກ່ຽວກັບການພັດທະນາຄວາມສາມາດຂອງສະມາຊິກສະພາແຫ່ງຊາດ ແລະ ການຊຸກຍູ້ສົ່ງເສີມການພັດທະນາຊັບພະຍາກອນມະນຸດໃນຂົງເຂດນິຕິບັນຍັດ ແລະ ພາສາອັງກິດໃຫ້ແກ່ສະພາແຫ່ງຊາດລາວ, ສະເໜີໃຫ້ປະທານສະພາຮົງກາລີຊຸກຍູ້ລັດຖະບານຮົງກາລີເພີ່ມທະວີການຮ່ວມມືຊ່ວຍຊຸກຍູ້ບັນດານັກລົງທຶນ, ນັກທ່ອງທ່ຽວຂອງຮົງກາລີເຂົ້າມາທ່ອງທ່ຽວຢູ່ ສປປ ລາວ ໃຫ້ຫລາຍຂຶ້ນຕາມຂະແໜງການທີ່ສອງຝ່າຍມີທ່າແຮງ, ສອງສະພາແຫ່ງຊາດສືບຕໍ່ຮ່ວມມືກັນໃນເວທີສາກົນ, ໂດຍສະເພາະສະຫະພັນລັດຖະສະພາສາກົນ(IPU), ອາເຊັບ(ASEP) ແລະ ອື່ນໆ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ, ທັງເປັນການປະກອບສ່ວນເສີມສ້າງສັນຕິພາບ, ມິດຕະພາບ
ແລະ ການຮ່ວມມືເພື່ອການພັດທະນາໃນຂົງເຂດ ແລະ ໃນໂລກ.
No comments:
Post a Comment