laophatthananewspaper: ສົມເດັດພະເທບແຫ່ງຣາຊະອານາຈັກໄທຢ້ຽມຢາມລາວ

ໃນວັນທີ 8-9 ທັນວາ 2015 ນີ້ ສົມເດັດພະເທບພະຣັດຣາຊະສຸດາ ສະຫຍາມບໍຣົມມາຣາຊະກຸມາລີ ແຫ່ງຣາຊະອານາຈັກໄທ ໄດ້ສະເດັດມາຢ້ຽມຢາມ ສປປ ລາວ ຢ່າງເປັນທາງການຕາມການເຊື້ອເຊີນຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ. ການເດີນທາງມາຢ້ຽມຢາມ ສປປ ລາວ ຂອງສົມເດັດພະເທບ ແມ່ນມີຄວາມໝາຍສໍາຄັນຢ່າງສູງ ເຊິ່ງຊ່ວຍໃຫ້ປະຊາຊົນສອງຊາດລາວ-ໄທມີຄວາມເຂົ້າອົກເຂົ້າໃຈກັນເລິກເຊິ່ງຂຶ້ນຕື່ມພ້ອມທັງເປັນການເພີ່ມທະວີສາຍພົວພັນມິດຕະພາບ ແລະ ການຮ່ວມມືໃນຫລາຍດ້ານລະຫວ່າງ ສປປ ລາວ ແລະ ຣາຊະອານາຈັກໄທ.

ໃນຕອນເຊົ້ົາວັນທີ 8 ທັນວາ 2015 ສົມເດັດພະເທບພະຣັດຣາຊະສຸດາ ສະຫຍາມບໍຣົມມາຣາຊະກຸມາລີ ໄດ້ເດີນທາງມາເຖິງສະໜາມບິນສາກົນວັດໄຕນະຄອນຫລວງວຽງຈັນ ແລະ ຕ້ອນຮັບໂດຍ ທ່ານ ບຸນເກີດ ສັງສົມສັກ ລັດຖະມົນຕີວ່າການກະຊວງຍຸຕິທໍາ, ເຈົ້າຄອງນະຄອນຫລວງວຽງຈັນ ແລະ

ພະນັກງານທີ່ກ່ຽວຂ້ອງຫລັງຈາກນັ້ນ ໄດ້ເດີນທາງໄປຢ້ຽມຢາມໂຮງຮຽນຊົນເຜົ່າ ແລະ ວັດ ທະນະທໍາເດັກກໍາພ້າຫລັກ 67 ເພື່ອເຂົ້າຮ່ວມພິທີເປີດນໍາໃຊ້ອາຄານຮຽນຄອມພິວເຕີພ້ອມທັງມອບອຸປະກອນການຮຽນ ແລະ ເຄື່ອງກິລາຈໍານວນໜຶ່ງໃຫ້ແກ່ໂຮງຮຽນດັ່ງກ່າວພາຍຫລັງສໍາເລັດພາ ລະກິດໄດ້ເດີນທາງກັບນະຄອນຫລວງວຽງຈັນ ແລະ ໃຫ້ກຽດຕ້ອນຮັບໂດຍທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ແລະ ເປັນເຈົ້າພາບຈັດງານລ້ຽງອາຫານທ່ຽງທີ່ໂຮງແຮມລາວພລາຊາ.

ໃນຕອນບ່າຍວັນດຽວກັນສົມເດພະເທບ ໄດ້ເຂົ້າຢ້ຽມຄໍານັບທ່ານ ຈູມມາລີ ໄຊຍະສອນ ປະ ທານປະເທດປະເທດແຫ່ງ ສປປ ລາວ ເຊິ່ງການພົບປະເຕັມໄປດ້ວຍບັນຍາກາດແຫ່ງໄມຕີຈິດມິດຕະ ພາບອັນສະໜິດສະໜົມຮັກແພງຖານປະເທດບ້ານໃກ້ເຮືອນຄຽງທີ່ດີ ເຊິ່ງທ່ານປະທານປະເທດໄດ້ຕາງໜ້າໃຫ້ປະຊາຊົນລາວສະແດງຄວາມຂອບໃຈສົມເດັດພະເທບ ໃນການຊ່ວຍເຫລືອອັນລໍ້າຄ່າໃນໄລຍະຜ່ານມາ ເປັນການປະກອບສ່ວນສໍາຄັນໃນການພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວກໍຄືການປະກອບສ່ວນເຂົ້າໃນການພັດທະນາປະເທດຊາດຂອງລາວໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.

ພາຍຫລັງສໍາເລັດການຢ້ຽມຄໍານັບປະທານປະເທດສົມເດັດພະເທບ ໄດ້ອອກເດີນທາງໄປຢ້ຽມຊົມສໍານັກພິມ ແລະ ຈໍາໜ່າຍປຶ້ມແຫ່ງລັດຂອງກະຊວງຖະແຫລງຂ່າວວັດທະນະທໍາ ແລະ ທ່ອງທ່ຽວຫລັງຈາກນັ້ນໄດ້ເດີນທາງໄປຍັງແຂວງຈໍາປາສັກໃຫ້ກຽດຕ້ອນຮັບໂດຍ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ເຈົ້າແຂວງຈໍາປາສັກ ແລະປະ ຊາຊົນຊາວແຂວງຈໍາປາສັກ. ໃນຕອນບ່າຍວັນດຽວກັນໄດ້ມີພິທີບາສີສູ່ຂວັນຕາມຮີດຄອງປະເພນີລາວ ແລະ ງານລ້ຽງອາຫານຄໍ່າທີ່ໂຮງແຮມຈໍາປາສັກແກຣນໃຫ້ແກ່ສັມເດັດພະເທບ ເຊິ່ງຈັດໂດຍທ່ານດຣ. ບຸນຖອງ ດີວິໄຊ ເຈົ້າແຂວງໆຈໍາປາສັກ.