#
ວິເສດ ສະແຫວງສຶກສາ
ຫາກມີຄົນຕັ້ງຄຳຖາມວ່າ
ໃນຍຸກນີ້ “ສີ” ໃດມີຄົນເວົ້າຮອດຫລາຍໃນລະດັບປະເທດ ແລະ ລະດັບໂລກ ? ຄຳຕອບກໍຄື
“ສີຂຽວ” ເພາະສີຂຽວບໍ່ພຽງແຕ່ໝາຍເຖິງທຳມະຊາດປ່າໄມ້ໃບຫຍ້າທີ່ຂຽວສົດງົດງາມເທົ່ານັ້ນ,
ແຕ່ມັນຍັງໝາຍເຖິງສິ່ງແວດລ້ອມ ເຊັ່ນຄຳວ່າ “ພັດທະນາສີຂຽວ” ກໍມີຄວາມໝາຍວ່າການພັດທະນາທີ່ເປັນມິດກັບສິ່ງແວດລ້ອມ,
ບໍ່ສ້າງຜົນກະທົບທາງລົບຕໍ່ສິ່ງແວດລ້ອມ. ພາຫະນະສີຂຽວ (Green Vehicles) ນັ້ນໝາຍເຖິງລົດປະເພດທີ່ບໍ່ປ່ອຍມົນລະພິດທຳລາຍອາກາດຫາຍໃຈຂອງມະນຸດ.
ນອກນັ້ນກໍຍັງມີພາສາອັງກິດເກີດໃໝ່ວ່າ Go Green) ແປວ່າຫັນເປັນຂຽວ ຄືເຮັດທຸກສິ່ງທຸກຢ່າງເພື່ອປົກປັກຮັກສາສິ່ງແວດລ້ອມໃຫ້ສົດໃສໄຮ້ພິດ
ແລະ ທີ່ເວົ້າຮອດຫລາຍກໍຄື “Green City” ແປຕາມໂຕວ່ານະຄອນຂຽວ ແຕ່ເນື້ອແທ້ແມ່ນຕົວເມືອງທີ່ມີທັງສີຂຽວຂອງທຳມະຊາດ
ແລະ ທັງປອດມົນລະພິດ. ນີ້ເປັນພຽງອະລຳພະບົດທີ່ຍືດຍາວ ເພື່ອເຂົ້າສູ່ເລື່ອງການປົກປັກຮັກສາສິ່ງແວດລ້ອມໃນບາງຕົວເມືອງໃຫຍ່
ແລະ ສະຖານທີ່
ສຳຄັນຢູ່ຕ່າງປະເທດ ເຊັ່ນຢູ່ນະຄອນຫລວງນິວເດນລີປະເທດອິນເດຍ.
ສະຖິຕິຂອງອົງການອະນາໄມໂລກໄດ້ຢັ້ງຢືນເມື່ອປີຜ່ານມາວ່າ ອາກາດເປັນພິດໃນນິວເດນລີນັ້ນຕິດເບີໜຶ່ງໃນໂລກ.
ຍ້ອນແນວນີ້ເອງ ທາງການຂອງອິນເດຍຈຶ່ງຮີບຮ້ອນປະກາດຢຸດແລ່ນລົດເກົ່າທີ່ມີອາຍຸໃຊ້ງານມາແລ້ວ
15-20 ປີ ແລະ ຂໍຮ້ອງໃຫ້ເຈົ້າຂອງລົດເກງແຕ່ລະຄັນບິແບ່ງບ່ອນນັ່ງໃຫ້ຫລາຍຄົນ
ຄືບໍ່ໃຫ້ຂີ່ເວີ້ງເວີ່ງໄປຜູ້ດຽວ, ພໍເອົາໃຜຂຶ້ນຂີ່ນຳໄດ້ກໍໃຫ້ຂີ່. ນອກຈາກນັ້ນ
ໃນເຂດອະນຸສອນສະຖານ ທັດສະມາຮານ ບັນລືໂລກທີ່ເຮັດດ້ວຍຫີນອ່ອນກໍມີການຫ້າມປະຊາຊົນຈູດຂີ້ງົວແຫ້ງເພື່ອດັງໄຟຫຸງຕົ້ມ
ຫລື ຟີງແກ້ໜາວ ເພາະໄດ້ມີການພິສູດຄັກແນ່ວ່າ ຄວັນໄຟຈາກຂີ້ງົວນັ້ນໄດ້ເຮັດໃຫ້ທັດສະມາຮານຄ່ອຍໆປ່ຽນເປັນສີເຫລືອງແທນທີ່ຈະເປັນສີຂາວເງົາງາມຕາມທຳມະຊາດຂອງຫີນອ່ອນ.
ນອກຈາກນັ້ນ ນັບແຕ່ປີ 1996 ເປັນຕົ້ນມາ, ສານສູງອິນເດຍໄດ້ສັ່ງຫ້າມຕັ້ງໂຮງຈັກໂຮງງານໃນວົງລັດສະໝີ
10.000 ແມັດມົນທົນ ຫ່າງຈາກທັດສະມາຮານ.
ຢູ່ນະຄອນໂຮຈິງ
ສສ ຫວຽດນາມ, ຂ່າວບອກວ່າໃນກາງປີ 2015 ທາງການໄດ້ເຜີຍແບລາຍຊື່ຫົວໜ່ວຍທຸລະກິດປະກອບການເກືອບ
700 ແຫ່ງທີ່ເປັນຕົວການກໍ່ໃຫ້ເກີດມົນລະພິດໃນນະຄອນນີ້. ມາດຕະການແກ້ໄຂບັນຫາກໍຄືຕ້ອງຍົກຍ້າຍຫົວໜ່ວຍປະກອບການນີ້ອອກຈາກຕົວນະຄອນໃຫ້ໄດ້
24 ຫົວໜ່ວຍຂອງທັງໝົດໃນສົກປີ 2015-2016, ສ່ວນເຫລືອອີກກວ່າ 600 ຫົວໜ່ວຍຈະຖືກຖອນອອກນອກພາຍໃນປີ
2017. ນອກຈາກຄຳສັ່ງຍົກຍ້າຍແລ້ວກໍຍັງມີວິທີອື່ນອີກ ຄືກຳນົດໃຫ້ຫົວໜ່ວຍທຸລະກິດທີ່ສ້າງມົນລະພິດປ່ຽນຮູບການຜະລິດທີ່ບໍ່ມີຜົນກະທົບດ້ານລົບຕໍ່ສິ່ງແວດລ້ອມ
ຫລື ດ້ວຍມາດຕະການສັ່ງໂຈະການຜະລິດໄປເລີຍ. ຢູ່ປະເທດສິງກະໂປ, ທາງການຂອງປະເທດນີ້ໄດ້ຮັບຮອງເອົາແຜນ
5-10 ປີ ເພື່ອສ້າງໝົດປະເທດໃຫ້ເປັນສີຂຽວ ໂດຍໄດ້ຈັດເປັນ 3 ໄລຍະ. ໄລຍະທີໜຶ່ງເນັ້ນການປູກຕົ້ນໄມ້ໃນບໍລິເວນອາຄານບ້ານຊ່ອງ
(ລວມທັງຢູ່ຫລັງຄາຕຶກ), ໄລຍະທີສອງຈະເນັ້ນການປ່ຽນຖ່າຍອຸປະກອນຊ່ວຍປະຢັດໄຟຟ້າ
ແລະ ນ້ຳປະປາຕາມທີ່ພັກພາອາໄສ, ເປັນອຸປະກອນທີ່ບໍ່ໃຊ້ພະລັງງານຫລາຍ ແລະ
ເປັນມິດກັບສິ່ງແວດລ້ອມ, ສ່ວນໄລຍະທີສາມນັ້ນເນັ້ນເນື້ອທີ່ສີຂຽວຕາມສຳນັກງານພາກລັດ
ຄືກຳນົດໃຫ້ຢ່າງໜ້ອຍ 5.000 ແມັດມົນທົນຂອງພື້ນທີ່ອາຄານປົກຫຸ້ມດ້ວຍ “ສີຂຽວ”
ແລະ ຖ້າເບິ່ງໄປໄກກວ່ານັ້ນກໍຄືພາຍໃນປີ 2030 ຕຶກອາຄານທີ່ປະເທດສິງກະໂປຢ່າງໜ້ອຍ
80% ຕ້ອງປົກຫຸ້ມດ້ວຍສີຂຽວທຳມະຊາດ. ຢູ່ ສປ ຈີນ, ໃນສາມປີຜ່ານມາ ບໍລິສັດຜະລິດລົດລາຍໃຫຍ່ຕ່າງໆໄດ້ສຸມໃສ່ຜະລິດພາຫະນະສີຂຽວ
(Green Vehicles) ທີ່ແລ່ນດ້ວຍພະລັງງານສະອາດ (ໄຟຟ້າ) ໂດຍໄດ້ຈັດງານວາງສະແດງລົດ
(ໃຫຍ່) ໄຟຟ້າຈຳນວນ 6.000 ຄັນ ໃນຕົວເມືອງຕ່າງໆ ເພື່ອເຈາະຕະຫລາດພາຍໃນ. ໃນກາງປີ
2014, ສປ ຈີນ ກໍໄດ້ອອກນະໂຍບາຍຍົກເວັ້ນພາສີສຳລັບລົດທີ່ເປັນມິດກັບສິ່ງແວດລ້ອມ.
ເພື່ອຊຸກຍູ້ສົ່ງເສີມການໃຊ້ລົດໄຟຟ້າ, ທາງການຈີນຍັງຈະເພີ່ມສະຖານທີ່ສາກໄຟຟ້າສຳລັບລົດໄປພ້ອມໆກັບການຫລຸດລາຄາລົດປະເພດນີ້ອີກດ້ວຍ.
No comments:
Post a Comment