ລາວຫາລືການປັບປຸງ​ກົດໝາຍ​ວ່າ​ດ້ວຍ​ການ​ລົງທຶນ​ຂອງ​ລັດ

 ​          ກອງ​ປະຊຸມ​ປຶກສາ​ຫາລື​ການ​ປັບປຸງກົດໝາຍວ່າ​ດ້ວຍ​ການ​ລົງທຶນ​ຂອງ​ລັດສະບັບ​ປີ 2009 ໄດ້ຈັດຂຶ້ນໃນວັນທີ 11 ພະຈິກນີ້ຢູ່ກະຊວງແຜນການແລະການລົງທຶນ, ​ໂດຍການເປັນປະທານຂອງ​ທ່ານ ດຣ ຄຳ​ລຽນ ພົນ​ເສນາ ລັດຖະມົນຕີ​ຊ່ວຍ​ວ່າການ​ກະຊວງດັ່ງກ່າວ, ເພື່ອປະຕິບັດຕາມບົດບາດການ​ເປັນ​ເສນາທິການ​ໃຫ້​ລັດຖະບານ​ເພື່ອ​ຄຸ້ມ​ຄອງ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມກໍ​ຄື​ແຜນການ​ລົງທຶນ​ຂອງ​ລັດ, ໂດຍສະເພາະ​ການ​ຄົ້ນຄວ້າ,​ ປັບປຸງ​ກົດໝາຍ​ດັ່ງ​ກ່າວ​​ໃຫ້ມີ​ເນື້ອ​ໃນ​ສອດຄ່ອງ-ຄົບ​ຖ້ວນ, ສາມາດ​ຮອງ​ຮັບ​ສະພາບ​ເງື່ອນໄຂການຂະຫຍາຍຕົວ​ທາງດ້ານເສດຖະກິດ​ໃນ​ປັດຈຸບັນ, ຮັບປະ ກັນ​ໃຫ້​ຖືກຕ້ອງ​ຕາມ​ຂັ້ນ​ຕອນ, ຫລັກການທີ່​ກຳນົດ​ໄວ້​ໃນ​ກົດໝາຍ​ວ່າ​ດ້ວຍ​ການ​ສ້າງ​ນິຕິ​ກຳ, ທັງ​ນີ້ກໍ​ເພື່ອ​

ເຮັດ​ໃຫ້​ກົດໝາຍ​ສະບັບ​ດັ່ງກ່າວມີ​ຄວາມ​ສອດ​ຄ່ອງ ​ແລະ ກົ​ມກຽວ​ກັນ​ກັບ​ຮ່າງ​ກົດໝາຍ​ວ່າ​ດ້ວຍ​ສະພາ​ປະຊາຊົນ​ຂັ້ນ​​ແຂ​ວງທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 10 ສະພາ​ແຫ່ງ​ຊາດຊຸດ​ທີ VII ຈະ​ພິຈາລະນາ​ຮັບຮອງ​ເອົາ​​ໃນທ້າຍ​ປີ​ນີ້ ແລະ ເມື່ອຮ່າງ​ກົດໝາຍ​ດັ່ງກ່າວໄດ້ຖືກ​ຮັບຮອງ ​ແລະ ປະກາດ​ໃຊ້​ຢ່າງ​ເປັນ​ທາງ​ການ​ຈະ​ເຮັດ​ໃຫ້ການ​ຄຸ້ມ​ຄອງ​ໂຄງການ​ລົງທຶນ​ຂອງ​ລັດມີ​ປະສິດ​ທິພາ​ບ ​ແລະ ປະສິດ​ທິຜົນ, ການ​ລົງທຶນ​ມີ​ຈຸດ​ສຸມສາມາດ​ຊຸກຍູ້​ການ​ພັດທະນາ​ເສດຖະກິດ-ສັງຄົມໃຫ້​ບັນລຸ​ຕາມ​ເປົ້າ​ໝາຍກໍານົດໄວ້.