ເປີດສູນການຄ້າໄອເຕັກມໍ

ພິທີເປີດສູນການຄ້າໄອເຕັກມໍ, ນະຄອນຫລວງວຽງຈັນ, ໄດ້ຈັດຂຶ້ນໃນຕອນເຊົ້າວັນທີ 14 ພະຈິກນີ້, ໂດຍການເຂົ້າຮ່ວມຂອງທ່ານເຈົ້າຄອງນະຄອນຫລວງວຽງຈັນ ດຣ ສີນລະວົງ ຄຸດໄພທູນ, ທ່ານ ປີເຕີ ຈັນ ປະທານບໍລິສັດລາວເວີນມະຫາຊົນ ແລະ ແຂກຖືກເຊີນເຂົ້າຮ່ວມຢ່າງຫລວງຫລາຍ.

ທ່ານປະທານບໍລິສັດລາວເວີນມະຫາຊົນກ່າວວ່າ: ສູນການຄ້າແຫ່ງນີ້ມີຂະໜາດໃຫຍ່, ທັນສະໄໝ ແລະ ສວຍງາມໂດດເດັ່ນໃນນະຄອນຫລວງວຽງຈັນ, ໂດຍຊັ້ນທີ 1 ແມ່ນຈໍາໜ່າຍສິນຄ້າຫັດຖະກໍາ, ຜ້າໄໝ ແລະ ໃຫ້ບໍລິການຂອງສະຖາບັນການເງິນຕ່າງໆ, ຊັ້ນ 2 ແມ່ນຈໍາໜ່າຍສີນຄ້າປະເພດເຄື່ອງປະດັບ, ອັນຍະມະນີ, ຊັ້ນ 3 ຈໍາໜ່າຍສີນຄ້າປະເພດເຄື່ອງນຸ່ງຫົ່ມ, ເຄື່ອງແຟຊັນ, ຊັ້ນ

4 ຈໍາໜ່າຍປະເພດເຄື່ອງໄຟຟ້າ ແລະ ອຸປະກອນອີເລັກໂຕຼນິກຕ່າງໆ, ຊັ້ນ 5 ຮ້ານຄ້າປອດພາສີ, ຊັ້ນ 6 ແມ່ນໃຫ້ບໍລິການສູນອອກກໍາລັງກາຍ ແລະ ຂາຍສິນຄ້າກິລາຄົບວົງຈອນ, ສູນບໍລິການອາຫານ ແລະ ຊັ້ນ 7 ແມ່ນຫ້ອງໂຖງໃຫຍ່ສໍາລັບຈັດງານ ແລະ ກິດຈະກໍາການສະແດງຕ່າງໆ, ສ່ວນຊັ້ນ 8 ແລະ 9 ແມ່ນສູນໃຫ້ບໍລິການຄວາມບັນເທິງເຊັ່ນ: ໂຮງຮູບເງົາ, ເກມ ແລະອື່ນໆ. ນອກຈາກນີ້, ຍັງມີສະຖານທີ່ຈອດລົດສະດວກກວ້າງຂວາງ, ຊຶ່ງລວມມີມູນຄ່າການກໍ່ສ້າງທັງໝົດ 29 ລ້ານໂດລາສະຫະລັດ.